Ebanghelio ni Mateo 9:1-38

  • Paimbagen ni Jesus ti paralitiko (1-8)

  • Awisen ni Jesus ni Mateo (9-13)

  • Saludsod maipapan iti panagayunar (14-17)

  • Anak ni Jairo; sagiden ti maysa a babai ti makinruar a bado ni Jesus (18-26)

  • Paimbagen ni Jesus dagiti bulsek ken ti umel (27-34)

  • Adu ti anien ngem bassit ti agani (35-38)

9  Limmugan ni Jesus iti bangka ket bimmallasiw a napan iti siudadna.+  Adtoy! Impanda kenkuana ti maysa a lalaki a paralitiko a naikabil iti pagiddaan. Idi nakita ni Jesus ti pammatida, imbagana iti paralitiko: “Anak, dika madanagan! Napakawanen dagiti basolmo.”+  Kinuna ti dadduma nga eskriba: “Agsasao daytoy a tao maibusor iti Dios.”  Gapu ta ammo ni Jesus ti pampanunotenda, kinunana: “Apay nga agpampanunotkayo iti dakes?+  Ania ti nalaklaka nga ibaga, ‘Napakawanen dagiti basolmo,’ wenno, ‘Bumangonka ket magnaka’?+  Ngem tapno maammuanyo nga adda autoridad ti Anak ti tao a mangpakawan kadagiti basol ditoy daga—” imbagana iti paralitiko: “Bumangonka, bagkatem ta pagiddaam, ket agawidkan.”+  Bimmangon ti lalaki ket nagawiden.  Idi nakita daytoy dagiti tattao, nagbutengda ket indaydayawda ti Dios, a nangipaay iti kasta nga autoridad iti tao.  Idi pimmanaw ni Jesus sadiay, nakitana ti maysa a lalaki nga agnagan Mateo a nakatugaw iti opisina a pagbayadan iti buis. Kinunana: “Agbalinka a pasurotko.” Dagus a timmakder ket simmurot kenkuana.+ 10  Idi mangmangan* ni Jesus iti balay ni Mateo, immay ti adu a managbasol ken agsingsingir iti buis ket nanganda* a kaduana ken dagiti adalanna.+ 11  Ngem idi nakita daytoy dagiti Fariseo, kinunada kadagiti adalanna: “Apay a makipangpangan ti mannursuroyo kadagiti managbasol ken agsingsingir iti buis?”+ 12  Nangngegna ida ket kinunana: “Dagiti masakit ti agkasapulan iti doktor, saan a dagiti nasalun-at.+ 13  Adalenyo ti kaipapanan daytoy: ‘Asi ti kayatko, saan a daton.’+ Ta immayak tapno ayabak dagiti managbasol, saan a dagiti nalinteg.” 14  Kalpasanna, immay dagiti adalan ni Juan ket insaludsodda kenkuana: “Apay nga agay-ayunarkami kasta met dagiti Fariseo ngem saan nga agay-ayunar dagiti adalam?”+ 15  Kinuna ni Jesus: “Agladingit kadi dagiti gayyem ti nobio bayat a kaduada ti nobio?+ Ngem dumtengto ti tiempo a maipanaw kadakuada+ ti nobio, ket agayunardanto. 16  Awan ti asinoman a mangitakup iti baro a tela iti daan a lupot, ta no kumsen ti baro a tela mabennat ti daan a lupot ket dumakkel ti pigisna.+ 17  Awan met ti mangikabil iti baro nga arak iti daan a lalat a pagkargaan. No kasta ti aramidenda, bumtak ti lalat ket maibelleng ti arak ken madadael ti lalat. Ikargada ketdi ti baro nga arak iti baro a lalat a pagkargaan tapno saan nga agpada a maperdi dagita.” 18  Bayat nga agsasao ni Jesus, immasideg ti maysa nga agturay ket nagruknoy ken kinunana: “Mabalin a natay itan ti anakko a babai; ngem umayka ket iparabawmo ta imam kenkuana, ket agbiagto.”+ 19  Timmakder ngarud ni Jesus ken dagiti adalanna ket kimmuyogda kenkuana. 20  Adda babai a 12 a tawenen a marigrigatan gapu ta agpadpadara+ ket immasideg iti likudan ni Jesus ken sinagidna ti gayadan ti makinruar a badona,+ 21  ta pampanunotenna: “Uray masagidko laeng koma ti makinruar a badona, umimbagakon.” 22  Timmaliaw ni Jesus, ket kinunana idi nakitana ti babai: “Dika agbuteng, anakko! Pinaimbagnaka ti pammatim.”+ Dagus nga immimbag ti babai iti dayta nga oras.+ 23  Idi nakadanonen ni Jesus iti balay ti agturay ken nakitana dagiti agtoktokar iti plauta ken dagiti agsasangit,+ 24  kinunana: “Rummuarkayo, saan a natay ti ubing no di ket matmaturog laeng.”+ Ngem kinatkatawaanda. 25  Idi nakaruaren dagiti tattao, simrek ni Jesus iti ayan ti ubing, iniggamanna ti imana,+ ket bimmangon ti ubing.+ 26  Nagdinamag daytoy iti dayta a lugar. 27  Idi pumampanawen ni Jesus, simmurot ti dua a bulsek a lallaki,+ ket ipukpukkawda: “Kaasiannakami, Anak ni David.” 28  Idi nakastreken ni Jesus iti maysa a balay, immasideg ti dua a bulsek, ket insaludsodna: “Mamatikayo kadi a kabaelak nga aramiden daytoy?”+ Insungbatda: “Wen, Apo.” 29  Kalpasanna, sinagidna dagiti matada+ ket kinunana: “Maaramid ti pinatiyo a mapasamak.” 30  Ket naisubli ti panagkitada. Imbilin pay ni Jesus: “Diyo pulos ibagbaga daytoy iti asinoman.”+ 31  Ngem idi nakaruardan, impadamagda ti maipapan ken Jesus iti dayta a lugar. 32  Idi pumanawdan, impan dagiti tattao ken Jesus ti maysa nga umel a lalaki a naluganan iti demonio;+ 33  ket idi naparuaren ti demonio, nagsao ti umel a lalaki.+ Nagsiddaaw dagiti tattao ket kinunada: “Saantay pay a nakakita iti kastoy ditoy Israel.”+ 34  Ngem kinuna dagiti Fariseo: “Parparuarenna dagiti demonio babaen ti panguluen dagiti demonio.”+ 35  Napan ni Jesus iti amin a siudad ken purok, ket nangisuro kadagiti sinagoga ken inkaskasabana ti naimbag a damag maipapan iti Pagarian ken pinaimbagna ti amin a kita ti sakit.+ 36  Naasian kadagiti tattao idi nakitana ida,+ ta nalalatan ken naiwarawarada a kasla karnero nga awanan pastor.+ 37  Kinunana kadagiti adalanna: “Adu ti anien ngem bassit ti agani.+ 38  Ipakaasiyo ngarud iti Apo ti panagani a mangibaon kadagiti agani iti talonna.”+

Footnotes

Wenno “agsadsadag iti lamisaan.”
Wenno “nagsadagda iti lamisaan.”