Mateo 23:1-39
23 Insan nansalita si Jesus ed saray totoo tan ed saray disipulo to, a kuan to:
2 “Saray eskriba tan saray Fariseo so yinmurong ed yurongan nen Moises.
3 Kanian, amin ya ibabaga ra ed sikayo, gawa yo tan unor yo, balet agyo aaligen so kagagawa ra, ta say ibabaga ra et agda gagawaen.
4 Mamebedber ira na ambebelat ya awit tan ipapasakbat da iratan ed saray totoo, balet agda anggan labay a palemewan iratan diad panamegley na gamet da.
5 Amin a gawa ra et gagawaen da pian nanengneng na totoo, ta papalaparen da iray filacteria* ya isusulong da bilang salimbeng, tan paparukeyen da iray palagaygay na saray kawes da.
6 Labalabay day sankamanunaan a pasen diad saray ponsia tan no walara ed sinagoga et labalabay day onyurong ed arapan,
7 tan labalabay day paibano diad saray tindaan tan patawag na Rabbi* ed saray totoo.
8 Balet sikayo, agkayo patatawag na Rabbi, lapud saksakey so managbangat yo, bangta sikayon amin et sanaagi.
9 Niarum ni, agyo tatawagen ya ‘ama’* yo so siopaman a too diad dalin, ta saksakey so Ama yo, samay walad tawen.
10 Odino agkayo patatawag na ‘papangulo,’ ta saksakey so Pangulo yo, say Kristo.
11 Balet say sankamanunaan ed sikayo et nepeg a magmaliw a lingkor yo.
12 Siopaman a mangiyaatagey ed inkasikato et niyabeba, tan siopaman a mangiyaabeba ed inkasikato et niyatagey.
13 “Pakaskasi kayo la, sikayoran eskriba tan Fariseo a mansimpisimpitan! lapud sasaraan yo so panarian na katawenan ed saray totoo, ta sikayon mismo et agyo labay so onloob, tan aamperen yo iramay onloob la ditan.
14* ——
15 “Pakaskasi kayo la, sikayoran eskriba tan Fariseo a mansimpisimpitan! ta babaliwen yoy dayat tan dalin pian gawaen a proselita* so sakey, balet sano sikatoy magmaliw lan ontan, sikatoy gagawaen yon mas makanepegan ed Gehenna* nen say sikayo.
16 “Pakaskasi kayo la, sikayoran bulag a manangigiya, a mangibabagay, ‘No say pansambaan na sakey et diad templo, sikatoy aliwan obligado; balet no say pansambaan na sakey et diad balitok na templo, sikatoy obligado.’
17 Sikayoran makulangkulang tan bulag! Dinan so mas importante, say balitok odino say templo ya amasanto ed balitok?
18 Sakey ni, ‘No say pansambaan na sakey et diad altar, sikatoy aliwan obligado; balet no say pansambaan na sakey et diad samay apay ditan, sikatoy obligado.’
19 Sikayoran bulag! Dinan so mas importante, samay apay odino say altar a mamapasanto ed apay?
20 Kanian samay mansasamba diad altar et mansasamba ed satan tan diad amin a bengatlan walad tapew na satan;
21 tan samay mansasamba diad templo et mansasamba ed satan tan ed samay manaayam ditan,
22 tan samay mansasamba diad tawen et mansasamba diad trono na Dios tan ed samay manyudyurong ed satan.
23 “Pakaskasi kayo la, sikayoran eskriba tan Fariseo a mansimpisimpitan! ta iiter yo so kakaplo na yerbabuena tan eneldo tan kumino,* balet ta ibabaliwala yo so mas ambelat iran pamaakaran na Ganggan, salanti, say inkahustisya tan panangasi tan katooran. Nepeg irayan gawaen, balet agnepeg ya ibaliwala so arum niran bengatla.
24 Bubulag a manangigiya, a manasapit na ageyet balet ta mangaakmon na kamelyo!
25 “Pakaskasi kayo la, sikayoran eskriba tan Fariseo a mansimpisimpitan! lapud lilinisan yoy paway na kopa tan plato, balet ta diad dalem na saratan et napno na panagsamsam tan inkaalablabas.
26 Bulag a Fariseo, linisan mo nin unona so dalem na kopa tan plato pian magmaliw met a malinis so paway na satan.
27 “Pakaskasi kayo la, sikayoran eskriba tan Fariseo a mansimpisimpitan! ta singa kayo pinaputi iran lubok, a marakdakep ed paway balet ta diad dalem et napnoy pukepukel na inaatey a totoo tan amin a nengneng na karutakan.
28 Ontan met, ompapatnag kayon matunotunong diad pakanengneng na totoo, balet ta diad dalem et napno kayoy pansimpisimpitan tan kaugsan.
29 “Pakaskasi kayo la, sikayoran eskriba tan Fariseo a mansimpisimpitan! ta igagawaan yo na saray lubok iray propeta tan paparakepen yo iray pakanodnonotan a lubok na saray matunong,
30 tan ibabaga yon, ‘No nambilay kami la ed panaon na inmuunan atateng mi, agmi ra inibaan ya amaagus ed dala na saray propeta.’
31 Sirin, sikayon mismo so mamapaneknek ya ananak kayo na saramay amatey ed saray propeta.
32 No ontan sirin, pano yoy panagsukat ed saray kasalanan na inmuunan atateng yo.
33 “Sikayoran poli na saray maditan uleg, panon yo kasin nibatikan so panangukom na Gehenna?
34 Lapud saya, nia, ibakik ed sikayo iray propeta tan marunong a lalaki tan saray managbangat ed totoo. Say arum ed sikara et pateyen yo tan ipasak yo, tan say arum et siplatan yo diad saray sinagoga yo tan pasegsegangen yo diad kada syudad,
35 kanian sikayo so akankasalanan ed impamatedter ed amin a matunong a dala diad dalin, manlapud dala nen matunong ya Abel ya anggad dala nen Zacarias ya anak nen Baraquias, a pinatey yo ed baetan na santuaryo tan altar.
36 Tua kuan ko ed sikayo, Nagawa irayan amin ed sayan kailalakan.
37 “Jerusalem, Jerusalem, say managpatey na saray propeta tan managtupak na saramay nibaki ed sikato,—aminpiga a labay kon tiponen komon iray anak mo, a singa panitipon na nganak ed saray siwsiw to diad saray payak to! Balet agyo labay.
38 Nia! Paulyanan la na Dios ed sikayo so abung yo.
39 Ta ibagak ed sikayo, Agyo ak lan balot nanengneng manlapud natan anggad ibaga yon, ‘Narayew imay onsasabi ed ngaran nen Jehova!’”
Paimanod leksab
^ Mat 23:5
* Melag a pananginan a mankarga na apatiran kabiangan na Ganggan tan isusulong na saray Judion lalaki diad moling tan kawigin taklay da bilang salimbeng.
