Mateo 9:1-38
9 Kanian, kalugan to ed baloto, sikatoy binmaliw ya amaarap ed syudad ton dili.*
2 Et nia! inawit da ed sikato so sakey a paralitiko a walad dukolan. Sanen anengneng nen Jesus so pananisia ra, inkuan to ed paralitiko: “Manpakpel ka, ana’ko, aperdona la iray kasalanan mo.”
3 Tan pigara ed saray eskriba so angikuan ed inkasikaran dili: “Sayan too et mansasalitay agpanamagalang ed Dios.”
4 Lapud amta nen Jesus so nononoten da, inkuan to: “Akin et mannononot kayoy mauges diad kapusoan yo?
5 Singa bilang, dinan so mas mainomay ya ibaga, Aperdona la iray kasalanan mo, odino, Alagey ka tan manakar ka?
6 Balet, ta pian naamtaan yo a say Anak na too et walaan na autoridad diad dalin a mamerdona na saray kasalanan,” inkuan to ed paralitiko: “Alagey ka, libit moy dukolan mo, tan sempet ka la.”
7 Et sikatoy inmalagey tan sinmempet la ed abung to.
8 Sanen anengneng iya na saray totoo, tinmakot ira, tan inggloria ra so Dios, ya angiter na ontan ya autoridad ed saray totoo.
9 Kayari na satan, sanen ondadalan si Jesus, anengneng toy sakey a lakin manngaran na Mateo ya akayurong ed panagsingilan na buis, tan inkuan to ed sikato: “Magmaliw kan patumbok ko.” Kanian sikatoy inmalagey tan tinmumbok ed sikato.
10 Diad saginonor, sanen akarungo si Jesus ed lamisaan diad loob na abung, nia! sinmabi so dakel a managsingil na buis tan saray managkasalanan tan akirungo ra ed sikato tan saray disipulo to.
11 Balet sanen anengneng iya na saray Fariseo, inkuan da ed saray disipulo to: “Akin et midudungo so managbangat yo ed saray managsingil na buis tan saray managkasalanan?”
12 Sanen nadngel to ira, inkuan to: “Saray totoon maksil so laman da et agmankaukolan na managtambal, noagta saraman labat so mansasakit.
13 La kayo, sirin, tan aral yo so kabaliksan na saya, ‘Say labay ko et panangasi, aliwan say bagat.’ Ta linma ak dia pian manawag ed saray managkasalanan, aliwan saray matunong.”
14 Insan inmasingger ed sikato iray disipulo nen Juan tan nantepet ira: “Akin et agmanaayunal iray disipulom, balet sikami tan saray Fariseo et naynay a manaayunal?”
15 Lapud saya et inkuan nen Jesus ed sikara: “Wala ta’y rason na saray kaaro na nobyo a manermen no kaiba da ni so nobyo? Balet onsabi iray agew sano alaen la ed sikara so nobyo, insan manayunal la ra ed satan.
16 Anggapoy siopaman a mangisakab na balon abel diad daan ya ilalatop a kawes; ta lapud elet na satan et naguyor imay ilalatop a kawes tan lalon napilat laingen.
17 Agmet iyan na totoo so balon alak diad daan iran panagkargaan;* ta no gawaen da itan et ombetag iray panagkargaan tan naibung so alak tan naderal iray panagkargaan. Balet iiyan na totoo so balon alak diad balo iran panagkargaan, pian pareho iratan a manbayag.”
18 Legan ton ibabaga iraya ed sikara, nia! walay sakey a manuley ya inmasingger tan dinmakmomo ed sikato, a kuan to: “Nayarin inatey la natan so ana’kon bii, balet mila ka tan itapew moy limam ed sikato pian nabilay.”
19 Diad saman, inmalagey si Jesus tan tinmumbok ed sikato, tan tinmumbok met iray disipulo to.
20 Tan nia! inmasingger so sakey a bii a labinduay taon lan maniirap lapud pampaparala to tan diniwit toy saloy na kawes nen Jesus,
21 ta naynay ton ibabaga ed inkasikaton dili: “No nadiwit ko labat so latop ton kawes, onabig ak la.”
22 Linmingaw si Jesus, tan sanen naimano to so bii, inkuan to: “Manpakpel ka, ana’ko; say pananisiam so amaabig ed sika.” Tan inmabig so bii manlapu la ed saman ya oras.
23 Natan, sanen sikatoy linmoob ed abung na manuley tan anengneng to iray managtogtog na plauta tan saray totoo a maingal,
24 inkuan nen Jesus ed sikara: “Paway kayo, ta ag-inatey so ugaw a bii, noagta nanaugip labat.” Lapud saya et sikatoy inelek-elekan da.
25 Sanen apapaway to la iray totoo, sikatoy linmoob tan binembenan to so lima na ugaw, tan sikatoy binmangon.
26 On, say balita nipaakar ed saya so kinmayat ed saman ya interon lugar.
27 Sanen ondadalan si Jesus, tinmumbok ed sikato so duaran bulag a lalaki, ya oniay iyeeyag da: “Anak nen David, kasian mo kami.”
28 Sanen akaloob la ed abung, sikatoy inasinggeran na saraman a bulag a lalaki, tan tinepetan ira nen Jesus: “Manisia kayo a nayarian kon gawaen iya?” Inmebat ira ed sikato: “On, Katawan.”
29 Diad saman et diniwit to iray mata ra, a kuan to: “Unong ed pananisia yo et nagawa itan ed sikayo.”
30 Diad saman et akanengneng la ra. Niarum ni, sikaray binilibilin nen Jesus, a kuan to: “Agyon balot ipapaamta iya ed anggan siopa.”
31 Balet kapaway da et imbalita ra ed saman ya interon lugar so nipaakar ed sikato.
32 Natan sanen onla la ra, nia! inyakar na totoo ed sikato so sakey ya emel a lakin sinelepan na demonyo,
33 tan sanen apapaway lay demonyo et akapansalita la so laki. Et nikelawan iray totoo tan inkuan da: “Anggapo nin balot so anengneng ed Israel a singa saya.”
34 Balet inkuan na saray Fariseo: “Papapawayen to iray demonyo diad panamegley na samay manuley na saray demonyo.”
35 Tan niliber nen Jesus so amin a syudad tan baryo, a nambabangat dia ed saray sinagoga ra tan impupulong to so maong a balita na panarian tan pinapaabig to so amin a klase na sakit tan amin a klase na beblay.
36 Sanen anengneng to iray totoo, sikaray naabagey to, lapud singa ra kinatatan tan pinaulyanan a karnero ya andian na managpastol.
37 Insan imbaga to ed saray disipulo to: “On, dakel so aanien, balet daiset so mankikimey.
38 Mikasi kayo sirin ed Katawan na panag-ani a mangibaki na saray mankimey ed aanien to.”
