Mateo 28:1-20
28 Kayari na sabaton, sanen onliliwawa la diad unonan agew na simba, si Maria Magdalena tan samay sakey nin Maria so linma pian nengnengen da so lubok.
2 Tan nia! walay agawan maksil a yegyeg, ta linmeksab so anghel nen Jehova manlapud tawen tan inmasingger tan intulin to so bato, tan yinmurong ditan.
3 Say itsura to et singa kirmat, tan say kawes to et amputiputi a singa niebe.
4 On, lapud ataktakot ed sikato iray manbabantay, ginmiwgiw ira tan nagmaliw iran singa inatey.
5 Balet inkuan na anghel ed saray bibii: “Agkayo natatakot, ta amtak ya aanapen yo si Jesus a nipasak.
6 Anggapo la dia, ta apaoli la, unong ya imbaga to. Gali dia, nengneng yo iyay angiparukolan ed sikato.
7 Tan apura yoy onlan mangibaga ed saray disipulo to a sikatoy apaoli manlapud inaatey, tan nia! sikatoy unona la ed Galilea; tan sikatoy nanengneng yo diman. Nia! Imbagak la ed sikayo.”
8 Kanian, lapud takot tan panlikliket da, sikaray nanapuran tinmaynan ed pakanodnonotan a lubok, a binmatik ira ed saray disipulo to pian ibaga ra itan.
9 Tan nia! inabet ira nen Jesus tan inkuan to: “Maabig ya agew!” Sikaray inmasingger tan binembenan da iray sali to tan dinmakmomo ira ed sikato.
10 Insan inkuan nen Jesus ed sikara: “Agkayo natatakot! La kayo, ibaga yo ed saray agagik, ta pian onla ra ed Galilea, tan nanengneng da ak diman.”
11 Sanen wala la ra ed dalan, nia! arum ed saray guardia so linma ed syudad tan imbaga ra ed saray manunan saserdote so amin a bengatlan agawa.
12 Tan akitipon iraya ed saray mamasiken tan nantotongtong ira, insan inikdan da na dakel a pilak iramay sundalo
13 tan inkuan da: “Oniay ibaga yo, ‘Nen labi et sinmabi iray disipulo to tan sikatoy tinakew da legan kamin nanaugip.’
14 Tan no narengelan iya na gobernador, agkayo mapaga ta sikatoy kombinsien mi.”
15 Kanian inawat da iray pilak tan ginawa ra so ingganggan ed sikara; tan onian salita so kinmayat ed limog na saray Judio anggad sayan panaon.
16 Balet, saray labinsakey a disipulo et linma ed Galilea diad samay palandey ya imbaga nen Jesus a laen da,
17 tan sanen sikatoy anengneng da, dinmakmomo ira, balet say arum et nanduaruwa.
18 Tan inmasingger si Jesus tan inkuan to ed sikara: “Amin a pakauley ed tawen tan diad dalin so niiter la ed siak.
19 Onla kayo sirin tan ibangat yo iray totoo ed amin a nasyones pian magmaliw iran disipulok, a bautismoan yo ra ed ngaran* na Ama tan ed ngaran na Anak tan ed ngaran na masanton espiritu,
20 ya ibangat yo ran mangunor ed amin a bengatlan ingganggan ko ed sikayo. Tan nia! wala ak ed sikayo ed amin ya agew anggad sampot a panaon na mundo.”
