1. Ania ti naisuro kenka maipapan iti Namarsua kadatayo?

NO NAPADAKKELKA kas Saksi ni Jehova, mabalin a naammuam ti maipapan ken Jehova sipud idi ubingka. Naisuro kenka nga isu ti Namarsua, makaay-ayo ti personalidadna, ken adda naayat a panggepna para iti sangatauan.​—Gen. 1:1; Ara. 17:24-27.

2. Ania ti pangibilangan ti dadduma kadagidiay mamati iti Namarsua?

² Ngem adu a tattao ti saan a mamati nga adda ti Dios, nangruna no maibaga nga isu ti Namarsua. Imbes ketdi, mamatida nga aksidente a timmaud lattan ti biag, sa ibagbagada a ti simple a porma ti biag ket nagbalin a mas komplikado a porma ti biag. Nangato ti adal ti dadduma kadagita a tattao. Mabalin nga ibagada a napaneknekan ti siensia a kamali ti Biblia ket dagiti laeng ignorante, di nakapageskuela, wenno nalaka a maallilaw ti mamati iti Namarsua.

3. Apay a napateg a pabilgentayo ti pammatitayo?

³ Ti kadi ibagbaga ti dadduma nga edukado a tattao ti mamagduadua kadatayo a ni Jehova ti nadungngo a Namarsua kadatayo? Agdepende unay dayta iti rason no apay a patientayo a ni Jehova ti Namarsua. Gapu kadi ta naibaga kadatayo a patientayo dayta wenno gapu ta inusigtayo a mismo dagiti ebidensia? (1 Cor. 3:12-15) Kasanoman kabayagtayon a Saksi ni Jehova, masapul nga itultuloytayo a pabilgen ti pammatitayo. Iti kasta, saantayo a maallilaw iti “pilosopia ken ulbod a panagrasrason” nga isursuro dagiti tattao a kontra iti Sao ti Dios. (Col. 2:8; Heb. 11:6) Tapno maaramidtayo dayta, pagsasaritaantayo iti daytoy nga artikulo (1) no apay nga adu ti saan a mamati iti Namarsua, (2) no kasano a mapabilegmo ti pammatim ken Jehova,  ti Namarsua kenka, ken (3) no kasano a mapagtalinaedmo a natibker ti pammatim.

4. Sigun iti Hebreo 11:1 ken footnote, ania ti nakaibatayan ti pudno a pammati?

⁴ Ipapan ti dadduma a tattao a ti pammati ket basta laeng panamati iti maysa a banag nga awan ti ebidensia. Ngem sigun iti Biblia, dayta ket saan a pudno a pammati. (Basaen ti Hebreo 11:1 ken footnote.) Tandaanantayo a ti pammati kadagiti adda ngem di makita, a kas kada Jehova, Jesus, ken iti nailangitan a Pagarian, ket naibatay iti makakombinsir nga ebidensia. (Heb. 11:3) Imbaga ti maysa a Saksi a biochemist: “Ti pammati[tayo] ket saan a basta panamati lattan a mangipuera kadagiti kinapudno ti siensia.”

5. Apay a patien ti adu a tattao a basta laeng timmaud ti biag nga awan ti Namarsua?

⁵ Mabalin a maisaludsodtayo, ‘No adda ti makakombinsir nga ebidensia maipapan iti Namarsua, apay nga adu a tattao ti mamati a saan a ti Dios ti nagtaudan ti biag?’ Dida ngamin pulos inusig dagiti ebidensia. Imbaga ni Robert, a maysa itan a Saksi ni Jehova, “Idiay eskuelaan, saan a pulos naisuro ti panamarsua, isu nga impagarupko a saan nga agpaypayso dayta. Sa la namatiak a ti Dios ti Namarsua iti amin idi 22 ti tawenko ta adda nakasaritak a Saksi ni Jehova ken naammuak dagiti lohikal ken makakombinsir nga argumento manipud iti Biblia.” *​—Kitaen ti kahon a “ Pakaasi Kadagiti Nagannak.”

