Mateo 17:1-27

17  Kayari na anemiran agew, intagar nen Jesus si Pedro tan say sanagin Santiago tan Juan tan inyakar to ra ed atagtagey a palandey a siksikara labat.  Tan anguman so itsura to ed arap da, tan say lupa to et sinminag a singa agew, tan say latop ton kawes et nagmaliw a masnag a singa liwawa.  Tan, nia! anengneng day Moises tan Elias, a mitotongtong ed sikato.  Lapud saya et inkuan nen Pedro ed si Jesus: “Katawan, maabig no dia tayo la. No labay mo et mangipaalagey ak dia na taloran tolda, sakey parad sika tan sakey parad si Moises tan sakey parad si Elias.”  Legan a sikatoy mansasalita ni, nia! tinmarong ed sikara so sakey a maliwawan lurem, tan nia! sakey a boses a manlapud lurem so angikuan: “Saya so Ana’ko, say inad-arok, ya inabobonan ko. Dengel kayo ed sikato.”  Sanen nadngel iya na saray disipulo, sikaray dinmakmomo tan ataktakot iran maong.  Insan sinmingger si Jesus, tan diniwit to ra, a kuan to: “Alagey kayo tan agkayo natatakot.”  Sanen tinmangwa ra, anggapo lay anengneng da noag si Jesus labat.  Tan sanen onlalasur la ra manlapud palandey, binilin ira nen Jesus, a kuan to: “Agyo ibabaga ed anggan siopa so pasingawey anggad say Anak na too so napaoli ed inaatey.” 10  Et sikatoy tinepetan na saray disipulo: “Akin et ibabaga na saray eskriba a nepeg ya onsabin unona si Elias?” 11  Sikatoy inmebat: “Peteg ya onsabi si Elias tan ipawil to so amin a bengatla. 12  Balet ibagak ed sikayo a sinmabi lay Elias, tan agda binidbir noagta ginawa ra ed sikato so labalabay da. Diad onia met a paraan, say Anak na too et nepeg a manirap ed lima ra.” 13  Diad saman et atebek na saray disipulo a say tutukoyen to et si Juan a Bautista. 14  Tan sanen dinmago ra ed dakel a totoo, walay lakin inmasingger ed sikato, a tinmalimukor tan inkuan to: 15  “Katawan, kasian mo so ana’ko, lapud sikatoy dumurulot tan mair-irap so kipapasen to, ta mabetbet a natutumba ed apoy tan ed danum, 16  tan sikatoy inyakar ko ed saray disipulom, balet agda napaabig.” 17  Inmebat si Jesus: “O sikayoran andiay-pananisia tan mauges a kailalakan, anggad kapigan ni so pilimog ko ed sikayo? Anggad kapigan ni so pananos ko ed sikayo? Iyakar yo dia ed siak.” 18  Insan binano nen Jesus so demonyo, tan pinmaway itan ed ugaw, tan manlapud saman ya oras et inmabig la so ugaw. 19  Saray disipulo et inmasingger ed si Jesus sanen siksikara labat la tan inkuan da: “Akin et agmi napapaway itan?” 20  Inkuan to ed sikara: “Lapud melmelag so pananisia yo. Tua kuan ko ed sikayo, No walay pananisia yo a singa kamelag na bukel na mustasa, ibaga yo ed sayan palandey, ‘Onalis ka diman,’ et onalis itan, tan anggapo so imposible ed sikayo.” 21*  —— 22  Sikaray nantitipon ed saman diad Galilea sanen inkuan nen Jesus ed sikara: “Say Anak na too et nepeg ya iyawat ed lima na totoo, 23  tan sikatoy pateyen da, tan diad komatlon agew et napaoli.” Lapud saya et sikaray nanermen a maong. 24  Kasabi ra ed Capernaum, inmasingger ed si Pedro iray lalakin mansisingil na duaran drakma* a buis, a kuan da: “Manbabayar ta so managbangat yo na duaran drakma a buis?” 25  Inkuan to: “On.” Balet sanen linmoob ed abung si Pedro, si Jesus so inmunan nansalita tan inkuan to: “Antoy nikuan mo, Simon? Sioparay manbabayar odino manbubuis ed saray arari ed dalin? Saray anak da odino saray sangkaili?” 26  Sanen inkuan ton: “Saray sangkaili,” imbaga nen Jesus ed sikato: “No ontan sirin, agkaukolan a manbuis iray anak. 27  Balet ta pian anggapoy mauges a nibaga ra ed sikatayo, la ka ed dayat, manbanwit ka, tan alam so sira ya unonan nabanwit, tan sano lengaten moy sangi to et makaromog ka na sakey a pilak a sinsilyo.* Alam itan tan bayaran moy buis ta.”

Paimanod leksab

Mat 17:21 * Sayan bersikulo et naromog ed pigaran patalos na Biblia, balet inekal itan ed Griegon teksto nen Westcott tan Hort, a mitunosan ed maslak a kadaanan iran Griegon manuskrito.
Mat 17:24 * Literal, “duaran drakma a sinsilyo.” Sakey a pilak a sinsilyo na saray Griego a manbelat na 6.80 gramo.
Mat 17:27 * Literal, “sakey a sinsilyon stater,” a misimbangan ed apatiran drakma. Nengnengen so Apendise 11.