Unonan Samuel 16:1-43
16 Kanian say Kaban na tuan Dios et inloob da ed tolda ya impaalagey nen David parad satan tan inlira da ed pasen to;+ tan angiyapay ira na saray apay a popoolan tan bagat a pandurungoan diad arapan na tuan Dios.+
2 Sanen niyapay la nen David iray apay a popoolan+ tan bagat a pandurungoan,+ benendisyonan to ray totoo diad ngaran nen Jehova.
3 Ontan met, binunogan to so amin ya Israelita, balang laki tan bii, na malimpek a tinapay, bibingkan datiles, tan bibingkan pasas.
4 Insan wala ray Levita a tinuro ton manlingkor diad arap na Kaban nen Jehova,+ pian igalang,* pisalamatan, tan idayew si Jehova a Dios na Israel.
5 Si Asaf+ so ulo, tan say onkokomaduad sikato et si Zacarias; tan sikara di Jeiel, Semiramot, Jehiel, Matitias, Eliab, Benaias, Obed-edom, tan Jeiel+ so nantogtog na saray nandeles ya instrumento tan arpa;+ tan si Asaf so amaknol na saray piangpiang,+
6 tan saray saserdoten si Benaias tan Jahaziel so mamapaknol na saray trumpeta diad arap na kaban na sipanan na tuan Dios.
7 Diad saman ya agew, si David et nanggawa na kansion parad pisasalamat ed si Jehova diad unonan pankanawnawa tan ingganggan toy Asaf+ tan saray agagi to a kansionen da itan, a kuan to:
8 “Misalamat kayod si Jehova,+ tawag kayod ngaran to,Ipakabat yod totoo iray gagawaen to!+
