Mateo 27:1-66
27 Kasabi kabuasan, nantotongtong so amin a manunan saserdote tan mamasiken na totoo no panon dan pateyen si Jesus.
2 Tan kayari ran binalor, sikatoy inyakar da pian iyawat ed si Pilato a gobernador.
3 Insan sikatoy senentensiaan la na patey. Sanen anengneng iya nen Judas, ya angiyawat ed sikato, sikatoy nanermen a maong tan impawil to so talomplon pilak ed saray manunan saserdote tan mamasiken,
4 a kuan to: “Nankasalanan ak sanen inyawat ko so matunong a too.”* Et inkuan da: “Antoy pibabali mi? Sikay akauley ed satan!”
5 Kanian imbantak to ed templo iray pilak tan tinmaynan, tan imbitay toy inkasikato.
6 Balet inala na saray manunan saserdote iray pilak tan inkuan da: “Aliwan manepeg ya ipelag iraya diad sagradon pananginan na kayamanan, lapud saraya et bili na dala.”
7 Kayari ran nantotongtong, sinaliw da so uma na managgaway banga pian magmaliw a ponponan ed saray dayo.
8 Kanian saman ya uma et tinawag ya “Uma na Dala” angga ed sayan panaon.
9 Diad saman et asumpal imay sinalita ed panamegley nen propetan Jeremias, ya inkuan to: “Tan inala ra so talomplon pilak, say bili a nampapaknaan na saray anak na Israel ya ibayar parad sikato,
10 tan inter da iratan parad say uma na managgaway banga, unong ya ingganggan nen Jehova ed siak.”
11 Natan et wala la ed arapan na gobernador si Jesus; tan sikatoy tinepetan na gobernador: “Sika so ari na saray Judio?” Inmebat si Jesus: “Sikan mismo so angibaga ed satan.”
12 Balet, legan ya aakusaan na saray manunan saserdote tan mamasiken, sikatoy ag-inmebat a balot.
13 Diad saman et inkuan nen Pilato ed sikato: “Agmo ta narerengel so dakdakel a testimonya ra sumpad sika?”
14 Ingen ta agto ran balot inebatan, kanian nikelawan a maong so gobernador.
15 Diad kada piesta et niyugali la na gobernador so pangibulos na sakey a priso parad saray totoo, samay labay da.
16 Diad saman a panaon et walay impriso ra a manngaran na Barabas, a kabkabat a mauges.
17 Kanian sanen atipon ira, inkuan nen Pilato ed sikara: “Siopa so labay yon ibulos ko ed sikayo, si Barabas odino si Jesus a tatawagey Kristo?”
18 Ta amta to a makakaibeg ira kanian sikatoy inyawat da.
19 Niarum ni, legan a sikatoy akayurong ed panangukoman, walay imbaki na asawa to ed sikato, ya angikuan: “Agmo pibabalian itan a matunong a too, ta ataktakot ak a maong natan ed akugip ko nipaakar ed sikato.”
20 Balet tinangguyor na saray manunan saserdote tan mamasiken iray totoo pian paibulos day Barabas, ingen ta papatey day Jesus.
21 Et inmebat so gobernador ed sikara: “Siopa ed sikaran dua so labay yon ibulos ko?” Inkuan da: “Si Barabas.”
22 Inkuan nen Pilato ed sikara: “Anto sirin so gawaen ko ed si Jesus a tatawagey Kristo?” Et inkuan dan amin: “Ipasak!”
23 Inkuan to: “Akin, antoy mauges a ginawa to?” Balet lalon inkasil day iyeeyag da: “Ipasak!”
24 Sanen anengneng nen Pilato ya anggapoy agawaan na satan, noagta onloloor so gulo, sikatoy angala na danum tan inurasan to ray lima to ed arapan na totoo, a kuan to: “Anggapoy eebatan ko ed dala na sayan too. Sikayo lay makauley.”
25 Et inmebat so amin a totoo: “Ebatan mi tan saray anak mi so ipatey to.”*
26 Kanian si Barabas so imbulos to ed sikara, balet si Jesus et impasiplatan to tan inyawat to pian nipasak.
27 Insan saray sundalo na gobernador et inloob day Jesus diad palasyo na gobernador tan tinawag da so interon ulop na saray sundalo tan sikatoy pinaliberan da.
28 Tan sanen nilakseban da, sikatoy sinulongan day ambalbalangan balabal,
29 tan nanlaga ray koronan sabisabit tan inyan da itan ed ulo to tan impabemben da ed kawanan a lima to so sakey a tanubong. Insan tinalimukoran da, ya inelek-elekan da, tan inkuan da: “Maabig ya agew, Ari na saray Judio!”
30 Tan sikatoy nilutlutdaan da tan inala ra so tanubong tan impaspas da ed ulo to.
31 Kayari ran inelek-elekan, inekal da so balabal tan insulong da ed sikato iray ilalatop ton kawes tan inyakar dan ipasak.
32 Sanen ompapaway la ra, nabet day sakey a toon taga Cirene, a manngaray Simon. Sikatoy pinasoot dan manlingkor pian sakbaten toy panamairapan a kiew* nen Jesus.
33 Tan sanen akasabi la ra ed pasen a tatawagey Golgotha, a mankabaliksay, Pasen na Lapislapis na Ulo,
34 papainumen day Jesus na alak a nilaokan na bengatlan ampait, balet sanen atimtiman to et agto labay ya inumen.
