“Mu Filwe Fela, Mu Fane Fela”

“MU FILWE fela, mu fane fela.” (Mateu 10:8) Jesu na laezi baapositola ba hae cwalo ha n’a ba lumile ku yo kutaza taba ye nde. Kana baapositola ne ba latelezi yona taelo yeo? Ee, ne ba zwezipili ku i latelela mane Jesu niha s’a zwile fa lifasi.

Ka mutala, Simoni ya n’a banga wa mabibo ha n’a boni kuli baapositola bo Pitrosi ni Joani ba na ni m’ata a ku eza limakazo, a ba tiseza mali kuli ba mu fe kwa mata ao. Kono Pitrosi a kalimela Simoni kuli: “Mali a hao a shwe ni wena, kakuli u hupuzi kuli mpo ye fiwa ki Mulimu, u ka ipumanela yona ka mali.”—Likezo 8:18-20.

Muapositola Paulusi na bonisize moya o swana ni wa Pitrosi. Paulusi n’a kona ku imeza mizwale ba hae ba Sikreste ba mwa Korinte ku za mali. Kono ku fita ku eza cwalo, a ipelekela ka mazoho kuli a ipilise. (Likezo 18:1-3) Kacwalo, n’a kona ku bulela ka buikolwiso kuli u kutalize taba ye nde kwa Makorinte a “sa fumani se siñwi kwateñi.”—1 Makorinte 4:12; 9:18.

Ka bumai, buñata bwa ba ba ipapata ku ba balateleli ba Kreste ha ba bonisi moya wo wa ku tabela ‘ku fana fela.’ Mane ba bahulu ba bulapeli ba bañata mwa Krestendomu ba “luta batu ka bubeleki.” (Mika 3:11) Ba bañwi ba ba bahulu ba bulapeli se ba fumisizwe mane ki mali a kungushuzwi kwa mitapi ya bona. Mwa 1989, muluti yo muñwi wa keleke mwa America n’a atulezwi ku pika lilimo ze 45 mwa tolongo. Kabakalañi? N’a “bukulanga batu ba hae mali a madola a matuna-tuna ni ku itusisa a mañwi kwa ku leka mandu, limota, ku ya kwa lipumulo mane ni ku lekela mushini o tisa moya o bata mwa ndu ya linja.”—People’s Daily Graphic, October 7, 1989.

Mwa Ghana, mutende o bizwa Ghanaian Times wa la March 31, 1990, u biha kuli muprisita yo muñwi wa Katolika n’a ngile mali a n’a kolekilwe fa sebelezo ye ñwi ya keleke ni ku a fukumunena be ne ba kopani. Mutende wo u biha kuli: “Libaka n’e li la kuli, ka ku ba batu ba bahulu ne ba lukela ku zwisa mali a matuna-tuna.” Ha ku komokisi kuli likeleke ze ñata mane li lika ku pepeza batu ba zona ku ba ni mukwañuli, ka ku ba susueza ku eza lipapali za njuka ni lika ze ñwi kuli ba fumane mali.

Ka ku fapahana, Lipaki za Jehova ba lika ka t’ata ku likanyisa Jesu ni balutiwa ba hae ba pili. Ha ba na baluti ba ba hola mali. Paki yo muñwi ni yo muñwi u na ni buikalabelo bwa ku kutaza ‘evangeli ya mubuso’ ku ba bañwi. (Mateu 24:14) Kacwalo, Lipaki ba ba fitelela 6 milioni mwa lifasi kaufela ba sweli ku tiseza batu “mezi a bupilo” ku si na tifo. (Sinulo 22:17) Ka nzila yeo, nihaiba ba ba “si na mali” b’a kona ku tusiwa ki lushango lwa Bibele. (Isaya 55:1) Nihaike musebezi wa bona mwa lifasi kaufela u lifelwa ka linubu za ka ku itatela, ha ba kupelelangi mali. Ka ku ba likombwa za Mulimu za niti, ha ba ‘lekisi Linzwi la Mulimu,’ kono ba li bulela ‘ka niti, Mulimu mw’a ba fezi lona.’—2 Makorinte 2:17, NW.

 Kono cwale, ki kabakalañi Lipaki za Jehova ha ba tabela ku tusa ba bañwi ka buitomboli bwa bona? Ba susuezwa kiñi? Kana ku fana fela ku talusa kuli kipeto ba tusa fela ba sa fiwi mupuzo?