9 Kansionan yo, kansionan yo na panangidayew,*+Dalepdep yoy* amin a makapakelaw a gawa to.+
10 Ipasirayew yoy masanton ngaran to.+
Manliket komon so puso na saramay manaanap ed si Jehova.+
11 Anap yoy Jehova+ tan kerew kayoy biskeg to.Sikatoy naynay yon anapen.+
12 Nonot yo ray makapakelaw a ginawa to,+Saray milagron impanengneng to tan saray panangukom ya inyabawag to,
13 Sikayo ran ilalak* nen Israel a lingkor to,+Sikayo ran pinili to ya ananak nen Jacob.+
14 Sikato si Jehova a Dios tayo.+
Saray panangukom to et walad interon dalin.+
15 Nonot yoy sipanan to ya anggad angga,Samay insipan to,* ya anggad sanlibon henerasyon,+
16 Say impisipanan tod si Abraham,+Tan say sinambaan tod si Isaac,+
17 A ginawa to bilang sakey a ganggan ed Jacob+Tan sakey a manbayag a sipanan ed Israel,
18 A kuan to, ‘Iter kod sika so dalin na Canaan+Bilang tawir a nabebetangan yo.’+
19 Imbaga to ’ya sanen daiset ni ra,On, sanen dagdaiset ira, tan dayo ira ed satan a dalin.+
20 Inmalis-alis irad nanduruman nasyon,Manlapud sakey a panarian anggad sananey a panarian.+
21 Agto inabuloyan a lamesen ira na siopaman a too,+Noag ingen binano to ray arari nisengeg ed sikara,+
22 A kuan to, ‘Agyo didiwiten iray nilanaan ko,Tan agkayo manggagaway mauges ed saray propetak.’+
23 Kansionan yo si Jehova, O interon dalin!
Agew-agew yon ipakabat so panangiliktar to!+
24 Iyabawag yoy gloria to diad saray nasyon,Saray makapakelaw a gawa to diad amin a totoo.
25 Ta si Jehova et makapanyari tan sankamakanepegan na dayew.
Sikatoy makapadinayew nen say amin ni ran dirios.+
26 Amin a dirios na saray totoo et andi-kakanaan a dirios,+Balet si Jehova so nanggawa na katawenan.+
27 Say katagyan* tan karlangan et walad arapan to;+Say biskeg tan liket et walad ayaman to.+
28 Iter yod si Jehova so manepeg ed sikato, sikayo ran pamilya na saray totoo,Iter yod si Jehova so manepeg ed sikato lapud gloria tan biskeg to.+
29 Iter yod si Jehova so gloria a manepeg ed ngaran to;+Mangawit kayoy regalo tan la kayod arapan to.+
Dakmomo* kayod si Jehova a say kawes yo et masanto.*+
30 Giwgiw kayod arapan to, O interon dalin!
Say dalin et niletneg a malet; ag-itan nagalaw.*+
31 Manliket komon so katawenan, tan manggayaga komon so dalin;+Iyabawag yod saray nasyon: ‘Si Jehova et nagmaliw ya Ari!’+
32 Onungol komon so dayat tan say amin a wadtan;Manliket komon so kaumaan tan amin a bengatlan wadtan.
33 Tan oneyag komon ed liket iray kiew ed takel diad arapan nen Jehova,Ta sikatoy onsabi* pian mangukom ed dalin.
34 Misalamat kayod si Jehova, ta sikatoy maomaong;+Say matoor a panangaro to et mansiansia ya anggad angga.+
35 Tan ibaga yo, ‘Iliktar mo kami, O Dios na kilalaban mi,+Tipon mo kami tan iliktar mo kami manlapud saray nasyon,Pian makapisalamat kami ed masanton ngaran mo+Tan manliket kamin mangidayew ed sika.*+
36 Narayew komon si Jehova a Dios na IsraelYa anggad angga.’”*
Tan imbaga na amin a totoo, “Amen!”* tan indayew day Jehova.
37 Insan intilak nen David si Asaf+ tan saray agagi to diad arap na kaban na sipanan nen Jehova pian mantultuloy iran manlingkor diad arap na Kaban,+ unong ed inagew-agew a rotina.+
38 Sikara di Obed-edom tan saray agagi to, a manbilang na 68, tan si Obed-edom ya anak nen Jedutun tan si Hosa so bantay na puerta;
39 tan si Zadok+ a saserdote tan saray kaiba ton saserdote et walad arap na tabernakulo nen Jehova diad atagey a pasen ed Gibeon+
40 pian regular iran mangiyapay ed si Jehova na saray apay a popoolan, diad kabuasan tan labi, diman ed altar na apay a popoolan, tan pian gawaen so amin ya akasulat ed Ganggan nen Jehova ya inter tod Israel.+
41 Kaiba ray Heman tan si Jedutun+ tan arum nin pinilin lalaki ya aturo unong ed ngaran da pian pisalamatan si Jehova,+ lapud “say matoor a panangaro to et mansiansia ya anggad angga”;+
42 tan kaiba ray Heman+ tan Jedutun a mamaknol na saray trumpeta, piangpiang, tan saray instrumento ya uusaren pian idayew so tuan Dios; tan saray ananak nen Jedutun+ et walad puerta.
43 Insan sinmempet so amin a totoo ed kaabungan da, tan sinmempet met si David pian bendisyonan so sankaabungan to.
Paimanod leksab
^ Literal, “pian nonoten.”
^ Odino “mantogtog tan mangansion kayo parad sikato.”
^ Odino posiblin, “Itongtong yoy nipaakar ed.”
^ Odino “kailalakan.” Literal, “bini.”
^ Literal, “Samay salitan inggangan to.”
^ Odino “kagalangan.”
^ Odino posiblin, “lapud karakpan na inkasanto to.”
^ Odino “Mandayew.”
^ Odino “natentenyeg.”
^ Odino “sinmabi la.”
^ Odino “panliketan mi dayew mo.”
^ Odino “Manlapud andi-anggaan ya anggad andi-anggaan.”
^ Odino “Ontan pa komon!”
