Mateo 25:1-46
25 “Insan say panarian na katawenan et aliling toy samploran mamarikit ya angala na saray lamparaan da tan pinmaway a mangabet ed nobyo.
2 Limara ed sikara so makulangkulang, tan limara so makabat.
3 Ta saray makulangkulang et inala da ray lamparaan da balet ag-ira angawit na larak,
4 balet ta saray makabat et angawit met na larak ed saray kargaan da sanen inawit da iray lamparaan da.
5 Sanen abayagan so nobyo, amin da so akateglep tan akaugip.
6 Balet kasabi pegley-labi et walay inmeyag, ‘Wadia la so nobyo! Paway kayo tan abet yo.’
7 Diad saman et inmalagey ya amin iramay mamarikit tan imparaan da iray lamparaan da.
8 Inkuan na saray makulangkulang ed saray makabat, ‘Ikdan yo kami pay larak yo, ta ngalngali la naerep iray lamparaan mi.’
9 Inmebat iray makabat, ‘Ompan onkulang la iya parad sikatayon amin. Onla kayo laingen ed saramay manlalako ed satan tan manaliw kayoy parad sikayo.’
10 Sanen linma la ran manaliw, sinmabi so nobyo, tan saray akaparaan a mamarikit so akiulop ed sikaton linmoob ed pambansalan, insan inkapot lay puerta.
11 Kayari na saya et sinmabi met iramay arum nin mamarikit tan inkuan da, ‘Katawan, katawan, paloob mo kami!’
12 Et sikatoy inmebat, ‘Ibagak so tua ed sikayo, Agta kayo kabat.’
13 “Mantultuloy kayo sirin a manbantay, lapud agyo amta so agew odino say oras.
14 “Ta satan et singa sakey a too, a sanen onla la ed arum a bansa, impatawag to iray ariripen to tan inmatalek to ed sikara so kaykayarian to.
15 Say sakey et inikdan to na limaran talento,* samay sakey et duara, tan samay sakey ni et sakey, kada sakey unong ed dilin abilidad to, insan sikatoy linma ed arum a bansa.
16 Tampol a linma imay angawat na limaran talento tan inyanap to iratan tan anubo na limara ni.
17 Ontan met, samay angawat na duara so anubo na duara ni.
18 Balet samay angawat na saksakey et linma, tan nankotkot ed dalin, tan inyamot to imay pilak a kuarta na katawan to.
19 “Kayari na abayag a panaon, sinmabi so katawan na saraman ya ariripen tan akikuentaan ed sikara.
20 Kanian samay angawat na limaran talento et inmasingger tan awit toy limara nin talento, a kuan to, ‘Katawan, limaran talento so inmatalek mo ed siak. Nia, anubo ak na limara nin talento.’
21 Inkuan ed sikato na katawan to, ‘Maabig so agawaan mo, maong tan matoor ya aripen! Matoor ka ed daiset a bengatla. Kanian turoen ta kan mangasikaso ed dakel a bengatla. Miliket ka ed katawan mo.’
22 Insan inmasingger imay angawat na duaran talento tan inkuan to, ‘Katawan, duaran talento so inmatalek mo ed siak. Nia, anubo ak na duara nin talento.’
23 Inkuan ed sikato na katawan to, ‘Maabig so agawaan mo, maong tan matoor ya aripen! Matoor ka ed daiset a bengatla. Kanian turoen ta kan mangasikaso ed dakel a bengatla. Miliket ka ed katawan mo.’
24 “Diad kaunoran et inmasingger imay angawat na sakey a talento tan inkuan to, ‘Katawan, amtak a mapeget kan too, a manaani ka ed agmo tinaneman tan mantitipon ka ed agmo tinaepan.
25 Kanian tinmakot ak tan inkotkot ko ed dalin so talentom. Nia la imay kayarian mo.’
26 Et inmebat ed sikato so katawan to, ‘Mauges tan mangiras kan aripen, agta amtam la a nan-ani ak ed agko tinaneman tan nantipon ak ed agko tinaepan?
27 Imbangkom la komon iray pilak a kuartak, ta pian kasabik et awaten koy kayarian ko pati say tubo to.
28 “‘Ala yo sirin ed sikato so talento tan iter yo ed samay walaan na samploran talento.
29 Ta balang sakey a walaan et naikdan ni na dakel tan sikatoy nawalaan na daakan. Balet samay andian, anggan say walad sikato et alaen ni.
30 Tan ibantak yo so andi-kakanaan ya aripen diad paway ya ambilbilunget. Diman so pannangisan to tan panngalatengetan na saray ngipen to.’
31 “Sano say Anak na too et onsabi ed gloria to, tan kaiba to so amin ya anghel, diad satan et sikatoy onyurong ed maglorian trono to.
32 Tan natipon ed arap to so amin a nasyones, tan pambibiiganen to iray totoo, a singa sakey a managpastol ya ibibiig to iray karnero ed saray kanding.
33 Tan saray karnero et ipasen to diad kawanan to, balet saray kanding et diad kawigi to.
34 “Insan ibaga na ari ed saramay walad kawanan to, ‘Gali dia, sikayoran benendisyonan nen Amak, tawir yoy panarian ya imparaan ed sikayo manlapu la’d inkiletneg* na mundo.
35 Ta sanen narasan ak et pinakan yo ak. Sanen napgaan ak et pinainum yo ak. Sanen sangkaili ak et pinatuloy yo ak.
36 Sanen lakseb ak et kinawesan yo ak. Sanen nansakit ak et inasikaso yo ak. Sanen wala ak ed prisoan et binisita yo ak.’
37 Insan saray matunong et onebat ed sikato, ‘Katawan, kapigan so impakanengneng mi ed sika a narasan tan pinakan mi ka, odino napgaan, tan pinainum mi ka?
38 Kapigan so impakanengneng mi ed sikan sangkaili tan pinatuloy mi ka, odino lakseb, tan kinawesan mi ka?
39 Kapigan so impakanengneng mi ed sika a nansakit odino walad prisoan tan binisita mi ka?’
40 Tan onebat so ari tan ibaga to ed sikara, ‘Tua kuan ko ed sikayo, No ginawa yo itan ed sakey ed saray sankamelagan ed sarayan agagik, ginawa yo met la itan ed siak.’
41 “Insan, ibaga to met ed saramay walad kawigi to, ‘Arawi kayo ed siak, sikayoran naukom diad andi-anggaan ya apoy ya imparaan parad say Diablo tan saray anghel to.
42 Ta sanen narasan ak et agyo ak pinakan, tan sanen napgaan ak et agyo ak pinainum.
43 Sanen sangkaili ak et agyo ak pinatuloy. Sanen lakseb ak et agyo ak kinawesan. Sanen nansakit ak tan wala ak ed prisoan et agyo ak inasikaso.’
44 Insan onebat met ira ed sikato, ‘Katawan, kapigan so impakanengneng mi ed sika a narasan odino napgaan odino sangkaili odino lakseb odino nansakit odino walad prisoan et agmi ka nilingkoran?’
45 Et sikatoy onebat ed sikara, ‘Tua kuan ko ed sikayo, No agyo itan ginawa ed sakey ed sarayan sankamelagan, agyo met itan ginawa ed siak.’
46 Tan saraya so managmak na andi-anggaan a kadederal, balet saray matunong so mangawat na bilay ya andi-anggaan.”

