Mateo 20:1-34

20  “Ta say panarian na katawenan et singa sakey a toon akankayarian na kaubasan, ya angabkabuasan a pinmaway pian mangupa na saray komikimey ed kaubasan to.  Sanen sikatoy akapipakna la ed saray komikimey ya upaan to ira na sakey a denario* ed sakey agew, imbaki to ra ed kaubasan to.  Et sanen sikatoy pinmaway met ed komatlon oras,* anengneng toy arum ya andian na trabaho a manalalagey labat diad tindaan;  tan inkuan to ed sikara, ‘Sikayo met, la kayo ed kaubasan, tan upaan ta kayo na manepeg.’  Kanian linma ra. Sikatoy pinmaway lamet ed komanem* tan ed komasiam ya oras* tan ontan lamet so ginawa to.  Diad kaunoran, nen koma-labinsakey ya oras,* sikatoy pinmaway tan aromog to ni arum a manalalagey labat, tan inkuan to ed sikara, ‘Akin a sanagew kayo lan akaalagey dia ya andian na trabaho?’  Inkuan da, ‘Ta anggapoy angupa ed sikami.’ Inkuan to ed sikara, ‘La kayo met sirin ed kaubasan.’  “Kasabi labi, inkuan na akankayarian na kaubasan ed manag-asikaso to, ‘Tawag mo iray komikimey tan iter mo ed sikara so upa ra, manlapud saramay unor ya anggad saramay unaan.’  Kasabi na saramay nankimey ed koma-labinsakey ya oras, angawat ira na sansakey a denario. 10  Kanian, sanen sinmabi iramay akauna, abaloan da a mas baleg so awaten da; balet say inyupa ed sikara et sansakey met a denario. 11  Kapangawat da ed satan et nannguronguro ra ed samay akankayarian na kaubasan 12  tan inkuan da, ‘Sarayay unor et sakey oras labat a nankimey, balet ta imparam ira ed sikami ran nankimey a sanagew diad mansasnit a petang!’ 13  Balet inebatan to so sakey ed sikara, ‘Kaaro, anggapoy ginawak a mauges ed sika. Agta say nampaknaan ta et sakey a denario? 14  Alam so betang mo tan la ka la. Labay kon iter ed sayan unor so upa a mipara ed upam. 15  Agta manepeg labat a gawaen koy labay ko ed saray kayarian kon dili? Odino makakaibeg ka* lapud angipanengneng ak na kamaongan?’ 16  Diad onian paraan et magmaliw ya unaan iray unor, tan magmaliw ya unor iray unaan.” 17  Natan sanen ontatdang lay Jesus ed Jerusalem, intagar to so labinduan disipulo ed sakey a pasen a siksikara labat tan legan iran walad dalan et inkuan to ed sikara: 18  “Nia! Ontatdang itayo ed Jerusalem, tan say Anak na too et iyawat ed saray manunan saserdote tan saray eskriba, tan sikatoy sentensiaan da na patey, 19  tan iyawat da ed saray totoo na nasyones pian elek-elekan tan sipsiplatan tan ipasak da, tan diad komatlon agew et sikatoy napaoli.” 20  Insan inmasingger ed sikato so asawa nen Zebedeo a kaiba so duaran anak ton lalaki, a dinmakmomo pian onkerew na sakey a bengatla. 21  Inkuan to ed sikato: “Antoy labay mo?” Et inmebat so ina: “Payurong mo pa iyay duaran ana’ko diad panarian mo, sakey diad nikawanan mo tan sakey diad nikawigim.” 22  Inmebat si Jesus: “Agyo amtay kekerewen yo. Nayarian yo kasi oninum ed kopa a ngalngalik la inuman?” Inkuan da ed sikato: “Nayarian mi.” 23  Inkuan to ed sikara: “Peteg ya oninum kayo ed kopak, balet sayay iyurong diad kawanan ko tan kawigik et aliwan siak so mandesisyon, noagta para itan ed saramay angiparaanan nen Amak ed satan.” 24  Sanen nadngelan iya na saray samplora, asyodotan ira ed sayan sanagi. 25  Balet tinawag ira nen Jesus tan inkuan to: “Amta yo a saray arari na saray nasyon et pakakatawan ed saray totoo ra tan uusaren na manunaan a totoo so autoridad da ed sikara. 26  Aliwan ontan balet ed sikayo, ta siopaman a labay toy magmaliw a manunaan ed sikayo et nepeg a magmaliw a lingkor yo, 27  tan siopaman a labay toy magmaliw ya unaan ed sikayo et nepeg a magmaliw ya aripen yo. 28  Singa say Anak na too a linma dia ya agpanlingkoran, noagta manlingkor tan iter toy kamarerwa to a panondon ed amayamay.” 29  Natan sanen ompaway la ra ed Jerico, tinmumbok ed sikato so dakel a totoo. 30  Et nia! walay duaran bulag ya akayurong ed gilig na dalan, tan sanen nadngel da ya ondadalan si Jesus, inmeyag ira, a kuan da: “Katawan, Anak nen David, kasian mo kami!” 31  Balet binano ira na totoo pian mandeen ira, ingen ta lalon inyeyag da: “Katawan, Anak nen David, kasian mo kami!” 32  Kanian tinmunday Jesus, tinawag to ra tan inkuan to: “Antoy labay yon gawaen ko ed sikayo?” 33  Inkuan da: “Katawan, lukasan moy kamataan mi.” 34  Lapud naabagey ira nen Jesus, diniwit toy kamataan da tan pinmawil a tampol so pakanengneng da, tan tinmumbok ira ed sikato.

Paimanod leksab

Mat 20:2 * Nengnengen so paimano ed leksab na Mat 18:24.
Mat 20:3 * Alas-9 na kabuasan, no igapo ed imbutay na agew.
Mat 20:5 * Alas-12 na kaagwan.
Mat 20:5 * Alas-3 na ngarem.
Mat 20:6 * Alas-5 na ngarem.
Mat 20:15 * Literal, “mauges so matam.”