Mateo 1:1-25

1  Say libro a mangisasalaysay ed bilay nen Jesu-Kristo,* ya anak nen David, ya anak nen Abraham:   Si Abraham so ama nen Isaac; si Isaac so ama nen Jacob; si Jacob so ama nen Juda tan saray agagi to;   si Juda so ama nen Perez tan Zera diad panamegley nen Tamar; si Perez so ama nen Hezron; si Hezron so ama nen Ram;   si Ram so ama nen Aminadab; si Aminadab so ama nen Naason; si Naason so ama nen Salmon;   si Salmon so ama nen Boaz diad panamegley nen Rahab; si Boaz so ama nen Obed diad panamegley nen Rut; si Obed so ama nen Jesse;   si Jesse so ama nen David ya ari. Si David so ama nen Solomon diad panamegley na asawa nen Urias;   si Solomon so ama nen Rehoboam; si Rehoboam so ama nen Abias; si Abias so ama nen Asa;   si Asa so ama nen Jehosafat; si Jehosafat so ama nen Jehoram; si Jehoram so ama nen Uzias;   si Uzias so ama nen Jotam; si Jotam so ama nen Ahaz; si Ahaz so ama nen Hezekias; 10  si Hezekias so ama nen Manases; si Manases so ama nen Amon; si Amon so ama nen Josias; 11  si Josias so ama nen Jeconias tan saray agagi to diad panaon a nibantak ed Babilonia iray Judio. 12  Diad Babilonia, si Jeconias so ama nen Sealtiel; si Sealtiel so ama nen Zorobabel; 13  si Zorobabel so ama nen Abiud; si Abiud so ama nen Eliakim; si Eliakim so ama nen Azor; 14  si Azor so ama nen Zadok; si Zadok so ama nen Aquim; si Aquim so ama nen Eliud; 15  si Eliud so ama nen Eleazar; si Eleazar so ama nen Matan; si Matan so ama nen Jacob; 16  si Jacob so ama nen Jose ya asawa nen Maria, ya angiyanak ed si Jesus a tatawagen a Kristo. 17  Sirin, amin a kailalakan manlapud si Abraham anggad si David et labin-apat a kailalakan, tan manlapud si David anggad sanen nibantak ed Babilonia iray Judio et labin-apat a kailalakan, tan manlapud inkibantak da ed Babilonia anggad say Kristo et labin-apat a kailalakan. 18  Balet onia so inkianak nen Jesu-Kristo. Sanen si Maria ya ina to et akisipanan lan miasawa ed si Jose, sikatoy nanlukon diad panamegley na masanton espiritu sakbay iran mankasakey. 19  Ingen, lapud matunong si Jose ya asawa* to tan agto labay a niiyan si Maria ed kababaingan, ninonot ton idiborsyo ya anggapoy makaamta. 20  Balet kayari ton ninodnonot irayan bengatla, nia! nampanengneng ed sikato so sakey ya anghel nen Jehova diad sakey a kugip, a kuan to: “Jose, anak nen David, agka natatakot a mangisempet ed asawam a si Maria, ta sikatoy nanlukon diad panamegley na masanton espiritu. 21  Sikatoy mangiyanak na sakey a laki, tan say ingaran mo ed sikato et Jesus, ta sikatoy mangilaban ed totoo to ed saray kasalanan da.” 22  Agawa irayan amin pian nasumpal so sinalita nen Jehova diad panamegley na propeta to, a kuan to: 23  “Nia! Say birhen so manlukon tan mangiyanak na sakey a laki, tan say ingaran da ed sikato et Emmanuel,” a say kabaliksan to no ipatalos et, “Walad Sikatayo So Dios.” 24  Insan binmangon si Jose tan ginawa to so ingganggan ed sikato na anghel nen Jehova, tan insempet toy asawa to. 25  Balet sikatoy agto inakdolan anggad sikatoy angiyanak na sakey a laki, tan say inngaran to ed ugaw et Jesus.

Paimanod leksab

Mat 1:1 * Odino, “say linya na kapolian nen Jesu-Kristo.”
Mat 1:19 * Unong ed kustombre na saray Judio, say sakey a lakin akisipanan a piasawaan et tatawagen lan asawa.