6. Apay a saan a patien ti dadduma nga adda Namarsua?

⁶ Saan a mamati ti dadduma iti Namarsua  ta ibagbagada a mamatida laeng iti makitada. Ngem patienda met ti bambanag a saan a makita kas iti grabidad gapu ta adda ebidensia nga agpaypayso dayta. Ti pammati a nadakamat iti Biblia ramanenna ti ebidensia a “talaga nga adda” ti dadduma a banag a “saan a makita.” (Heb. 11:1) Agkasapulan iti panawen ken panagregget ti panangusigtayo kadagiti ebidensia, ket saan nga agregregget ti adu a tattao a mangaramid iti dayta. Ti tao a saan a mangusig kadagiti ebidensia mabalin nga agkonklusion nga awan ti Dios.

7. Amin kadi nga edukado a tattao ket saan a mamati a ti Dios ti Namarsua iti uniberso? Ilawlawag.

⁷ Idi inusig ti dadduma a sientista dagiti ebidensia, nakombinsirda a ti Dios ti nangparsua iti uniberso. * Kas ken Robert a nadakamat  itay, impagarup lattan ti dadduma nga awan ti Namarsua ta saan a maisursuro ti panamarsua iti unibersidad. Ngem ti adu a sientista naam-ammoda ken ay-ayatenda itan ni Jehova. Kas kadagita a sientista, masapul a pabilgentay amin ti pammatitayo iti Dios aniaman ti nadanontayo nga adal. Awan ti sabali a makaaramid iti dayta para kadatayo.

8-9. (a) Ania a saludsod ti usigentayo? (b) Kasano a makatulong kenka ti panangadalmo kadagiti parsua?

⁸ Kasano a mapabilegmo ti pammatim iti Namarsua? Usigentayo ti uppat a pamay-an.

⁹ Adalem dagiti parsua. Mapabilegmo ti pammatim iti Namarsua no obserbaram dagiti animal, mula, ken bituen. (Sal. 19:1; Isa. 40:26) No ad-adda nga adalem dagita, ad-adda met a makombinsirka a ni Jehova ti Namarsua. Masansan nga adda dagiti artikulo kadagiti publikasiontayo a mangilawlawag iti nadumaduma a parsua. Basaem dagitoy nga artikulo uray no marigatanka a mangtarus kadagita. Tarusam laeng ti kabaelam. Ken dimo liplipatan a buyaen manen iti website-tayo a jw.org dagiti nagpipintas a video maipapan iti panamarsua a naiparang kadagiti rehional a kombensiontayo iti nabiit pay a tawtawen.

10. Mangted iti pagarigan no kasano a paneknekan dagiti parsua nga adda Namarsua. (Roma 1:20)

¹⁰ No adalem dagiti parsua, siputam a naimbag dagiti masursurom maipapan iti Namarsua. (Basaen ti Roma 1:20.) Kas pagarigan, ammom a ti init ket mangipaay iti bara a mangsustiner iti biag ngem mangiruar met iti makadangran nga enerhia kas kadagiti ultraviolet ray. Kasapulantayo a tattao ti maprotektaran kadagita. Ket kasta ti mapaspasamak! Kasano? Adda bukod a proteksion ti pagtaengantayo a daga​—ti layer ti ozone gas a mangsagat kadagiti makadangran a radiation. No pumigsa dagiti ultraviolet ray manipud iti init, umadu met ti ozone. Ita, saanka kadi nga umanamong nga adda la ketdi nangaramid iti dayta a proseso, ken isu ket naayat ken masirib a Namarsua?

11. Pakabirokam kadagiti impormasion a mangpabileg iti pammatim iti Namarsua? (Kitaen ti kahon a “ Dadduma a Reperensia a Mangpabileg iti Pammati iti Namarsua.”)

¹¹ Makabirokka kadagiti impormasion a mangpabileg iti pammatim iti Namarsua no kitaem ti Watch Tower Publications Index ken no ag-research-ka iti jw.org. Baka kayatmo a rugian kadagiti artikulo ken video manipud iti serye a “Nadisenio Kadi?” Ababa laeng dagita ken iparangda ti sumagmamano a nakaskasdaaw nga impormasion maipapan kadagiti animal ken iti dadduma pay a parsua. Naglaonda met kadagiti pagarigan no kasano a pinadas dagiti sientista a tuladen dagiti makitkitada iti nakaparsuaan.

