Mu ye kwa litaba za mwahali

Mu ye kwa litaba za mwahali

Lipuzo Ze Zwa kwa Babali

Lipuzo Ze Zwa kwa Babali

 Lipuzo Ze Zwa kwa Babali

Jehova n’a lumelelize Maisilaele, batanga ba hae ba kwaikale, ku nyala libali, kono cwale ha sa lumeleza. Kana lipimo za hae z’a cinca-cinca?

Jehova ha si ka cinca mubonelo wa hae wa ku nyala libali. (Samu 19:7; Malaki 3:6) Ne si nto ya n’a lukiselize batu ku zwa kwa makalelo, mi niheba kacenu haki tukiso ya hae. Ha n’a bupile Eva ku ba musal’a Adama, Jehova na bonisize kuli sipimo sa hae n’e li sa kuli munna a be ni musali a li muñwi. “Kamukwaocwalo munna u ka tokolomoha ndat’ahe ni m’ahe mi u ka kumalela musal’a hae; mi ba ka ba nama i li ñwi fela.”—Genese 2:24.

Jesu Kreste ha n’a li fa lifasi, na kutezi ku bulela sipimo seo ha n’a alaba be ne ba mu buza ka za telekano ni ku kena hape mwa linyalo. N’a ize: “Ha mu si ka bala kuli Ya n’a ba ezize kwa simuluho, n’a ezize munna ni musali? Mi a li: Kabakaleo, munna u ka tuhela ndat’ahe ni m’ahe, a kumalele musal’a hae, mi ba babeli ikaba nama i liñwi fela. Kuli mane ha ba sa li ba babeli, kono ki nama i liñwi fela.” Jesu a ekeza kuli: “Ya leleka musal’a hae, konji ka mulatu wa buhule, mi a nyala yo muñwi, wa buka.” (Mateu 19:4-6, 9) Hape, seo si bonisa hande kuli ku ba ni basali ba bañata ni kona ki bubuki.

Kacwalo, ki kabakalañi ku nyala libali ha ne ku lumelezwa kwaikale? Mu si libali kuli Jehova n’a si ka simulula kezo yeo. Wa pili ku bulelwa mwa Bibele kuli n’a na ni basali ba ba fitelela a li muñwi n’e li Lameke, ya n’a simuluhile ku Kaine. (Genese 4:19-24) Jehova ha n’a tahisize Munda mwa miteñi ya Nuwe, Nuwe ni bana ba hae ba balalu ne ba na ni musali a li muñwi kaufel’a bona. Be ne ba nyezi libali kaufela ne ba shwile mwa Munda.

Lilimo-limo hasamulaho, Jehova ha n’a ketile Maisilaele ku ba sicaba sa hae, ba bañwi ne se ba nyezi kale libali, nihaike ka mo ku bonahalela, ku ba ni musali a li muñwi fela ki kona ko ne ku atile. Mulimu n’a sa tokwi kuli mabasi a n’a ni basali ba ba fitelela a li muñwi a shandauke. Kono n’a file milao ye tiile ka za kezo yeo.—Exoda 21:10, 11; Deuteronoma 21:15-17.

Ku tuhelelwa kwa libali k’o n’e li fela kwa swalelele, sina mo ku bonisezwa ki za n’a bulezi Jesu ka za sipimo sa kwa makalelo sa Jehova ka za linyalo. Hape ku boniswa ki za n’a ñozi muapositola Paulusi ka ketelelo ya moya wa Mulimu o kenile. N’a ize: “Munna ni munna a be ni musal’a hae, mi musali ni musali a be ni munn’a hae.” (1 Makorinte 7:2) Paulusi hape na susumelizwe ka moya ku ñola kuli munna kaufela ya ketiwa ku ba muokameli kamba mutang’a bukombwa mwa puteho ya Sikreste u lukela ku ba “munna wa musali a li muñwi.”—1 Timotea 3:2, 12; Tite 1:6.

Kacwalo, tumelezo ya Mulimu ya libali ne i felile ha ne ku tomilwe puteho ya Sikreste lilimo ze bat’o ba z’e 2,000 kwamulaho. Ka nako yeo, sipimo sa linyalo sa kutela ku ba mo ne si inezi kwa makalelo Mulimu ha n’a bupile munna ni musali: munna a be ni musali a li muñwi, musali a be ni munna a li muñwi. Ki sona sipimo se ba latelela batanga ba Mulimu mwa lifasi kamukana.—Mareka 10:11, 12; 1 Makorinte 6:9, 10.