Mateo 5:1-48
5 Sanen anengneng to iray totoo, sikatoy tinmatdang ed palandey; tan kayurong to et sikatoy dinago na saray disipulo to;
2 tan sikatoy nansalita tan binangatan to ra, a kuan to:
3 “Maliket iramay manonot ed espiritual a pankaukolan da, ta kayarian da so panarian na katawenan.
4 “Maliket iramay maneermen, ta naligliwa ira.
5 “Maliket iray mauyamo, ta tawiren da so dalin.
6 “Maliket iramay naeerasan tan napepegaan parad inkatunong, ta napenek ira.
7 “Maliket iray mapangasi, ta nakasian ira.
8 “Maliket iramay malinis so puso ra, ta nanengneng da so Dios.
9 “Maliket iray mareen,* ta natawag ira ya ‘ananak na Dios.’
10 “Maliket iramay napapasegsegang nisengeg ed inkatunong, ta kayarian da so panarian na katawenan.
11 “Maliket kayo sano balbalawen tan papasegsegangen kayo na totoo tan papalsaan da kayo na amin a klase na mauges a bengatla nisengeg ed siak.
12 Manliket kayo tan onlukso kayo ed gayaga, ta baleg so tumang yo ed katawenan, lapud ontan met so impamasegsegang da ed saray propeta ya akadkauna nen sikayo.
13 “Sikayo so asin na dalin; balet no tinmabang la itan, panon itan a magmaliw a maasin lamet? Anggapo lay pangusaran ed satan noagta ibantak la ed paway pian gatin-gatinan na totoo.
14 “Sikayo so liwawa na mundo. Agniyamot so sakey a syudad sano walad toktok na palandey.
15 Sano selselan na totoo so lamparaan, agda itan iyan ed dalem na baskit, noagta diad panangipatoonan pian nasilewan so amin a walad loob na abung.
16 Pasindag yo met sirin so liwawa yo ed saray totoo, pian nanengneng da so maabig iran gawa yo tan igloria ra so Ama yon walad tawen.
17 “Agyo iisipen a linma ak dia pian deralen so Ganggan odino sulsulat na saray Propeta. Linma ak dia pian manumpal, aliwan maneral,
18 lapud ibagak ed sikayo a mas mainomay nin naandi so tawen tan dalin nen say agpakasumpal na anggan sankamelagan a letra odino melag a kabiangan na sakey a letra na Ganggan.
19 Kanian, siopaman ya onsumlang ed sakey ed sarayan angkekelag a ganggan tan ibangat to so katooan a manumlang met ed saratan, sikatoy agmanepeg* ya onloob ed panarian na katawenan. Balet siopaman a manggawa tan mangibangat ed saratan, sikatoy manepeg* ya onloob ed panarian na katawenan.
20 Lapud ibagak ed sikayo ya agkayon balot makaloob ed panarian na katawenan no agnadaeg na inkatunong yo so inkatunong na saray eskriba tan Fariseo.
21 “Nadngelan yo a nikuan ed saray totoo nensaman ya, ‘Agka mamapatey, ingen siopaman a mamatey et walaan na eebatan ed korte na hustisya.’
22 Balet, ibagak ed sikayo a balang sakey a maneem-em na sanok ed agi to et walaan na eebatan ed korte na hustisya, bangbalet siopaman a manmudmora ed agi to panamegley na mabanbanday iran salita et walaan na eebatan ed Sankatageyan a Korte,* bangta siopaman a mangibaga na, ‘Sika ya andi-kakanaan ya ambagel!’ et makanepegan ed manliob a Gehenna.*
23 “Kanian no mangiyaapay ka ed altar tan anonotan mon say agim et walay babarongan to ed sika,
24 itilak mo so apay mo ed arap na altar tan anap mo so agim; mikareenan ka ni ed sikato, insan kapawil mo, iter mo so apay mo.
25 “Miaregloan kan tampol ed samay mangidedemanda ed sika legan a kabansag mon mamapaarap ed korte, agla pigan agto ka la iyawat ed huis tan say huis et agto ka iyawat ed bantay na korte pian agka napriso.