12. No ad-adalentayo ti Biblia, ania ti dadduma a banag a masapul a siputantayo?

¹² Adalem ti Biblia. Ti biochemist a nadakamat itay dina patien idi damo nga adda Namarsua. Ngem namati met laeng idi agangay. Imbagana: “Ti pammatik ket saan laeng a naibasar iti naadalko iti siensia no di ket iti naannad a panagadalko iti Biblia.” Nalabit addan umiso a pannakaammom maipapan kadagiti pannursuro ti Biblia. Uray no kasta, tapno mapabilegmo ti pammatim iti Namarsua kenka, masapul nga itultuloymo nga adalen ti Sao ti Dios. (Jos. 1:8; Sal. 119:97) Siputam ti detalyado a panangilawlawag ti Biblia kadagiti historikal a pasamak. Panunotem dagiti natungpal a padtona ken ti panagtutunos dagiti linaonna. No aramidem dayta, mapabileg ti pammatim nga adda naayat ken masirib a Namarsua a nangaramid kadatayo  ken inwanwanna ti pannakaisurat ti Biblia. *​—2 Tim. 3:14; 2 Ped. 1:21.

13. Ania ti maysa a pagarigan iti sirib a masarakan iti Sao ti Dios?

¹³ No ad-adalem ti Sao ti Dios, siputam no kasano a makatulong kenka dagiti balakadna. Kas pagarigan, nabayagen nga impakdaar ti Biblia a makadangran ken mangpataud iti “adu nga ut-ot” ti panagayat iti kuarta. (1 Tim. 6:9, 10; Prov. 28:20; Mat. 6:24) Pudno pay laeng kadi ita dayta a pakdaar? Kuna ti libro a The Narcissism Epidemic: “Kadawyanna, nalidliday ken saan unay a naragsak dagiti materialistiko. Uray dagidiay agtarigagay laeng a maaddaan iti ad-adu a kuarta ket maapektaran ti emosionda; ibagbagada met nga ad-adu ti sakitda.” Talaga ngarud a makatulong ti pakdaar ti Biblia a saantayo nga ayaten ti kuarta! Adda pay kadi dagiti mapanunotmo a prinsipio ti Biblia a napaneknekanen a makatulong? No ad-adda nga apresiarentayo dagiti balakad ti Biblia, ad-adda met nga agtalektayo kadagiti di agkupas a sirib nga impaay ti nadungngo a Namarsua kadatayo. (Sant. 1:5) Kas resultana, naragragsak ti biagtayo.​—Isa. 48:17, 18.

14. Ania ti maammuam maipapan ken Jehova no adalem ti Biblia?

¹⁴ Adalem ti Biblia nga umiso ti panggepmo—tapno maam-ammom ni Jehova. (Juan 17:3) Bayat nga ad-adalem ti Biblia, maammuam dagiti kualidad ni Jehova​—dagiti kualidad a makitam a mismo iti sangaparsuaan. Nalawag a dagita ket kualidad ti pudpudno a Persona imbes a produkto laeng ti imahinasion. (Ex. 34:6, 7; Sal. 145:8, 9) Bayat a maam-ammom a naimbag ni Jehova, dumakkel ti pammatim kenkuana, umuneg ti panagayatmo kenkuana, ken tumibker ti pannakigayyemmo kenkuana.

15. Kasanoka a magunggonaan no ibagam iti dadduma ti pammatim?

¹⁵ Ibagam iti dadduma ti pammatim iti Dios. Bayat nga ar-aramidem dayta, mapatibkermo ti pammatim. Ngem kasanon no adda kaskasabaam a nagsaludsod maipapan iti kaadda ti Dios ket dika sigurado iti sungbatmo? Birokem iti maysa kadagiti publikasiontayo ti sungbat ti Biblia iti saludsodna, sa ilawlawagmo dayta kenkuana. (1 Ped. 3:15) Mabalinka met nga agpatulong kadagiti eksperiensiado a kapammatiam. Patienna man wenno saan ti sungbat ti Biblia, magunggonaanka iti panag-research-mo. Bumileg ti pammatim. Kas resultana, saanka a maallilaw kadagiti ulbod nga ibagbaga dagiti kasla masirib ken nalaing a tattao a mangibagbaga nga awan ti Namarsua.

