Mateo 22:1-46
22 Bilang kaaruman ya ebat, si Jesus et angisalaysay lamet ed sikara na saray ilustrasyon, a kuan to:
2 “Say panarian na katawenan et aliling toy sakey a too, sakey ya ari, ya angiparaan na bansal na anak ton laki.
3 Tan imbaki toy ariripen to a manawag ed saramay inimbitaan ed bansal, balet agda labay so onla.
4 Sikatoy angibaki lamet na arum nin ariripen, a kuan to, ‘Ibaga yo ed saramay inimbitaan: “Nia! Angiparaan ak na panangan, saray baka tan pinataban ayayep ko et pinatey la, tan akaparaan lay amin a bengatla. Gali la ed bansal.”’
5 Balet ag-ira interesado, say sakey et linma ed uma to, say sananey et diad anapan to;
6 saray arum balet et siningkat da iray aripen to, tan minaltrato tan pinatey da ra.
7 “Et sinmanok a maong so ari, kanian imbaki to iray armada to tan pinatey da iramay amatey tan pinoolan day syudad da.
8 Insan inkuan to ed ariripen to, ‘Akaparaan la so bansal, balet agmakanepegan iramay inimbitaan.
9 La kayo sirin ed saray dalan a papaway ed syudad, tan imbitaan yo ed bansal so siopaman a naromog yo.’
10 Kanian linma iray ariripen diad saray dalan tan tinipon dan amin iray aromog da, mauges man odino maong, tan say kuarto parad saray seremonya na kasal et apano na saray akarungo diad lamisaan.
11 “Sanen linmoob so ari pian nengnengen iray bisita, anengneng to diman so sakey a too ya ag-akasulong na kawes a parad kasal.
12 Kanian inkuan to ed sikato, ‘Kaaro, panon kan akaloob dia ta agka akasulong na kawes a parad kasal?’ Et sikatoy ag-akaskasel.
13 Insan inkuan na ari ed saray lingkor to, ‘Balor yo iray lima tan sali to tan ibantak yo diad paway ya ambilbilunget. Diman so pannangisan to tan panngalatengetan na saray ngipen to.’
14 “Ta dakel so inimbitaan, balet daiset so apili.”
15 Diad saman et tinmaynan iray Fariseo tan nantotongtongan da no panon dan naerel ed panagsalita to.
16 Kanian imbaki ra ed sikato iray disipulo ra, kaiba iray kapartido nen Herodes, a kuan da: “Managbangat, amta mi a tuan amin so ibabagam tan ibabangat mo so dalan na Dios unong ed katuaan, tan anggapoy panangibiigbiig mo, ta agka onnenengneng ed itsura na too.
17 Ibagam pa sirin ed sikami, Antoy nikuan mo? Manepeg kasi so pambayar na buis ed Cesar odino andi?”
18 Balet, lapud amta nen Jesus so kaugsan da, inkuan to: “Akin et susuboken yo ak, sikayoran mansimpisimpitan?
19 Ipanengneng yo ed siak so sinsilyon ibabayar ed buis.” Et inter da ed sikato so sakey a denario.*
20 Tan inkuan to ed sikara: “Siopay akanlupa tan akanngaran ed saya?”
21 Inkuan da: “Si Cesar.” Insan inkuan to ed sikara: “Ibayar yo sirin ed Cesar iray bengatlan kien nen Cesar, balet dia ed Dios iray bengatlan kien na Dios.”
22 Et sanen nadngel da itan, mandinayew ira, tan sikatoy tinaynanan da tan linma la ra.
23 Diad saman ya agew et inmasingger ed sikato iray Saduceo, a mangibabagan anggapoy kioli, tan tinepetan da:
24 “Managbangat, inkuan nen Moises, ‘No walay sakey a lakin ompatey ya andian na ananak, say asawa to et nepeg ya asawaen na agi to tan mananak ira parad sikato.’
25 Natan et walay pitoran sanaagin lalaki diad sikami; tan samay panguloan et angasawa tan inatey, tan lapud andian na ilalak, say asawa to et inasawa na agi to.
26 Ontan met so agawa ed komadua tan ed komatlo, ya anggad samay komapito.
27 Diad kaunoran et inatey imay bii.
28 Kanian diad kioli, siopa ed pitora so magmaliw ya asawa na bii? Lapud amin da et nagmaliw ya asawa to.”
29 Inmebat si Jesus ed sikara: “Nalilingo kayo, lapud agyo amta so Kasulatan odino say pakapanyari na Dios,
30 ta diad kioli et agla ra mangasawa odino miasawa, noagta singa la ra anghel ed tawen.
31 No nipaakar ed kioli na saray inaatey, agyo ta abasa imay imbaga na Dios ed sikayo,
32 ‘Siak so Dios nen Abraham tan say Dios nen Isaac tan say Dios nen Jacob’? Sikato so Dios na saray mabilay, aliwan saray inaatey.”
33 Sanen nadngel itan na saray totoo, agaylay pandinayew da ed panagbangat to.
34 Sanen nadngelan na saray Fariseo ya apatunda ton mansalita iray Saduceo, nankakasakey iran linma bilang sakey a grupo.
35 Tan sakey ed sikara a marunong ed Ganggan so nantepet pian manubok ed sikato:
36 “Managbangat, dinan so sankaimportantian ed Ganggan?”
37 Inkuan to ed sikato: “‘Arom si Jehova a Dios mo ed interon pusom tan ed interon kamarerwam tan ed interon nonot mo.’
38 Saya so sankaimportantian tan unonan ganggan.
39 Say komadua a mipadpara ed saya et, ‘Arom so kaparam a too a singa ed sikan dili.’
40 Sayan duaran ganggan so basiyan na interon Ganggan, tan saray sulat na saray Propeta.”
41 Natan, sanen nantitipon iray Fariseo, tinepetan ira nen Jesus:
42 “Antoy nikuan yo nipaakar ed Kristo? Siopa so akan-anak ed sikato?” Inkuan da: “Si David.”
43 Inkuan to ed sikara: “Akin balet a si David, a pinuyanan,* et tinawag ton ‘Katawan’ so Kristo, a kuan to,
44 ‘Inkuan nen Jehova ed Katawan ko: “Yurong ka ed nikawanan ko angga ed iyan ko ed salian mo iray kakabusol mo”’?
45 Sirin, no sikatoy tinawag nen David a ‘Katawan,’ panon a nibagan sikatoy anak to?”
46 Et anggapoy anggan sakey a salitan niyebat da ed sikato, tan manlapu la ed saman ya agew et anggapo lay makpel a mantepet ni ed sikato.
