Ebanghelio ni Mateo 12:1-50
-
Ni Jesus, “Apo ti Sabbath” (1-8)
-
Napaimbag ti lalaki a paralitiko ti imana (9-14)
-
Adipen a dungdungnguen ti Dios (15-21)
-
Naparuar dagiti demonio babaen ti nasantuan nga espiritu (22-30)
-
Di mapakawan a basol (31, 32)
-
Maammuan ti kita ti kayo babaen ti bungana (33-37)
-
Pagilasinan a napasamak ken Jonas (38-42)
-
No agsubli ti dakes nga espiritu (43-45)
-
Ti ina ken kakabsat ni Jesus (46-50)
12 Iti maysa a gundaway, magmagna ni Jesus iti kataltalonan iti aldaw ti Sabbath. Nagbisin dagiti adalanna ket nangrurosda kadagiti dawa sa kinnanda.+
2 Idi makita daytoy dagiti Fariseo, kinunada: “Kitaem dagiti adalam, ar-aramidenda ti saan a maipalubos iti Sabbath!”+
3 Kinunana: “Diyo kadi nabasa ti inaramid ni David ken dagiti kakaduana idi mabisinda?+
4 Saan kadi a simrek ni David iti balay ti Dios ket kinnanda dagiti daton a tinapay,*+ a saan koma a maipalubos a kanenna wenno dagiti kakaduana, no di ket kanen laeng dagiti papadi?+
5 Wenno diyo kadi nabasa iti Linteg nga agtrabtrabaho latta dagiti papadi bayat ti Sabbath ngem saanda a makabasol?+
6 Ibagak kadakayo, adda ditoy ti napatpateg ngem iti templo.+
7 No naawatanyo koma ti kaipapanan daytoy, ‘Asi+ ti kalikagumak, saan a daton,’+ saanyo koma nga inukom dagiti awanan basol.
8 Ta ti Anak ti tao ket Apo ti Sabbath.”+
9 Pimmanaw iti dayta a lugar ket napan iti sinagoga.
10 Adda lalaki sadiay a paralisado* ti maysa nga imana.+ Tapno maakusaranda ni Jesus, insaludsodda, “Maiparbeng kadi ti mangpaimbag iti Sabbath?”+
11 Imbagana kadakuada: “No matnag ti karneroyo iti abut iti aldaw ti Sabbath, saanyo kadi nga aonen?+
12 Anian nga ad-adda pay a napatpateg ti tao ngem ti karnero! No kasta, maipalubos ti agaramid iti nasayaat iti Sabbath.”
13 Kinunana iti lalaki: “Unnatem ta imam.” Inunnatna ket immimbag a kas iti sabali nga imana.
14 Ngem rimmuar dagiti Fariseo ket nagsasaritaanda no kasanoda a papatayen.
15 Pimmanaw ni Jesus idi naammuanna daytoy. Adu met ti simmurot kenkuana,+ ket pinaimbagna amin ida,
16 ngem siiinget nga imbilinna a saanda nga ipakpakaammo ti kinasiasinona,+
17 tapno matungpal ti naipadto babaen ken propeta Isaias:
18 “Adtoy! Ti adipenko+ a pinilik, ti dungdungnguek ken pakaragsakak!+ Ikabilkonto kenkuana ti espirituk,+ ket ipakitananto ti pudpudno a hustisia kadagiti nasion.
19 Saanto a makiriri+ wenno agpukkaw, saanto met a mangngeg ti timekna kadagiti kalsada.
20 Saannanto a rumeken ti naparpar a runo, ken saannanto nga iddepen ti agkurkuridemdem a pabilo,+ agingga nga agballigi ti kinahustisia.
21 Mangnamnamanto dagiti nasion iti naganna.”+
22 Kalpasanna, inyegda kenkuana ti lalaki a bulsek ken umel ta naluganan iti demonio, ket pinaimbagna. Iti kasta, nakapagsao ken nakakita.
23 Nagsiddaaw dagiti tattao ket kinunada: “Saan ngata a daytoy ti Anak ni David?”
24 Idi nangngeg daytoy dagiti Fariseo, kinunada: “Parparuarenna dagiti demonio babaen ken Beelzebub* a panguluen dagiti demonio.”+
25 Gapu ta ammo ni Jesus ti pampanunotenda, kinunana kadakuada: “Marpuog ti pagarian a saan nga agkaykaysa dagiti umilina, ken masinasina ti siudad wenno sangakabbalayan a saan nga agtutunos dagiti miembrona.
26 Kasta met, no ni Satanas paruarenna ni Satanas, lablabananna ti bagina, kasano ngarud a mataginayon ti pagarianna?
27 Mainayon pay, no paruarek dagiti demonio babaen ken Beelzebub, nangalaan ngarud dagiti annakyo iti pannakabalin a mangparuar kadagiti demonio? Gapuna, isudanto ti mangukom kadakayo.
