Ebanghelio ni Mateo 8:1-34

  • Napaimbag ti agkukutel (1-4)

  • Pammati ti opisial ti armada (5-13)

  • Adu ti paimbagen ni Jesus idiay Capernaum (14-17)

  • No kasano a suroten ni Jesus (18-22)

  • Pagtalnaen ni Jesus ti bagyo (23-27)

  • Ibaon ni Jesus dagiti demonio kadagiti baboy (28-34)

8  Simmalog ni Jesus manipud iti bantay ket sinurot ti adu a tattao.  Adtoy! Immasideg kenkuana ti maysa nga agkukutel ket nagruknoy ken kinunana: “Apo, no kayatmo laeng koma, mapaimbagnak.”+  Iti kasta, sinagidna ti lalaki sa kinunana: “Kayatko! Umimbagka.”+ Dagus nga immimbag ti kukutelna.+  Imbaga ni Jesus: “Dimo pulos ibagbaga daytoy iti asinoman,+ ngem mapanka agpakita iti padi,+ ket itedmo ti daton nga imbilin ni Moises,+ kas pammaneknek kadakuada nga immimbagkan.”  Idi napan idiay Capernaum, simmabat ti maysa nga opisial ti armada, ket nagpakpakaasi.+  Kinunana: “Apo, nakaidda ti adipenko idiay balay ta nakaro ti sakitna ken saan a makabangon.”  Imbaga ni Jesus: “Paimbagekto inton makadanonak sadiay.”  Insungbat ti opisial ti armada: “Apo, saanak a maikari a mangpastrek kenka iti balayko, ibagam laengen nga umimbag ti adipenko ket umimbagto.  Ta adda met pagtulnogak a nangatngato ngem siak ken adda dagiti soldado nga agtultulnog kaniak. No kunak iti maysa, ‘Mapanka!’ mapan, no kunak iti sabali, ‘Umayka!’ umay, ken no ibilinko iti adipenko, ‘Aramidem daytoy!’ aramidenna.” 10  Nasdaaw ni Jesus idi nangngegna dayta ket kinunana kadagiti sumursurot kenkuana: “Ibagak kadakayo ti pudno, awan pay ti nasarakak iti Israel a kastoy kadakkel ti pammatina.+ 11  Ngem ibagak kadakayo nga adunto ti umay manipud iti daya ken laud nga agsadag iti lamisaan a kadua da Abraham, Isaac, ken Jacob iti Pagarian ti langit;+ 12  ngem dagiti annak ti Pagarian maipuruakdanto iti kasipngetan ket agsangit ken agngaretngetdanto.”+ 13  Kalpasanna, kinuna ni Jesus iti opisial ti armada: “Agawidkan. Maaramid ti pinatim a mapasamak.”+ Ket immimbag ti adipen iti dayta nga oras.+ 14  Idi napan ni Jesus iti balay ni Pedro, nakitana ti babai a katugangan ni Pedro+ a nakaidda ta aggurigor.+ 15  Gapuna, sinagidna ti ima ti babai+ ket immimbag ti gurigorna isu a bimmangon ken nagserbi kenkuana. 16  Ngem idi rumabiin, impan dagiti tattao ken Jesus ti adu a naluganan iti demonio; ket pinaruarna dagiti demonio babaen laeng iti sao, ken pinaimbagna amin a masakit, 17  tapno matungpal ti naipadto babaen ken propeta Isaias: “Inikkatna dagiti sakittayo ken imbaklayna dagiti ut-ot a marikriknatayo.”+ 18  Idi makita ni Jesus ti adu a tattao nga immaribungbong kenkuana, imbagana kadagiti adalanna a bumallasiwda iti baybay.+ 19  Immasideg ti maysa nga eskriba ket kinunana: “Mannursuro, surotenkanto sadinoman ti papanam.”+ 20  Ngem insungbat ni Jesus: “Adda pagyanan dagiti sora ken adda umok dagiti billit, ngem ti Anak ti tao awan ti pangisadaganna iti ulona.”+ 21  Kinuna ti sabali pay nga adalan: “Apo, itabonko pay koma nga umuna ni tatangko.”+ 22  Insungbat ni Jesus: “Itultuloymo ti sumurot kaniak, ket bay-am a dagiti natay ti mangitabon iti minatayda.”+ 23  Idi nakaluganen iti bangka, simmurot kenkuana dagiti adalanna.+ 24  Pagammuan ta adda napigsa a bagyo iti baybay ket nasabuasabuagan ti bangka kadagiti dalluyon; ngem matmaturog idi ni Jesus.+ 25  Riniingda ket kinunada: “Apo, isalakannakami, mataytayon!” 26  Ngem kinunana kadakuada: “Apay a kasta unay ti butengyo?* Nagbassit ketdin ti pammatiyo.”+ Bimmangon ken pinagtalnana ti angin ken ti dalluyon, ket limminak.+ 27  Nagsiddaaw dagiti adalan ket kinunada: “Ania a tao daytoy? Agtulnog kenkuana uray ti angin ken baybay.” 28  Idi nakaballasiwdan iti rehion dagiti Gadareno, simmabat kenkuana ti dua a lallaki a rimmuar iti sementerio.*+ Nalugananda iti demonio ken nakarungrungsotda isu nga awan ti makaitured a lumabas iti dayta a dalan. 29  Impukkawda: “Apay nga immayka ditoy, Anak ti Dios?+ Immayka kadi tapno dusaennakami+ sakbay ti naikeddeng a tiempo?”+ 30  Iti saan unay nga adayo kadakuada, adda nakaad-adu a baboy a mangmangan.+ 31  Gapuna, impakaasi dagiti demonio: “No paruarennakami, ibaonnakami ngarud a lumugan kadagiti baboy.”+ 32  Kinunana kadakuada: “Mapankayo!” Rimmuarda kadagiti dua a lallaki ket simrekda kadagiti baboy. Nagtataray dagiti baboy a timpuak iti teppang ket nalmesda iti baybay. 33  Nagtataray met dagiti agtartaraken a napan iti siudad ket impadamagda ti amin a napasamak, agraman ti maipapan kadagiti lallaki a linuganan dagiti demonio. 34  Simmabet ken Jesus dagiti umili ket impakaasida a pumanaw iti lugarda.+

Footnotes

Wenno “Apay a nakapuy ti pakinakemyo?”
Wenno “pakalaglagipan a tanem.”