Mateo 19:1-30
19 Kasumpal nen Jesus a sinalita iraya, sikatoy tinmaynan ed Galilea tan linma ed saray ketegan na Judea diad biek na Jordan.
2 Tinmumbok met ed sikato so dakel a totoo, tan pinaabig to ra diman.
3 Tan inmasingger ed sikato iray Fariseo pian suboken da, a kuan da: “Kasin manepeg ya idiborsyo na sakey a laki so asawa to ed anggan anton sengegan?”
4 Et sikatoy inmebat: “Agyo ta abasa a samay amalsa ed sikara diad gapo et ginawa to ran laki tan bii
5 tan inkuan to, ‘Nisengeg ed saya et taynan na laki so ama tan ina to tan iyamong* toy asawa to, tan sikaran dua et magmaliw a sakey a laman’?
6 Kanian aliwa la ran duara, noagta sakey a laman. Sirin, say impankasakey* na Dios, agnepeg a pansianen na too.”
7 Inkuan da ed sikato: “Akin balet et ingganggan nen Moises so pangiter na sakey a kasulatan na pangidiborsyo ed bii tan pamataynan ed sikato?”
8 Inkuan to ed sikara: “Lapud inkaawet na puso yo, inmabuloy si Moises ya idiborsyo yoy kaasawaan yo, balet ta diad gapo et aliwan ontan so kipapasen.
9 Ibagak ed sikayo a siopaman a lakin mangidiborsyo ed asawa to, ya aliwan makasengeg ed pilalawanan,* tan mangasawa na sananey et mankasalanan na pikakalugoran.”*
10 Inkuan ed sikato na saray disipulo: “No ontan so kipapasen na laki tan say asawa to, aliwan maabig sirin so mangasawa.”
11 Inkuan to ed sikara: “Aliwan amin a too et mangaawat ed sarayan salita, noagta saraman lambengat so angiteran ed satan.
12 Ta walaray eunoko manlapud inkianak da, tan walaray eunoko a ginawa na totoo bilang eunoko, tan walaray eunoko a ginawa ray inkasikaran eunoko nisengeg ed panarian na katawenan. Siopaman a makayarin mangawat ed saya, awaten to iya.”
13 Insan da inyakar ed sikato iray angkekelag ya ugugaw, ta pian itapew to ed sikara iray lima to tan ipikasi to ra; balet sikaray binano na saray disipulo.
14 Balet, inkuan nen Jesus: “Paulyan yo iray angkekelag ya ugugaw, tan agyo ra aamperen ya onasingger ed siak, ta saray akankayarian ed panarian na katawenan et singa sarayan ugugaw.”
15 Tan intapew toy lima to ed sikara insan la linma.
16 Et nia! walay sakey a lakin inmasingger ed sikato, a kuan to: “Managbangat, anto so maong a gawaen ko ta pian nawalaan ak na bilay ya andi-anggaan?”
17 Inkuan to ed sikato: “Akin a tetepetan mo ak no anto so maong? Saksakey so maong. Balet, no labay moy nawalaan na bilay, itultuloy mon unoren iray ganggan.”
18 Inkuan to ed sikato: “Dinan iratan?” Inkuan nen Jesus: “Nia, Agka mamapatey, Agka mikakalugoran, Agka mantatakew, Agka mantitila ed panagtasim,
19 Igalang mo so amam tan inam, tan, Arom so kaparam a too a singa ed sikan dili.”
20 Inkuan ed sikato na malangwer a laki: “Uunoren ko la irayan amin. Anto ni kulang ed siak?”
21 Imbaga nen Jesus ed sikato: “No labay mon anggapoy kulang ed sika, la ka tan ilakom iray kaykayarian mo tan iter mo ed saray mairap-bilay tan nawalaan ka na kayamanan ed tawen, tan gala, magmaliw kan patumbok ko.”
22 Sanen nadngel na malangwer a laki iyan salita, sikatoy tinmaynan a maer-ermen ta dakel so kaykayarian to.
23 Balet inkuan nen Jesus ed saray disipulo to: “Tua kuan ko ed sikayo a mairap ed sakey a mayaman a too so onloob ed panarian na katawenan.
24 Ibagak lamet ed sikayo, mas mainomay nin onlabot ed abot na dagum so sakey a kamelyo nen say pakaloob na sakey a mayaman a too ed panarian na Dios.”
25 Sanen nadngel itan na saray disipulo, abigbigla ra, a kuan da: “Siopa sirin so peteg a nilaban?”
26 Ninengneng ira nen Jesus tan inkuan to ed sikara: “Diad saray totoo et imposible iya, balet diad Dios et posible so amin a bengatla.”
27 Kanian inmebat si Pedro ed sikato: “Nia! Tinaynan mi lay amin a bengatla tan tinmumbok kami ed sika. Anto sirin so awaten mi?”
28 Inkuan nen Jesus ed sikara: “Tua kuan ko ed sikayo, Diad pamasimbalo* ed amin a bengatla, sano akayurong la so Anak na too ed maglorian trono to, sikayoran tinmumbok ed siak so onyurong met diad labinduan trono, pian mangukom ed labinduan tribu na Israel.
29 Tan balang sakey ya anaynan na kaabungan to odino agagi ton lalaki odino agagi ton bibii odino ama to odino ina to odino ananak to odino daldalin to nisengeg ed ngaran ko et mangawat na mas dakel ni tan manawir na bilay ya andi-anggaan.
30 “Balet dakel so unaan a magmaliw ya unor, tan unor a magmaliw ya unaan.