Kalabo kwa Kañi Ya Satani

Bakreste ba niti kacenu ba susuezwa sihulu ki takazo ya ku tabisa Jehova—isi ya ku fuma. Kacwalo ba kona ku fa kalabo kwa kañi ye ne tisizwe ki Satani Diabulosi lilimo ze mianda-nda kwamulaho. Satani n’a shemaetile Jehova bakeñisa munna ya lukile ya bizwa Jobo, ka ku buza kuli: “Kikuli Jobo u saba Mulimu fela, a sa kutelwi ki se siñwi?” Satani n’a akaleza kuli Jobo u sebeleza Mulimu bakeñisa kuli Mulimu wa mu babalela. Satani a piha kuli haiba Jobo n’a ka amuhiwa tutu ya hae, n’a ka nyefula Mulimu inz’a li fapil’a Hae!—Jobo 1:7-11.

Kuli a alabe kañi yeo, Mulimu a tuhelela Satani ku lika Jobo, ka ku bulela kuli: “Z’a luwile kaufela ni ku file zona.” (Jobo 1:12) Ki sifi se ne si zwile mwateñi? Jobo n’a bonahalize Satani ku ba lihata. Ku si na taba ni makayamana a n’a mu kenezi, Jobo n’a zwezipili ku sepahala. N’a bulezi kuli: “Ni ka bulela kuli ni tokwa mulatu, mane ku isa kwa lifu la ka.”—Jobo 27:5, 6.

Balapeli ba niti kacenu ba na ni mubonelo o swana ni wa Jobo. Ha ba sebelezi Mulimu kabakala sifumu.

Mpo ya Mulimu ya Sishemo Ye Fiwa Fela

Libaka le liñwi Bakreste ba niti ha ba ‘fana fela’ ki la kuli ni bona ba “filwe fela” ki Mulimu. Batu ba mwa butanga bwa sibi ni lifu bakeñisa sibi sa Adama yena mushemi wa luna wa pili. (Maroma 5:12) Ka lilato, Jehova a luma mwan’a hae ku to shwa lifu la sitabelo—ili nto ya teko ye tuna ku Mulimu. Kaniti, batu ha ba na tukelo ya ku fiwa mpo yeo. Batili, ki mpo fela ye zwa ku Mulimu.—Maroma 4:4; 5:8; 6:23.

Sina mo ku ñolezwi kwa Maroma 3:23, 24, Paulusi kacwalo a bulelela Bakreste ba ba tozizwe kuli: “Kaufela ba ezize sibi, mi ba kauhezwi kwa kanya ya Mulimu; mi ba beiwa ba ba lukile fela, ka sishemo sa hae, ka ku liululwa ki Jesu Kreste.” Ba ba na ni sepo ya ku pila ku ya ku ile fa lifasi ni bona ba amuhela mpo ye fiwa fela yeo. Mpo yeo i kopanyeleza tohonolo ya ku balwa kuli ki ba ba lukile mi ki balikani ba Jehova.—Jakobo 2:23; Sinulo 7:14.

Sitabelo sa Kreste sa tiululo si konisa hape Bakreste kaufela ku sebeza sina likombwa za Mulimu. Muapositola Paulusi n’a ñozi kuli: “Yona Evangeli ye ni ezizwe sikombwa sa yona, ka mpo ya sishemo sa Mulimu.” (Maefese 3:4-7) Ka ku ba ba ba bizelizwe kwa bukombwa b’o ka tukiso ya mpo ye n’e sa ba swaneli kamba ye ne ba si ke ba fumana, likombwa za niti za Mulimu ha ba tokwi ku libelela ku lifiwa lika za kwa mubili ha ba bulelela ba bañwi za mpo yeo.

 Tibelelo ya Bupilo Bo Bu Sa Feli—Kana Ha I Susuezi Buitati?

Kana seo cwale si talusa kuli Mulimu u tokwa Bakreste ku mu sebeleza fela ba si na sepo ya ku fiwa mupuzo? Kutokwa, kakuli muapositola Paulusi n’a bulelezi balumeli sina yena kuli: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.” (Maheberu 6:10) Jehova hasi ya si ka luka. (Deuteronoma 32:4) Ka ku fapahana, Jehova ki yena “ya fa ba ba mu bata mupuzo.” (Maheberu 11:6) Kono kana sepiso ya bupilo bo bu sa feli mwa Paradaisi ha i tahisi buitati?—Luka 23:43.

