Ebanghelio ni Lucas 17:1-37
17 Kalpasanna, kinunana kadagiti adalanna: “Saan a maliklikan nga adda dagiti pakaigapuan ti pannakaitibkol. Ngem kaasi pay daydiay mangaramid iti kasta!
2 Nasaysayaat laengen a maigalut ti gilingan a bato iti tengngedna sa maipalladaw iti baybay ngem ti itibkolna ti maysa kadagitoy nga ubbing.+
3 Agannadkayo. No makabasol kenka ti kabsatmo, tubngarem,+ ket no agbabawi, pakawanem.+
4 Uray no mamimpito iti kada aldaw a makabasol kenka, ken mamimpito nga umay kenka, nga ibagbagana, ‘Pakawanennak,’ masapul a pakawanem.”+
5 Kinuna dagiti apostol iti Apo: “Patibkerem ti pammatimi.”+
6 Insungbat ti Apo: “No adda pammatiyo a kas kabassit ti bukel ti mustasa, kunayonto iti daytoy a kayo nga amoras, ‘Maparutka koma ken maimulaka iti baybay!’ ket agtulnogto kadakayo.+
7 “Asino kadakayo nga addaan iti adipen nga agar-arado wenno agpaspastor ti mangibaganto kenkuana inton sumangpet manipud iti talon, ‘Darasem, umayka manganen’?
8 Saan kadi a ti ibagayo ket, ‘Isaganam ti pangrabiik, agisuotka iti apron ket serbiannak agingga a malpasak a mangan ken uminum, kalpasanna, mabalinmonton ti mangan ken uminum’?
9 Agyamankayto kadi iti adipenyo gapu ta inaramidna ti imbilinyo?
10 Kasta met, no nalpasyon ti amin a naipaaramid kadakayo, kunayonto: ‘Ad-adipenkami laeng nga awan serserbina. Inaramidmi laeng ti rumbeng nga aramidenmi.’”+
11 Idi mapmapan idiay Jerusalem, limmabas iti nagbaetan ti Samaria ken Galilea.
12 Ket bayat a sumsumrek iti maysa a purok, sinabat ti 10 a lallaki nga agkukutel, ngem nagtakderda iti adayo.+
13 Impukkawda: “Jesus, Mannursuro, kaasiannakami!”
14 Idi nakitana ida, kinunana: “Inkay agpakita kadagiti papadi.”+ Ket bayat a pumampanawdan, immimbagda.+
15 Idi nadlaw ti maysa kadakuada nga isu ket naimbaganen, nagsubli ket indaydayawna ti Dios iti napigsa a timek.
16 Nagrukob iti sango ni Jesus ket nagyaman kenkuana. Maysa pay, Samaritano daytoy a lalaki.+
17 Kinuna ni Jesus: “Saan kadi a 10 amin ti immimbag? Ayan ngaruden ti 9?
18 Awan kadin ti sabali a nagsubli tapno idaydayawna ti Dios malaksid iti daytoy naggapu iti sabali a nasion?”
19 Imbaga ni Jesus kenkuana: “Tumakderka ket inkan; pinaimbagnaka ti pammatim.”+
20 Idi insaludsod dagiti Fariseo no kaano nga umay ti Pagarian ti Dios,+ insungbatna: “Saan a nakadkadlaw a makita ti iyaay ti Pagarian ti Dios;
21 wenno saanto nga ibaga dagiti tattao: ‘Adda ditoy!’ wenno, ‘Adda idiay!’ Ta kitaenyo! ti Pagarian ti Dios ket adda iti tengngayo.”*+
22 Kalpasanna, kinunana kadagiti adalanna: “Dumtengto dagiti aldaw a kayatyo a makita ti maysa kadagiti aldaw ti Anak ti tao, ngem diyonto makita.
23 Ibaganto kadakayo dagiti tattao, ‘Adda idiay!’ wenno, ‘Adda ditoy!’ Saankayo a mapan wenno sumurot kadakuada.+
24 Ta no kasano nga aggilap ti kimat iti maysa a paset ti langit sa aggilap iti sabali a paset, kastanto met ti Anak ti tao+ iti aldawna.+
25 Ngem masapul a mapadasanna nga umuna ti adu a rigat ken ti panangilaksid daytoy a henerasion.+
26 Maysa pay, no ania ti kasasaad idi kaaldawan ni Noe,+ kastanto met ti kasasaad iti kaaldawan ti Anak ti tao:+
27 mangmangan, umin-inum, ken agaassawa dagiti tattao, agingga iti aldaw a simrek ni Noe iti daong,+ ket immay ti Layus ken dinadaelna amin ida.+
28 Kasta met laeng ti napasamak idi kaaldawan ni Lot:+ mangmangan, umin-inum, gumatgatang, aglaklako, agmulmula, ken agibangbangon dagiti tattao.
29 Ngem iti aldaw a pimmanaw ni Lot iti Sodoma, nagtudo iti apuy ken asupre manipud langit ket dinadaelna amin ida.+
30 Kastanto met laeng ti mapasamak iti aldaw a maipalgak ti Anak ti tao.+
31 “Iti dayta nga aldaw, ti tao nga adda iti tuktok ti balay ket saan koman nga umulog a sumrek iti balayna tapno alaenna dagiti sanikuana. Uray ti tao nga adda iti talon, saan koman nga agawid tapno alaenna dagiti nabatina.
32 Laglagipenyo ti asawa ni Lot.+
33 Ti mangikagumaan a mangisalakan iti biagna,* mapukawnanto dayta; ngem ti makapukaw iti biagna, mataginayonnanto dayta.+
34 Ibagak kadakayo, iti dayta a rabii, addanto dua a tao iti maymaysa a pagiddaan; maalanto ti maysa, ngem mabatinto ti sabali.+
35 Addanto dua a babbai nga aggilgiling iti maymaysa a paggilingan; maalanto ti maysa, ngem mabatinto ti sabali.”
36 * ——
37 Isu nga insaludsodda kenkuana: “Sadino, Apo?” Kinunana kadakuada: “No sadino ti ayan ti bangkay, idiay met nga aguurnong dagiti agila.”+
