Mateo 14:1-36

14  Diad saman a mismon panaon et nadngelan nen Herodes,* say manuley na distrito,* so balita nipaakar ed si Jesus  tan inkuan to ed saray lingkor to: “Saya si Juan a Bautista. Sikatoy apaoli manlapud inaatey, kanian nagagawaan to iray makapanyarin gawa.”*  Ta impaerel nen Herodes si Juan tan impabalor to tan impaipriso to nisengeg ed si Herodias ya asawa nen Felipe ya agi to.  Ta sikatoy naynay a babagaan nen Juan: “Aliwan manepeg a sikatoy alaen mon asawa.”  Balet, anggano labay ton pateyen si Juan, sikatoy tinmakot ed totoo, lapud ipapasen dan propeta si Juan.  Balet sanen sinelebraan so agew na inkianak nen Herodes, sinmayaw ed saman so marikit nen Herodias tan apaliket ton maong si Herodes  kanian insipan ton iter so antokaman a kerewen na marikit.  Et diad impangisugsog nen ina to, inkuan to: “Iter mo ed siak so ulo nen Juan a Bautista ya akakarga ed bandihado.”  Anggaman nanermen so ari, ingganggan ton iter itan makasengeg ed saray sinambaan to tan ed saramay karungo to, 10  tan sikatoy angibaki tan impaputot toy ulo nen Juan diad prisoan. 11  Tan say ulo to et inkarga ed bandihado tan inter ed marikit, insan inawit to itan ed ina to. 12  Diad kaunoran, inala na saray disipulo to so bangkay to tan imponpon da, tan imbalita ra itan ed si Jesus. 13  Sanen nadngel iya nen Jesus, sikatoy tinmaynan diman a nambaloto tan linma ed nisulinek a pasen pian makapanbukbukor, balet sanen nadngelan itan na dakel a totoo, sikaray nanakar a tinmumbok ed sikato manlapud saray syudad. 14  Natan sanen sikatoy inmepas, anengneng to so dakel a totoo; tan naabagey to ra, tan pinaabig to iray mansasakit ed sikara. 15  Balet sanen asabi lay labi, inmasingger ed sikato iray disipulo to tan inkuan da: “Nisulinek iyan pasen tan onlalabi la. Ibakim la iray totoo, ta pian makakar ira ed saray baryo tan makasaliw iray naakan da.” 16  Balet inkuan nen Jesus ed sikara: “Agda la kaukolan so onalis. Ikdan yo ray naakan.” 17  Et inkuan da ed sikato: “Say wala labat ed sikatayo et limaran tinapay tan duaran sira.” 18  Inkuan to: “Awit yo iratan ed siak.” 19  Insan pinayurong to iray totoo diad karikaan tan inala to so limaran tinapay tan duaran sira, tan tinmangay ed tawen tan impabendisyonan to, tan kayari ton pinisagpisag iray tinapay, imbunog to iratan ed saray disipulo, insan imbunog iratan na saray disipulo ed saray totoo. 20  Kanian angan iran amin tan napsel ira, tan tinipon da iray sulok, ya apano so labinduan buksot. 21  Ingen saramay angan et ngalngalin limanlibo a lalaki, nilikud ed bibii tan ugugaw. 22  Kayari na satan, pinalugan to lan tampol iray disipulo to diad baloto tan pinauna to la ra diad biek, legan ton papasipoten iray totoo. 23  Et sanen apasipot to la iray totoo, sikatoy tinmatdang a bukor diad palandey pian manpikasi. Anggano lablabi la, sikatoy wadman ni a bukbukor to. 24  Natan et arawi la so baloto, a naiirapan itan lapud saray daluyon, ta susubaen ira na dagem. 25  Balet diad komapat a panaon na panagbantay* ed labi, nila to ra, a nanakar ed tapew na dayat. 26  Sanen sikatoy anengneng na saray disipulo a manaakar diad dayat, ataktakot ira, ya inkuan da: “Sakey iyan payawar!” Tan inmeyag ira lapud takot. 27  Balet tampol ya inkuan nen Jesus ed sikara: “Manpakpel kayo, ta siak iya. Agkayo natatakot.” 28  Et inmebat si Pedro ed sikato, a kuan to: “Katawan, no sika itan, paasingger mo ak ed sika, a manakar ak diad tapew na saray danum.” 29  Inkuan to: “Gala!” Diad saman et inmepas si Pedro ed baloto, tan nanakar ed tapew na saray danum tan dinmago ed si Jesus. 30  Balet lapud inimano toy maksil a dagem, sikatoy tinmakot, tan sanen onlelereg la et sikatoy inmeyag, a kuan to: “Katawan, isalba mo ak!” 31  Et inyunat a tampol nen Jesus so lima to tan inegnaan toy Pedro tan inkuan to ed sikato: “Sika a kulang na pananisia, akin et nanduaruwa ka?” 32  Tan sanen akasapat la ra ed baloto, tinmunda so maksil a dagem. 33  Insan dinmakmomo ed sikato iramay walad baloto, a kuan da: “Sika so peteg ya Anak na Dios.” 34  Tan sikaray akabaliw tan akasabi ed dalin na Genesaret. 35  Sanen sikatoy abidbir na saray lalaki ed saman a pasen, impasabi ra itan ed amin a lugar a walad kaliberliber, tan inyakar na totoo ed sikato so amin a mansasakit. 36  Tan akikaskasi ra ed sikato a nadiwit da labat komon so saloy na kawes to, tan amin iramay aniwit ed satan et sigpot ya inmabig.

Paimanod leksab

Mat 14:1 * Nengnengen so paimano ed leksab na Luc 3:1.
Mat 14:1 * “Manuley na distrito.” Literal, “tetrarka.” Sakey a prinsipe ed teritoryan nasasakopan na emperador na Roma.
Mat 14:2 * Odino, “saray milagro.”
Mat 14:25 * Nensaman et pinankapat na totoo so oras ed labi: Say primero et onggapo ed alas-6 anggad alas-9 na labi, say komadua et onggapo ed alas-9 anggad alas-12 na labi, say komatlo et onggapo ed alas-12 na labi anggad alas-3 na palbangon, insan say komapat et onggapo ed alas-3 anggad alas-6 na kabuasan.