Ebanghelio ni Mateo 6:1-34

  • SERMON ITI BANTAY (1-34)

    • Liklikan ti panaginlilinteg (1-4)

    • No kasano ti agkararag (5-15)

      • Pagtuladan a kararag (9-13)

    • Panagayunar (16-18)

    • Dagiti gameng ditoy daga ken idiay langit (19-24)

    • Saanen a madanagan (25-34)

      • Itultuloy a sapulen nga umuna ti Pagarian (33)

6  “Agannadkayo a saan koma a pammarang ti kinalintegyo iti sanguanan dagiti tattao;+ ta no kasta ti aramidenyo, saannakayto a gunggonaan ni Amayo nga adda idiay langit.  No ngarud mangtedka iti sagut ti asi,* dika mangpuyot iti trumpeta iti sanguanam, kas iti ar-aramiden dagiti aginsisingpet kadagiti sinagoga ken kalsada, tapno idaydayaw ida dagiti tattao. Pudno kunak kadakayo, naawatdan a naan-anay ti gunggonada.  Ngem no mangtedka iti sagut ti asi, dimo ipakaammo iti kannigid nga imam ti ar-aramiden ti kannawan nga imam,  tapno nalimed dagiti sagutmo. Iti kasta, gunggonaannaka ni Amam a makakitkita iti amin nga ar-aramidem.+  “Kasta met, no agkararagkayo, diyo tuladen dagiti aginsisingpet,+ ta kaykayatda ti agkararag a sitatakder kadagiti sinagoga ken iti nagsulian dagiti dadakkel a kalsada tapno makita ida dagiti tattao.+ Pudno kunak kadakayo, naawatdan a naan-anay ti gunggonada.  Ngem no agkararagka, sumrekka iti kuartom ken irikepmo ti ridaw ket agkararagka ken ni Amam a saan a makita.*+ Iti kasta, bendisionannaka ni Amam a makakitkita iti amin nga ar-aramidem.  No agkararagkayo, diyo ulit-uliten ti isu met laeng a sasao a kas iti ar-aramiden dagiti tattao kadagiti nasion, ta ipagarupda nga ipangag ida ti Dios gapu iti atiddog a kararagda.  Diyo tuladen ida, ta ammo ni Amayo ti kasapulanyo+ sakbay pay a kiddawenyo.  “Kastoy ngarud ti panagkararagyo:+ “‘Amami nga adda iti langit, masantipikar koma*+ ti naganmo.+ 10  Umay koma ti Pagariam.+ Maaramid koma ti pagayatam+ ditoy daga, a kas sadi langit.+ 11  Itedmo koma ti taraonmi* ita nga aldaw;+ 12  ken pakawanem koma dagiti utangmi, kas iti panangpakawanmi kadagiti nakautang kadakami.+ 13  Dinakami iyeg iti sulisog,+ ken isalakannakami iti daydiay managdakdakes.’+ 14  “Ta no pakawanenyo dagiti nakabasol kadakayo, pakawanennakayto met ni Amayo idiay langit;+ 15  ngem no saanyo a pakawanen dagiti nakabasol kadakayo, saanto met a pakawanen ni Amayo dagiti basolyo.+ 16  “No agayunarkayo,+ dikay agparang a naliday a kas kadagiti aginsisingpet, ta paalasenda ti rupada* tapno maammuan dagiti tattao nga agay-ayunarda.+ Pudno kunak kadakayo, naawatdan a naan-anay ti gunggonada. 17  Ngem no agayunarka, sapsapuam ta ulom iti lana ken agdiram-oska, 18  tapno saan a madlaw dagiti tattao nga agay-ayunarka. Ti laeng koma Amam a saan a makita ti makaammo iti amin nga ar-aramidem, ket bendisionannaka. 19  “Saankayon nga agurnong iti kinabaknang ditoy daga,+ a dadaelen ti insekto ken lati, ken takawen dagiti mannanakaw. 20  Imbes ketdi, agurnongkayo iti kinabaknang idiay langit,+ a saan a dadaelen ti insekto wenno lati,+ ken saan a takawen dagiti mannanakaw. 21  Ta no sadino ti ayan ti kinabaknangmo, addanto met sadiay ti pusom. 22  “Ti mata ti lampara ti bagi.+ No ngarud naipamaysa* ti matam, naraniag* ti intero a bagim. 23  Ngem no naapal* ti matam,+ nasipnget ti intero a bagim. No ti lawag nga adda kenka ket kinasipnget, nakaro dayta a kinasipnget! 24  “Awan ti adipen a makapagserbi iti dua nga amo; ta mabalin a guraenna ti maysa ket ayatenna ti sabali,+ wenno matalek iti maysa ket tallikudanna ti sabali. Diyo mapaggiddan a pagserbian ti Dios ken ti Kinabaknang.+ 25  “Gapuna, kunak kadakayo: Saankayon a madanagan+ iti biagyo,* no anianto ti kanenyo wenno inumenyo, wenno pagbadoyo.+ Saan kadi a napatpateg ti biag* ngem ti taraon ken bado?+ 26  Paliiwenyo dagiti billit iti tangatang;+ saanda nga agmula iti bin-i wenno agani wenno agipempen kadagiti kamarin, ngem pakanen ida ni Amayo nga adda idiay langit. Saan kadi a napatpategkayo ngem kadakuada? 27  Asino kadakayo ti makapaatiddog iti biagna iti maysa a kasiko* babaen ti panagdanagna?+ 28  Kasta met, apay a maringgorankayo iti pagbadoyo? Adda masursuroyo kadagiti lirio iti tanap, no kasano ti panagdakkelda; saanda nga agtrabaho, wenno agaramid iti sinulid; 29  ngem laglagipenyo nga uray nakadaydayag ni Solomon,+ saan a nakawesan iti kas kapintas ti maysa kadagitoy a sabong. 30  No kawesan ti Dios iti napintas dagiti mula iti tanap nga adda ita ngem mapuoran inton bigat, saan kadi a nangnangruna a kawesannakayo, dakayo a bassit ti pammatina? 31  Dikay ngarud maringgoran+ nga ibagayo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagbadomi?’+ 32  Ta dagitoy ti nangnangruna a sapsapulen dagiti tattao iti lubong. Ammo ni Amayo idiay langit a kasapulanyo amin dagitoy. 33  “Itultuloyyo ngarud a sapulen nga umuna ti Pagarian ken ti kinalinteg ti Dios, ket amin dagitoy a banag mainayonto kadakayo.+ 34  Gapuna, diyo pakadanagan ti problema iti sumaganad nga aldaw,+ ta adda bukod a problema ti tunggal aldaw. Ti laeng problema ita nga aldaw ti panunotenyo.

Footnotes

Wenno “sagut kadagiti napanglaw.” Kitaem ti Glosario.
Lit., “nga adda iti nalimed.”
Wenno “maibilang koma a sagrado; matrato koma a nasantuan.”
Lit., “tinapaymi.”
Wenno “baybay-anda ti langada.”
Wenno “nalawag.” Lit., “simple.”
Wenno “napno iti lawag.”
Lit., “dakes.”
Wenno “kararuayo.”
Wenno “kararua.”
Kitaem ti App. B14.