Ebanghelio ni Mateo 3:1-17

  • Panangasaba ni Juan a Mammautisar (1-12)

  • Panagbautisar ni Jesus (13-17)

3  Idi agangay, napan ni Juan+ a Mammautisar iti let-ang ti Judea ket nangaskasaba,+  kinunana: “Agbabawikayo, ta asidegen ti Pagarian ti langit.”+  Kinapudnona, ni Juan ti tuktukoyen ni propeta Isaias+ idi kinunana: “Adda mangipukpukkaw idiay let-ang: ‘Isaganayo ti dalan ni Jehova!* Aramidenyo a nalinteg dagiti dalanna.’”+  Nakabado ni Juan iti dutdot ti kamelio ken nakasinturon iti lalat.+ Dudon ken diro ti bakir ti taraonna.+  Napan kenkuana ti amin nga umili ti Jerusalem ken Judea ken dagiti lugar iti aglawlaw ti Jordan.+  Impudnoda dagiti basolda ken binautisaranna* ida idiay Karayan Jordan.+  Idi nakitana nga immasideg ti adu a Fariseo ken Saduceo,+ kinunana kadakuada: “Dakayo nga annak dagiti uleg,+ pagarupenyo kadi a makalisikayto iti aldaw ti pungtot ti Dios?+  Ipakitayo ngarud babaen ti aramidyo nga agbabbabawikayo.  Diyo ipagarup a makalisikayo babaen ti panagkunayo, ‘Ni Abraham ti amami.’+ Ibagak kadakayo a kabaelan ti Dios ti mangpataud iti annak ni Abraham babaen kadagitoy a bato. 10  Nakasaganan ti wasay a pangpukan kadagiti kayo agingga iti ramutda. Gapuna, mapukan ken mapuoran ti amin a kayo a saan nga agbunga iti nasayaat.+ 11  Bautisarankayo iti danum gapu iti panagbabawiyo,+ ngem nabilbileg ngem siak daydiay sumaruno kaniak ken saanak a maikari a mangikkat kadagiti sandaliasna.+ Bautisarannakayto iti nasantuan nga espiritu+ ken iti apuy.+ 12  Nakaiggem iti pala a pagtaep, ken dalusannanto a naimbag ti pagirikan ket urnongennanto ti trigo iti kamarinna, ngem puorannanto ti taep iti apuy+ a saan a maiddep.” 13  Manipud Galilea, napan ni Jesus idiay Jordan tapno agpabautisar ken Juan.+ 14  Ngem kayat ni Juan a lapdan, ket kinunana: “Umayka kadi agpabautisar kaniak? Siak koma ti masapul a bautisaram.” 15  Insungbat ni Jesus: “Bay-am a maaramid daytoy, ta rumbeng nga aramidenta ti isuamin a nalinteg.” Iti kasta, saannan a linapdan. 16  Idi nabautisaranen ni Jesus, dagus a simmang-at manipud iti danum; ket naglukat ti langit+ ken nakitana a bumabbaba kenkuana ti espiritu ti Dios a kasla kalapati.+ 17  Adda met timek manipud langit+ a nagkuna: “Daytoy ti Anakko+ a dungdungnguek, a pakaragsakak.”+

Footnotes

Kitaem ti App. A5.
Wenno “intanebna.”