Deuteronomio 31:1-30
31 Kalpasanna, rimmuar ni Moises ket imbagana dagitoy a sasao iti intero nga Israel:
2 “Agtawenakon iti 120.+ Saankayon a maidauluan* ta kinuna kaniak ni Jehova, ‘Saankanto a bumallasiw iti Jordan.’+
3 Umun-una a bumallasiw ni Jehova a Diosyo, ket ibusenna dagitoy a nasion iti sanguananyo ken papanawenyonto ida.+ Ni Josue ti mangidaulo iti ibaballasiwyo,+ kas kinuna ni Jehova.
4 Aramidento ni Jehova kadakuada ti inaramidna kadagiti ari dagiti Amoreo a da Sihon+ ken Og,+ ken iti dagada, idi inibusna ida.+
5 Parmekento ida ni Jehova para kadakayo, ken aramidenyo kadakuada ti amin a bilin nga intedko kadakayo.+
6 Papigsaenyo ti pakinakemyo ken bumilegkayo.+ Dikay agbuteng wenno agamak kadakuada,+ ta makipagmarmartsa kadakayo ni Jehova a Diosyo. Saannakayto a panawan wenno baybay-an.”+
7 Iti kasta, inayaban ni Moises ni Josue ket kinunana kenkuana iti sanguanan ti intero nga Israel: “Papigsaem ti pakinakemmo ken bumilegka,+ ta sika ti mangiserrek kadagitoy a tattao iti daga nga inkari ni Jehova kadagidi ammada nga itedna kadakuada, ket itedmo dayta kas tawidda.+
8 Adda iti sanguananyo ni Jehova, ket agtultuloyto nga adda kadakayo.+ Saannakayto a panawan wenno baybay-an. Dikay agbuteng wenno agamak.”+
9 Kalpasanna, insurat ni Moises daytoy a Linteg+ ket intedna kadagiti padi a Levita, a paraawit iti lakasa ti tulag ni Jehova, ken iti amin a panglakayen iti Israel.
10 Imbilin kadakuada ni Moises: “Iti ngudo ti tunggal pito a tawen, iti naituding a tiempo ti tawen a panangwayawaya,+ bayat ti Piesta ti Abong-abong,*+
11 inton agparang ti intero nga Israel iti sanguanan ni Jehova+ a Diosyo iti disso a pilienna, ibasamto daytoy a Linteg tapno mangngeg ti intero nga Israel.+
12 Ummongem dagiti tattao+—lallaki, babbai, ubbing,* ken dagiti ganggannaet a residente kadagiti siudadyo*—tapno mangngeg ken masursuroda ti maipapan ken Jehova a Diosyo ken agbutengda kenkuana, ken tapno matungpalda a naimbag ti amin a sasao daytoy a Linteg.
13 Iti kasta, mangngeg dagiti annakda a saan a makaammo iti daytoy a Linteg+ ket masursuroda ti agbuteng ken Jehova a Diosyo iti amin nga aldaw a panagnaedyo iti daga a tagikuaenyo+ iti ballasiw ti Jordan.”
14 Kinuna ni Jehova ken ni Moises: “Asidegen ti aldaw nga ipapataymo.+ Ayabam ni Josue, ket mapankayo* iti tolda a pagkonsultaan, tapno pagbalinek a lider.”+ Gapuna, napan da Moises ken Josue iti tolda.
15 Kalpasanna, nagparang ni Jehova iti tolda babaen ti adigi nga ulep, iti sango ti ruangan ti tolda.+
16 Kinuna ni Jehova ken ni Moises: “Asidegen ti ipapataymo,* ket agserbinto* dagitoy a tattao kadagiti sabali a dios nga adda iti aglawlaw ti daga a papananda.+ Baybay-andakto+ ken saanda a tungpalen ti tulagko kadakuada.+
17 Makapungtotakto kadakuada,+ ket baybay-an+ ken tallikudakto ida*+ agingga a madadaelda. Inton agsagabada iti adu a didigra ken rigat,+ ibagadanto, ‘Mapaspasarantayo dagitoy a didigra ta awan ti Diostayo iti tengngatayo!’+
18 Ngem tallikudakto ida* iti dayta nga aldaw gapu iti amin a dakes nga inaramidda babaen ti panagserbida kadagiti sabali a dios.+
19 “Ita, isuratyo daytoy a kanta para kadakayo+ ket isuroyo kadagiti Israelita,+ tapno masursuroda* daytoy a kanta a mangipalagip iti napasamak idi nagsukirda.+
20 Inton maipanko ida iti daga nga inkarik kadagidi ammada+—ti daga a pagay-ayusan ti gatas ken diro+—ket agpennekda a mangan ken rumang-ayda,*+ agserbidanto kadagiti sabali a dios, saandakto a raemen ken saandanto a tungpalen ti tulagko.+
21 Inton agsagabada iti adu a didigra ken rigat,+ agserbinto daytoy a kanta kas pakdaar kadakuada (tapno saan a malipatan ti kaputotanda), ta ammokon ti tarigagayda+ sakbay pay a maipanko ida iti daga nga inkarik.”
22 Gapuna, insurat ni Moises daytoy a kanta iti dayta nga aldaw ken insurona kadagiti Israelita.
23 Dinutokanna* ni Josue+ nga anak ni Nun, ket kinunana: “Papigsaem ti pakinakemmo ken bumilegka,+ ta sika ti mangiserrek kadagiti Israelita iti daga nga inkarik kadakuada,+ ket agtultuloyto nga addaak kenka.”
24 Idi nakompleton ni Moises nga insurat ti sasao daytoy a Linteg iti maysa a libro,+
25 imbilinna kadagiti Levita a paraawit iti lakasa ti tulag ni Jehova:
26 “Alaenyo daytoy a libro ti Linteg+ ken ikabilyo iti sikigan ti lakasa+ ti tulag ni Jehova a Diosyo, ket agserbinto daytoy kas pakdaar kadakayo.
27 Ta ammok a rebelioso+ ken nasukirkayo.*+ No nakasuksukirkayon ken Jehova ita a sibibiagak, nakarkaronto inton matayak!
28 Ummongem amin a panglakayen kadagiti tribuyo ken dagiti opisialyo, tapno ibagak daytoy kadakuada, ket pagbalinek a saksik ti langit ken daga maibusor kadakuada.+
29 Ta ammok a kalpasan ti ipapatayko, agaramidkayto iti dakes+ ken suminakayo iti dalan nga imbilinko. Sigurado a madidigrakayto+ ta aramidenyonto ti dakes iti sanguanan ni Jehova ken mapagpungtotyo babaen kadagiti aramid ti imayo.”
30 Kalpasanna, imbasa ni Moises ti liriko daytoy a kanta manipud rugi agingga iti ungtona iti sanguanan ti intero nga Israel:+
Footnotes
^ Lit., “Saanakon a makaruar ken makastrek.”
^ Wenno “Kalapaw.”
^ Lit., “babassit nga ubbing.”
^ Lit., “ruanganyo.”
^ Wenno “agparangkayo.”
^ Wenno “agbalangkantisto iti naespirituan.”
^ Lit., “Asidegen a makikaiddaka kadagiti ammam.”
^ Lit., “ilingedkonto ti rupak kadakuada.”
^ Lit., “ilingedkonto ti rupak kadakuada.”
^ Lit., “maikabilyo iti ngiwatda.”
^ Lit., “lumukmegda.”
^ Nalawag a ti Dios ti nangdutok.
^ Lit., “natangken ti teltelyo.”