26 Ibagak ed sika so tua, Segseguradon agka makapaway ditan ya anggad agmo nabayaran so sankaunoran a sinsilyo.*
27 “Nadngelan yo a nikuan, ‘Agka mikakalugoran.’*
28 Balet ibagak ed sikayo a siopaman a naynay ya onlilinggis ed sakey a bii tekep na pampilpilalek ed sikato et akikalugoran la ed sikato dia ed puso to.
29 Natan, no say kawanan a matam so sengegan na pankakasalanan mo,* sukit mo itan tan ibantak mo. Ta magmaong ni a naandi so sakey a kabiangan na laman mo nen say nibuntok so interon laman mo ed Gehenna.
30 Ontan met, no say kawanan a limam so sengegan na pankakasalanan mo,* putot mo itan tan ibantak mo. Ta magmaong ni a naandi so sakey a kabiangan na laman mo nen say nibantak so interon laman mo ed Gehenna.
31 “Niarum ni, nikuan a, ‘Siopaman a lakin mangidiborsyo ed asawa to, ikdan to so asawa to na kasulatan ed diborsyo.’
32 Balet ibagak ed sikayo a siopaman a lakin mangidiborsyo ed asawa to, ya aliwan makasengeg ed pilalawanan,* ipepeligro to so asawa to a makapikalugoran, tan siopaman a mangasawa ed sayan bii ya indiborsyo et mankasalanan na pikakalugoran.
33 “Nadngelan yo met ya imbaga ed saray totoo nensaman ya, ‘Agka mangisisipan* no agmo lanlamang sumpalen, noagta nepeg mon tooren iray sipan mo ed si Jehova.’
34 Balet ibagak ed sikayo: Agkan balot mangisisipan balanglan diad tawen, ta satan so trono na Dios;
35 odino diad dalin, ta satan so toonan na sali to; odino diad Jerusalem, ta satan so syudad na makapanyarin Ari.
36 Odino agka met mangisisipan diad ulom lapud agmo napaputi odino napareket so sakey a buek.
37 Komon ta say imbaga yon On et On, tan say Andi yo et Andi; lapud say onsulok ed saraya et nanlapud samay sakey a mauges.
38 “Nadngelan yo a nikuan, ‘Mata ed mata, ngipen ed ngipen.’
39 Ingen, ibagak ed sikayo, Agka ombabawi no sinakitan ka na toon mauges, imbes siopaman a manampal ed kawanan ya aping mo, iyarap mo met ed sikato so kawigi.
40 Tan no wala so too a mangawit ed sika diad korte tan alaen to so lalatopan a kawes mo, paulyanan mo met lan alaen to so ilalatop a kawes mo.
41 Tan no say sakey a walad autoridad et piliten to kan manserbi ed sikato ed sakey a milya, mila ka ed sikato ed duaran milya.
42 Ikdan mo so onkekerew ed sika, tan pautang mo ya anggapoy tubo imay miuutang ed sika.
43 “Nadngelan yo a nikuan, ‘Arom so kaparam a too tan busol mo so kabusol mo.’
44 Balet, ibagak ed sikayo: Itultuloy yon aroen iray kabusol yo tan ipikasi iramay mamapasegsegang ed sikayo,
45 ta pian napaneknekan yo a sikayo iray ananak na Ama yon walad tawen, lapud papasinagen to so agew to ed saray mauges tan maong a totoo tan papepelagen to so uran ed saray matunong tan agmatunong.
46 No saramay mangaaro labat ed sikayo so aaroen yo, anto so tumang yo? Agta ontan met so gagawaen na saray managsingil na buis?
47 Tan no saray agagi yo labat so ibabano yo, wala ta so nikadkaduman gagawaen yo? Agta ontan met so gagawaen na saray totoo na nasyones?
48 Magmaliw kayo met ya ayadyari, unong a say Ama yon walad tawen et ayadyari.
Paimanod leksab
^ Mat 5:22
* Say pasen ed paway na Jerusalem a pampopoolan na saray basura. Nengnengen so Apendise 9.
