Mateo 15:1-39
15 Diad saman et walaray Fariseo tan eskriba a nanlapud Jerusalem ya inmasingger ed si Jesus, a kuan da:
2 “Akin et susumlangen na saray disipulom so tradisyon na totoo nensaman? Alimbawa, agda uurasan iray lima* ra antis iran mangan.”
3 Sikatoy inmebat ed sikara: “Akin a susumlangen yo met so ganggan na Dios lapud tradisyon yo?
4 Alimbawa, imbaga na Dios ya, ‘Igalang mo so amam tan inam,’ tan, ‘Say mansalita na mauges ed ama odino ina to et nepeg ya ompatey.’
5 Balet ibabaga yo, ‘Siopaman a mangikuan ed ama odino ina to: “Antokaman a walad siak a napinabangan mo et sakey a regalon nidedika la ed Dios,”
6 agto la nepeg ya igalang so ama to.’ Kanian, ginawa yon andi-kakanaan so salita na Dios lapud tradisyon yo.
7 Sikayoran mansimpisimpitan, matukotukoy so impropesiya nen Isaias nipaakar ed sikayo, sanen inkuan to,
8 ‘Sayan totoo et igagalang da ak ed saray bibil da, balet arawrawi ed siak so kapusoan da.
9 Anggapoy kakanaan na pandadayew da ed siak, ta saray doktrinan ibabangat da et saray ganggan na totoo.’”
10 Diad saman et pinaasingger to iray totoo tan inkuan to ed sikara: “Dengel kayo tan talosan yo so kabaliksan na saya:
11 Say mandutak ed sakey a too et aliwan say onloob ed sangi to, noag say ompaway ed sangi to.”
12 Insan dinmago iray disipulo tan inkuan da ed sikato: “Amtam ta ya asakitan iray Fariseo ed imbagam?”
13 Et sikatoy inmebat: “Balang tanaman ya ag-intanem nen Amak a walad tawen et nabagot.
14 Paulyan yo ra labat. Sikaray bulag a manangigiya. Sirin, no itabin na bulag so sakey nin bulag, napelag iran dua ed abot.”
15 Et inmebat si Pedro ed sikato: “Ipaliwawam pa ed sikami so ilustrasyon.”
16 Diad saya et inkuan to: “Kasin anggapo met ni pakatalos yo?
17 Agyo ta amta ya amin a bengatlan onloloob ed sangi et ondadalan ed saray pait tan ipapaway ed kasilyas?
18 Balet, amin a bengatlan ompapaway ed sangi et manlalapud puso, tan saratan so manudutak ed sakey a too.
19 Alimbawa, say puso so panlalapuan na saray mauges a panagkatunongan, panagpatey, pikakalugoran,* pilalawanan, panagtakew, palson panagtasi, panag-ayew.
20 Saraya so manudutak ed sakey a too, balet say agpanuras na lima antis a mangan et agmandutak ed sakey a too.”
21 Sanen tinmaynan diman si Jesus, sikatoy linma ed saray lugar na Tiro tan Sidon.
22 Tan nia! sakey a biin taga Fenicia* a nanlapud saratan a lugar so inmasingger tan inmakis a maksil, a kuan to: “Kasian mo ak, Katawan, Anak nen David. Say ana’kon bii et papairapen na demonyon sinmelep ed sikato.”
23 Balet agton balot inebatan. Kanian inmasingger iray disipulo to pian kerewen ed sikato: “Pataynan mo la, ta akis lan akis ya ontutumbok ed sikatayo.”
24 Et inkuan to: “Agak nibaki parad anggan siopa, noagta parad saray abalang a karnero ed abung na Israel.”
25 Balet inmasingger ed sikato imay bii, tan dinmakmomo, a kuan to: “Katawan, tulongan mo ak!”
26 Et sikatoy inmebat: “Agmanepeg ya alaen so tinapay na ugugaw insan ibuntok itan ed saray angkekelag nin aso.”*
27 Et inkuan na samay bii: “On, Katawan. Balet ta saray angkekelag nin aso et kakanen da iray mekmek a napepelag manlapud lamisaan na amo ra.”
28 Insan inmebat ed sikato si Jesus: “O bii, baleg so pananisiam. Nagawa ed sika so pirawat mo.” Tan diad saman ya oras et inmabig so anak to.
29 Kaalis nen Jesus diman, sikatoy linma ed asingger ed dayat na Galilea, tan sanen akatatdang la ed palandey, sikatoy yinmurong.
30 Insan inmasingger ed sikato so dakel a totoo, a walaray kaiba ran piley, lupoy, bulag, emel, tan dakel ni ra, tan ngalngali da la ra ibuntok diad salian to, tan pinaabig to ra,
31 kanian nikelawan iray totoo sanen anengneng da a mansasalita la iray emel tan manaakar la iray piley tan makakanengneng la iray bulag, tan inggloria ra so Dios na Israel.
32 Balet tinawag nen Jesus iray disipulo to tan inkuan to: “Nakakasian ko iray totoo, lapud taloy agew ko la ran kaiba tan anggapo lay naakan da, tan agko ra labay a pataynanen a narnarasan. Ompan onkapuy ira diad dalan.”
33 Ingen, inkuan ed sikato na saray disipulo: “Iner ed sayan nisulinek a pasen so pangalaan tayoy magenap a tinapay pian napesel so onian karakel na totoo?”
34 Diad saya et inkuan nen Jesus ed sikara: “Pigaran tinapay so awit yo?” Inkuan da: “Pitora, tan pigaran angkekelag a sira.”
35 Kanian, kayari ton pinayurong ed dalin iray totoo,
36 inala toy pitoran tinapay tan saray sira, tan kayari ton akisalamat, pinisagpisag to iratan tan imbunog to ed saray disipulo, insan imbunog da iratan ed totoo.
37 Tan angan iran amin tan napsel ira, tan saray sulok a pisagpisag ya atipon da et pitoran buksot, a napnapno.
38 Ingen ta saray angan et apat a libon lalaki, nilikud ed bibii tan ugugaw.
39 Tan sanen apasipot to la iray totoo, sikatoy linmugan ed baloto tan linma ed saray lugar ed Magadan.*