Kutokwa ni hanyinyani. Libaka le liñwi kikuli, takazo ya ku pila ku ya ku ile mwa paradaisi fa lifasi i simuluha ku Mulimu ka sibili. Ki yena ya n’a tahisize tibelelo yeo ku bosinyalana ba pili. (Genese 1:28; 2:15-17) Adama ni Eva ha ne ba latehezwi ki tibelelo yeo, Mulimu a i tahisa sinca hape kwa bana ba bona. Kacwalo Mulimu u sepisa mwa Linzwi la hae kuli “ze bupilwe li ka lukululwa kwa butanga bwa ku bola, kuli li fiwe tukuluho ya kanya ya bana ba Mulimu.” (Maroma 8:21) Kacwalo kwa swanela luli kuli Bakreste kacenu, ba ‘talime mupuzo’ sina mwa n’a ezelize Mushe wa ikale. (Maheberu 11:26) Mulimu h’a fi mupuzo wo sina kweta. U’ fa ka lilato la kwa pilu ku ba ba mu sebeleza. (2 Matesalonika 2:16, 17) Ka ku swana, “luna lwa lata, kakuli Yena u lu latile pili.”—1 Joani 4:19.

Mulelo O Munde wa ku Sebeleza Mulimu

Nihakulicwalo, Bakreste kacenu ba lukela ku tatubisisa ka nako kaufela milelo ya bona ya ku sebeleza Mulimu. Kwa Joani 6:10-13, lu bala kuli Jesu ka makazo n’a fepile batu ba ba fitelela 5,000. Hamulaho wa seo, ba bañwi ba kala ku swalisana ni Jesu kabaka fela la buitati. Jesu a ba bulelela kuli: “Ha mu ni bata, hasi kuli mu boni limakazo, kono kikuli mu cile buhobe, mane mwa kula.” (Joani 6:26) Lilimo ze bat’o eza 30 hamulaho, Bakreste ba ba ineezi ni bona ne ba sebelelize Mulimu “isi ka lipilu ze nde.” (Mafilipi 1:17) Ba bañwi ‘ba ne ba sa yi ka manzwi a pilisa a Jesu Kreste,’ mane ne ba batile mikwa ya ku fumanelanga fateñi lika za kwa mubili mwa sango sa bona ni Bakreste.—1 Timotea 6:3-5.

Kacenu, Mukreste ya sebeleza fela kuli a to pila mwa paradaisi ku ya ku ile ni yena u kona ku sebeza kabakala buitati. Kwa nalulelule, u kona ku fita fa ku palelwa ku zwelapili. Bakeñisa kuli muinelo wa linto wa Satani u bonahala inge u ngile nako ye telele ku fita mo ne ku hupulelwa, mutu y’o u kona ku “katala” ni ku ikutwa kuli mafelelezo a liyehile. (Magalata 6:9) U kona nihaiba ku filikana bakeñisa lika za kwa mubili za na itombozi. Jesu u lu hupulisa kuli: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.” (Mateu 22:37) Ee, mutu ya sebeleza Mulimu kabakala lilato h’a tomeli sebelezo ya hae mululwani. U ikatulela ku sebeleza Jehova ku ya ku ile! (Mika 4:5) H’a inyazi bakeñisa buitomboli bwa n’a ezize kaufela mwa sebelezo ya hae ku Mulimu. (Maheberu 13:15, 16) Lilato la ku lata Mulimu li mu susueza ku beya za Mulimu pili mwa bupilo bwa hae.—Mateu 6:33.

Kacenu, balapeli ba niti ba ba fitelela 6 milioni ‘ba kopana i nze ba lata,’ mwa sebelezo ya Jehova. (Samu 110:3) Kana mu ba bañwi ba ku bona? Haiba ha mu ba ku bona, mu nahanisise zeo Mulimu a fa: zibo ye kenile ya niti; (Joani 17:3) tukuluho kwa butanga bwa lituto za bulapeli bwa buhata; (Joani 8:32) sepo ya ku pila ku ya ku ile. (Sinulo 21:3, 4) Lipaki za Jehova b’a kona ku mi tusa ku ituta mo mu kona ku fumanela zeo kaufela ku Mulimu—ku si na tifo.

[Manzwi a fa likepe 22]

Bakreste ba niti kacenu ba susuezwa sihulu ki takazo ya ku tabisa Jehova —isi ya ku fuma

[Siswaniso se si fa likepe 21]

Mpo ya Mulimu ye filwe fela ya tiululo i susueza Bakreste ku bulela taba ye nde ku si na tifo