28 Ngem no babaen ti espiritu ti Dios a parparuarek dagiti demonio, dimtengen ti Pagarian ti Dios a diyo napupuotan.+
29 Wenno kasano a makastrek ken makapagtakaw ti maysa iti balay ti napigsa a tao no saanna nga igalut nga umuna ti napigsa a tao?
30 Ti saan a makikadua kaniak, busorennak; ket ti saan a tumulong kaniak nga agurnong, agiwara.+
31 “Gapuna kunak kadakayo, mapakawan ti aniaman a basol ti tao uray no agsao iti kinadakes, ngem saan a mapakawan no agsao maibusor iti espiritu.+
32 Mapakawan ti asinoman nga agsao maibusor iti Anak ti tao;+ ngem saan a mapakawan ti agsao maibusor iti nasantuan nga espiritu, iti daytoy man a sistema ti bambanag* wenno iti masanguanan.+
33 “No nasayaat ti kayom, nasayaatto ti bungana; no dakes ti kayom, dakesto met ti bungana. Ta mailasin ti kayo babaen ti bungana.+
34 Dakayo nga annak dagiti uleg,+ kasano a makapagsaokayo iti naimbag idinto ta dakeskayo? Ta sawen ti ngiwat ti linaon ti puso.+
35 Ti naimbag a tao agsao iti naimbag, gapu ta napno ti pusona iti naimbag a bambanag. Ti dakes a tao agsao iti dakes, gapu ta napno ti pusona iti dakes a bambanag.+
36 Ibagak kadakayo nga inton Aldaw ti Panangukom, manungsungbatto+ dagiti tattao iti aniaman nga awan mamaayna nga ibagada;
37 ta babaen ti sasaom maideklarakanto a nalinteg wenno nakabasol.”
38 Insungbat kenkuana ti sumagmamano nga eskriba ken Fariseo: “Mannursuro, mangaramidka man iti pagilasinan.”+
39 Kinuna ni Jesus: “Agtultuloy nga agbirok iti pagilasinan ti dakes ken saan a matalek* a henerasion, ngem awanto ti makitada malaksid iti pagilasinan a napasamak ken propeta Jonas.+
40 No kasano nga adda idi ni Jonas iti tian ti dakkel nga ikan iti tallo nga aldaw ken tallo a rabii,+ addanto met ti Anak ti tao iti uneg ti daga iti tallo nga aldaw ken tallo a rabii.+
41 Inton Aldaw ti Panangukom, mapagungarto dagiti taga-Nineve agraman daytoy a henerasion, ket babalawendanto daytoy a henerasion ta nagbabawida gapu iti panangasaba ni Jonas.+ Ngem adtoy! adda ditoy ti natantan-ok ngem ni Jonas.+
42 Inton Aldaw ti Panangukom, mapagungarto ti reyna ti abagatan agraman daytoy a henerasion, ket babalawennanto daytoy a henerasion ta immay dimngeg iti sirib ni Solomon uray adayo ti naggapuanna.+ Ngem adda ditoy ti natantan-ok ngem ni Solomon.+
43 “No rummuar ti dakes nga espiritu iti maysa a tao, agsursor kadagiti namaga a lugar tapno agbirok iti paginanaan. Ngem no awan ti masarakanna,+
44 kunana, ‘Agsubliak iti balay a pinanawak,’ ket inton makasubli, makitana a bakante ti balay, nadalus ken naarkosan.
45 Kalpasanna, agsubli ken mangikuyog iti pito nga espiritu a dakdakes ngem isuna. Inton makastrekdan, agnaeddan sadiay, ket dakdakesto ti kasasaad dayta a tao ngem idi damo.+ Kastanto met ti mapasamak iti daytoy a dakes a henerasion.”
46 Madama nga agsasao ni Jesus kadagiti tattao idi sumangpet ti inana ken dagiti kakabsatna.+ Nakatakderda iti ruar ket kayatda a makasarita.+
47 Gapuna, adda nangibaga kenkuana: “Nakatakder iti ruar ni nanangmo ken dagiti kakabsatmo. Kayatdaka a kasarita.”
48 Insungbat ni Jesus: “Asino ti inak, ken asino dagiti kakabsatko?”
49 Intudona dagiti adalanna ket kinunana: “Kitaenyo, ti inak ken dagiti kakabsatko!+
50 Ta asinoman a mangaramid iti pagayatan ni Amak nga adda idiay langit, isu ti kabsatko a lalaki, kabsatko a babai, ken inak.”+
Footnotes
^ Wenno “pamarang a tinapay.”
^ Lit., “nagango.”
^ Awag ken Satanas.
^ Lit., “mannakikamalala.”
