Ebanghelio ni Mateo 16:1-28

  • Panagkiddaw iti pagilasinan (1-4)

  • Lebadura dagiti Fariseo ken Saduceo (5-12)

  • Dagiti tulbek ti Pagarian (13-20)

    • Maibangon ti kongregasion iti dakkel a bato (18)

  • Naipadto ti ipapatay ni Jesus (21-23)

  • Ti aramiden dagiti pudno nga adalan (24-28)

16  Immasideg ken Jesus ti sumagmamano a Fariseo ken Saduceo tapno subokenda. Kiniddawda a mangaramid iti pagilasinan manipud langit.+  Insungbatna: “No dumteng ti rabii, kunayo, ‘Nasayaatto ti paniempo, ta nalabaga ti tangatang,’  ket iti bigat, ‘Nalamiis ken agtudo ita, ta nalabaga ken nasipnget ti tangatang.’ Maibagayo ti paniempo babaen ti panangkitayo iti tangatang, ngem diyo mailawlawag ti maipapan kadagiti pagilasinan ti tiempo.  Agtultuloy nga agbirok iti pagilasinan ti dakes ken saan a matalek* a henerasion, ngem awanto ti makitada+ malaksid iti pagilasinan a napasamak ken Jonas.”+ Kalpasanna, pinanawan ida ni Jesus.  Bimmallasiw dagiti adalan iti sabali a bangir ti baybay ngem nalipatanda ti nagbalon iti tinapay.+  Kinuna kadakuada ni Jesus: “Agsiputkayo ken agannadkayo iti lebadura dagiti Fariseo ken Saduceo.”+  Gapuna, kinunada: “Siguro imbagana dayta ta awan ti naitugottayo a tinapay.”  Ammo ni Jesus ti pagsasaritaanda isu a kinunana: “Apay a pagsusupiatanyo nga awan ti intugotyo a tinapay? Nagbassit ketdin ti pammatiyo.  Saanyo pay kadi a matarusan ti ibagbagak, wenno saanyo kadi a malagip a pinakanko ti 5,000 babaen ti lima a tinapay ken no mano a basket ti nangikkanyo kadagiti natedda?+ 10  Wenno ti 4,000 a pinakanko babaen ti pito a tinapay ken no mano a kuribot* ti nangikkanyo kadagiti natedda?+ 11  Diyo kadi matarusan a saan a literal a tinapay ti ibagbagak kadakayo? Ngem agannadkayo iti lebadura dagiti Fariseo ken Saduceo.”+ 12  Gapuna, natarusanda a saan a ti lebadura a mailalaok iti tinapay ti pagannadanda, no di ket ti sursuro dagiti Fariseo ken Saduceo. 13  Idi nakadanon ni Jesus iti Cesarea Filipos, insaludsodna kadagiti adalanna: “Asino ti Anak ti tao iti panagkuna dagiti tattao?”+ 14  Kinunada: “Adda dagiti agkuna nga isu ni Juan a Mammautisar,+ kuna met ti dadduma a ni Elias,+ ken adda pay dagiti agkuna a ni Jeremias wenno maysa kadagiti propeta.” 15  Kinunana kadakuada: “Dakayo ngay, asinoak iti panagkunayo?” 16  Insungbat ni Simon Pedro: “Sika ti Kristo,+ ti Anak ti sibibiag a Dios.”+ 17  Kinuna ni Jesus: “Naragsakka, Simon nga anak ni Jonas, ta saan a lasag ken dara* ti nangipakaammo kenka iti dayta, no di ket ni Amak idiay langit.+ 18  Ibagak met kenka: Sika ni Pedro.+ Iti daytoy a bato,+ bangonekto ti kongregasionko, ket saanto nga agballigi iti dayta dagiti ruangan ti Tanem.* 19  Itedkonto kenka dagiti tulbek ti Pagarian ti langit, ket aniaman a galutam ditoy daga magalutan metten idiay langit, ken ti aniaman a warwaram ditoy daga mawarwaran metten idiay langit.” 20  Kalpasanna, inyunay-unayna kadagiti adalan a saanda nga ibagbaga iti asinoman nga isu ti Kristo.+ 21  Manipud idin, inlawlawagen ni Jesus kadagiti adalanna a masapul a mapan idiay Jerusalem ket parigatento unay dagiti panglakayen, panguluen a papadi, ken dagiti eskriba sa mapapatay. Ngem mapagungar iti maikatlo nga aldaw.+ 22  Inyadayo bassit ni Pedro ni Jesus sa tinubngarna: “Kaasiam ta bagim, Apo; dinto pulos mapasamak kenka dayta.”+ 23  Timmaliaw ken Pedro ket kinunana: “Adaywannak,* Satanas! Maysaka a pakaitibkolak, ta saan a ti pampanunot ti Dios ti pampanunotem no di ket ti pampanunot dagiti tattao.”+ 24  Kalpasanna, kinuna ni Jesus kadagiti adalanna: “Asinoman a mayat a sumurot kaniak, tallikudanna koma ti bagina ket bagkatenna ti kayona a pagtutuokan* ken agtultuloy a surotennak.+ 25  Ta ti mangikagumaan a mangisalakan iti biagna,* mapukawnanto. Ngem ti makapukaw iti biagna maigapu kaniak, masarakannanto.+ 26  Adda aya magunggona ti maysa a tao no matagikuana ti intero a lubong ngem mapukawna met ti biagna?*+ Wenno adda kadi maisukat ti maysa a tao iti biagna?*+ 27  Ta umayto ti Anak ti tao iti dayag ni Amana, a kaduana dagiti anghelna, ket supapakanna ti tunggal maysa sigun iti aramidna.+ 28  Pudno kunak kadakayo nga adda sumagmamano a nakatakder ditoy a saanto pay a matay agingga a makitada nga umuna ti Anak ti tao nga umay iti Pagarianna.”+

Footnotes

Lit., “mannakikamalala.”
Wenno “kuribot a pagyanan iti makan.”
Wenno “saan a tao.”
Wenno “Hades,” kayatna a sawen, simboliko a pagtungpalan dagiti natay. Kitaem ti Glosario.
Lit., “Inka iti likudak.”
Kitaem ti Glosario.
Wenno “kararuana.”
Wenno “kararuana.”
Wenno “kararuana.”