35 Sanen nipasak da la, nanaapagan da iray ilalatop ton kawes a nampapalaranan* da,
36 tan yinmurong ira tan binantayan da.
37 Ontan met, inyan da ed uloan to imay akasulatan na ipapalsa ra ed sikato: “Saya si Jesus ya Ari na saray Judio.”
38 Diad saman et walay duaran matakew ya impasak da met ed abay to, sakey ed kawanan to tan sakey ed kawigi to.
39 Kanian sikatoy binalawbalaw na saray ondadalan, a manpeyeng ira
40 a kuan da: “O sika a mangibabagan igebam so templo tan ipaalagey mo itan ed loob na taloy agew, isalbam so inkasika! No sakey kan anak na Dios, epas ka ed satan a panamairapan a kiew!”
41 Ontan met so ginawa na saray manunan saserdote pati saray eskriba tan mamasiken, a sikatoy inelek-elekan da, a kuan da:
42 “Insalba toy arum, agto balet nisalbay inkasikato! Sikatoy Ari na Israel; onepas komon natan ed satan a panamairapan a kiew ta pian manisia itayo ed sikato.
43 Say Dios so panmamatalekan to, kanian no labay na Dios ya ilaban, natan la komon, ta imbaga ton, ‘Siak so Anak na Dios.’”
44 Ontan met so impamalaw ed sikato na saray matakew ya impasak a kaiba to.
45 Manlapud komanem ya oras* a manpatuloy et binmilunget so interon dalin, anggad komasiam ya oras.*
46 Nen komasiam la ya oras, inmeyag si Jesus, a kuan to: “Eʹli, Eʹli, laʹma sa·bach·thaʹni?” salanti, “Dios ko, Dios ko, akin et pinaulyanan mo ak?”
47 Sanen nadngel iya na arum ed saramay akaalagey diman, inkuan da: “Tatawagen toy Elias.”
48 Et binmatik a tampol so sakey ed sikara tan angala na espongha tan impasepsep to ed anakseng ya alak tan inyan to ed tanubong insan ipapainum to ed sikato.
49 Balet inkuan na arum ed sikara: “Paulyan mo! Nengnengen tayo no kasin onsabi si Elias a mangisalba ed sikato.” [Say sananey et angala na gayang tan dinuyok to ed diking, et pinmaway so dala tan danum.]*
50 Et inmeyag lamet si Jesus, insan nauyosan lay linawa.
51 Tan nia! say kurtina na santuaryo et apilat tan nankadua, manlapud tagey anggad leksab, tan yinmegyeg so dalin, tan linmeletak iray bato.
52 Et alukaslukasan iray pakanodnonotan a lubok tan nibanbantak so dakel a bangkay na saray masanto ya inaatey,*
53 (tan saray totoo et linmoob ed masanton syudad, a nanlapu ra ed kawalaan na saray pakanodnonotan a lubok kayari na inkioli to,) tan anengneng iratan na dakel a totoo.
54 Balet sanen say opisyal na armada tan saramay kaiba ton manbabantay ed si Jesus et naimatonan da so yegyeg tan saray agawa, ataktakot iran maong, a kuan da: “Petepeteg a saya so Anak na Dios.”
55 Niarum ni, diad bandad arawi et wadman a maniimaton so dakel a bibii, ya akila ed si Jesus manlapud Galilea pian manserbi ed sikato;
56 kaiba ed saratan si Maria Magdalena, pati si Maria ya ina di Santiago tan Joses, tan say ina na saray anak nen Zebedeo.
57 Natan sanen ngarngarem la, sinmabi so sakey a mayaman a lakin taga Arimatea, a manngaran na Jose, a nagmaliw met a disipulo nen Jesus.
58 Sikatoy linma ed si Pilato tan kinerew toy bangkay nen Jesus. Diad saman et ingganggan nen Pilato ya iter itan.
59 Kanian inala nen Jose so bangkay, a binalkot toy malinis tan pinon lienzo,
60 tan imparukol to itan ed balon pakanodnonotan a lubok to, ya inungib to ed bato. Tan, kayari ton intulin so baleg a bato ed puerta na pakanodnonotan a lubok, sikatoy tinmaynan.
61 Balet nansiansia diman si Maria Magdalena tan samay sakey nin Maria, ya akayurong ira ed arap na lubok.
62 Diad tinmumbok ya agew, kasumpal na Panagparaan, nantitipon ed arap nen Pilato iray manunan saserdote tan saray Fariseo,
63 ya inkuan da: “Katawan, anonotan mi ya inkuan na saman ya impostor sanen mabilay ni, ‘Napaoli ak kayari taloy agew.’
64 Iganggan mo sirin a bantayan a maong so lubok anggad komatlon agew, ta pian sikatoy agbalot takewen na saray disipulo to tan ibaga ra ed totoon, ‘Sikatoy apaoli manlapud saray inaatey!’ tan magmaliw laingen a mas mauges iyan unor a pankunkunwari nen samay inmuna.”
65 Inkuan nen Pilato ed sikara: “Walaray guardia yo. La kayo tan bantayan yon maong itan.”
66 Kanian linma ra tan sineguro ra ya agbalot nalukasan so lubok, ya asaraan itan na bato tan walay guardia.
Paimanod leksab
^ Mat 27:35
* Sakey iyan kustombre nensaman a say kada sakey et mangiiyan na melag a bato ed sakey a pananginan tan say akankayarian ed baton napelag et sikatoy analo.
