Mateo 2:1-23
2 Kayari inkianak nen Jesus ed Betlehem na Judea diad panaon nen Herodes* ya ari, nia! walaray astrologo a nanlapu ed bukig a linma ed Jerusalem,
2 ya inkuan da: “Iner so kawalaan na samay nianak ya ari na saray Judio? Ta anengneng mi so bitewen to sanen wala kami ed bukig, kanian linma kami dia pian sikatoy igalang mi.”
3 Sanen nadngel iya nen Arin Herodes, sikatoy agonigon ontan met na amin a kaiba to ed Jerusalem;
4 tan sanen tinipon to so amin a manunan saserdote tan eskriba* na saray totoo, tinepetan to ra no iner so pangiyanakan ed Kristo.
5 Inkuan da ed sikato: “Diad Betlehem na Judea, lapud oniay nisulat ed panamegley na propeta,
6 ‘Tan sika, O Betlehem ed dalin na Juda, aliwa kan sankamelagan a syudad ed limog na saray manag-uley ed Juda, ta diad sika so pawayan na sakey a manuley, a manpastol ed totook ya Israel.’”
7 Insan masekreton impatawag nen Herodes iray astrologo tan sineguro ton maong ed sikara no kapigan pinmatnag so bitewen,
8 tan, sanen ibaki to la ra ed Betlehem, inkuan to: “La kayo tan seetan yon anapen so ugaw, tan sano aromog yo la, ipakabat yo ed siak ta pian onla ak met a mangigalang ed sikato.”
9 Kayari ran nadngel so ari, binmuat la ra, tan nia! samay bitewen ya anengneng da sanen wala ra ed bukig et walad unaan da, anggad tinmunda itan diad petek na kawalaan na ugaw.
10 Nanliket iran maong diad impakanengneng da ed bitewen.
11 Kaloob da ed abung et anengneng da so ugaw a kaiba nen Maria ya ina to, tan dinmakmomo ira pian mangigalang ed sikato. Nilukasan da met iray kayamanan da tan sikatoy niregaloan day balitok tan olibano* tan mira.*
12 Balet, lapud pinasakbayan ira na Dios diad sakey a kugip ya agla ra ompapawil ed si Herodes, sinmempet la ra ed bansa ra a sananey so dinalan da.
13 Kasipot da, nia! nampanengneng so anghel nen Jehova ed si Jose diad sakey a kugip, a kuan to: “Bangon ka, awit mo so ugaw tan say ina to tan batik kayo ed Ehipto, tan mansiansia kayo diman tan alagar moy ibagak ed sika, ta say ugaw et magano lan anapen nen Herodes pian pateyen to.”
14 Kanian diad saman a labi et sikatoy binmangon tan inawit toy ugaw tan say ina to tan linma ra ed Ehipto,
15 tan sikatoy nanayam diman angga ed impatey nen Herodes pian nasumpal so sinalita nen Jehova diad panamegley na propeta to, a kuan to: “Tinawag ko so ana’ko manlapud Ehipto.”
16 Et sanen akabatan nen Herodes a sikatoy asiliban na saray astrologo, agaylay pasnok to, kanian sikatoy angibaki na totoo pian ipapatey so amin ya ugugaw a lalaki ed Betlehem tan diad amin a distrito na satan, saramay mantaon na duara a paleksab, lapud aseguro to la nensaman ed saray astrologo no kapigan so impakanengneng da ed samay bitewen.
17 Kanian asumpal imay sinalita diad panamegley nen propetan Jeremias, a kuan to:
18 “Nadngel so sakey a boses ed Rama, pannangis tan panugaog. Si Raquel iman a nanangisan to iray ananak to, tan agto labay so paligliwa, lapud naandi la ra.”
19 Sanen inatey lay Herodes, nia! nampanengneng so anghel nen Jehova ed si Jose diad sakey a kugip diman ed Ehipto
20 tan inkuan to: “Bangon ka, awit mo so ugaw tan say ina to tan la kayo ed dalin na Israel, lapud inatey la iramay malabay a mamatey* ed ugaw.”
21 Kanian sikatoy binmangon tan inawit to so ugaw tan say ina to insan linma ra ed dalin na Israel.
22 Balet sanen nadngelan to a say manuuley lan ari ed Judea et si Arquelao ya anak nen Herodes, sikatoy tinmakot ya onla diman. Sakey ni, lapud sikatoy pinasakbayan la na Dios ed sakey a kugip, sikatoy linma ed teritorya na Galilea,
23 tan nanayam ed sakey a syudad a tinawag a Nazaret, ta pian nasumpal imay sinalita diad panamegley na saray propeta: “Sikatoy natawag a Nazareno.”
Paimanod leksab
^ Mat 2:4
* Say datin tutukoyen na saya et sakey a managkopya na Kasulatan, balet diad panaon nen Jesus et sakey a toon marunong ed Ganggan tan managbangat ed satan.