16. Ania ti mapasamak no ditay itultuloy a pabilgen ti pammatitayo?

¹⁶ Kasanoman kabayagtayon nga agserserbi ken Jehova, masapul nga itultuloytayo a pabilgen ti pammatitayo kenkuana. Apay? No ditay ngamin agannad, kumapuy ti pammatitayo. Laglagipentayo a ti pammati ramanenna dagiti ebidensia a talaga nga adda dagiti di makita. Mabalin a nalakatayo a malipatan dagiti ditay makita. Isu nga imbaga ni Pablo a ti kurang a pammati ket “basol a nalaka a mangisagud kadatayo.” (Heb. 12:1) Kasano ngarud a maliklikantayo dayta a silo?​—2 Tes. 1:3.

17. Ania a tulong ti kasapulantayo tapno agtalinaed a nabileg ti pammatitayo?

¹⁷ Umuna, kanayon nga ipakaasim ken Jehova ti nasantuan nga espirituna. Apay? Gapu ta ti pammati ket maysa nga aspeto ti bunga ti espiritu. (Gal. 5:22, 23) Ditay maitultuloy a  mapabileg ti pammatitayo iti Namarsua kadatayo no awan ti tulong ti nasantuan nga espirituna. No itultuloytayo a kiddawen ken Jehova ti espirituna, itedna dayta kadatayo. (Luc. 11:13) Mabalintayo nga espesipiko nga ikararag: “Patibkerem ti pammatimi.”​—Luc. 17:5.

18. Sigun iti Salmo 1:2, 3, ania a nagpateg a sagut ti magun-odantayo itan?

¹⁸ Kasta met, regular koma ti personal a panagadalmo iti Sao ti Dios. (Basaen ti Salmo 1:2, 3.) Idi naisurat dayta a salmo, manmano nga Israelita ti addaan iti kompleto a naisurat a kopia ti Linteg ti Dios. Ngem ti ari ken dagiti papadi ket mabalin a makaala iti kopia, ken kada pito a tawen, adda ti urnos a dagiti “lallaki, babbai, ubbing,” ken dagiti ganggannaet a residente iti Israel dumngegda iti pannakaibasa ti Linteg ti Dios. (Deut. 31:10-12) Idi kaaldawan ni Jesus, manmano ti addaan kadagiti lukot ti Kasuratan ken masarakan laeng dagita iti sinagoga. Ngem iti kaaldawantayo, adun a tattao ti makabasa iti sumagmamano a paset wenno iti intero a Sao ti Dios. Nagpateg a sagut dayta! Kasanotayo a maipakita nga ap-apresiarentayo dayta a sagut?

19. Ania ti masapul nga aramidentayo tapno mapagtalinaedtayo a nabileg ti pammatitayo?

¹⁹ Maipakitatayo nga ap-apresiarentayo ti kaadda kadatayo ti Sao ti Dios no regular a basaentayo dayta. Ditay kayat a paspasaray laeng ti personal a panagadaltayo, nga aramidentayo laeng dayta no adda wayatayo. No siguraduentayo a regular ti panagadaltayo, mapagtalinaedtayo a nabileg ti pammatitayo.

20. Ania ti determinasiontayo?

²⁰ Saantayo a kas “kadagiti masirib ken nalaing” iti daytoy a lubong ta natibker ti pammatitayo a naibatay iti Sao ti Dios. (Mat. 11:25, 26) Gapu iti panagadaltayo iti dayta a sagrado a libro, ammotayo no apay a kumarkaro dagiti kasasaad ditoy daga ken no ania ti aramiden ni Jehova kadagita. Isu a determinadotayo koma a patibkeren ti pammatitayo ken ikagumaantayo a tulongan ti adu pay a tattao tapno mamatida nga adda Namarsua kadatayo. (1 Tim. 2:3, 4) Ken itultuloytay met a seggaan ti tiempo inton ti amin a sibibiag ditoy daga ibagada dagiti sasao iti Apocalipsis 4:11: “Maikarika, Jehova a Diosmi, nga umawat iti dayag . . . gapu ta pinarsuam ti amin a banag.”