Ebanghelio ni Mateo 25:1-46
25 “Ti Pagarian ti langit ket mayarig iti 10 a birhen a nangala kadagiti lamparada+ sa rimmuarda a mangsabat iti nobio.+
2 Lima kadakuada ti maag, ken lima ti masirib.+
3 Intugot dagiti maag ti lamparada ngem awan ti reserbada a lana,
4 idinto ta nangitugot dagiti masirib iti lamparada ken reserbada a lana.
5 Gapu ta awan pay ti nobio, nagdungsada amin ken nakaturogda.
6 Iti tengnga ti rabii, adda nangipukkaw: ‘Addan ti nobio! Inkay sabtenen.’
7 Timmakder ti 10 a birhen ket insaganada dagiti lamparada.+
8 Kinuna dagiti maag kadagiti masirib, ‘Ikkandakami man iti lanayo, ta dandanin maiddep dagiti lamparami.’
9 Insungbat dagiti masirib: ‘Amangan no kurang daytoy kadatayo amin. Inkay laengen gumatang iti lanayo kadagiti aglaklako.’
10 Idi napanda gimmatang, dimteng ti nobio. Dagiti nakasagana a birhen kimmuyogda kenkuana a simrek iti pagkasaran,+ ket nairikep ti ridaw.
11 Idi simmangpet ti dadduma a birhen, kinunada, ‘Apo, Apo, pastrekennakami!’+
12 Insungbatna, ‘Ibagak kadakayo ti pudno, dikay am-ammo.’
13 “Gapuna, agtultuloykayo nga agbantay+ ta diyo ammo ti aldaw wenno ti oras.+
14 “Ti Pagarian ket mayarig met iti maysa a tao a mapan iti sabali a pagilian. Sakbay a pimmanaw, inayabanna dagiti adipenna ket intalekna kadakuada dagiti sanikuana.+
15 Adda inikkanna iti lima a talento,* adda met inikkanna iti dua, ken adda pay inikkanna iti maysa. Inikkanna ida sigun iti abilidadda, sa pimmanaw.
16 Daydiay immawat iti lima a talento dagus nga innegosiona dayta ket nakaganansia iti lima.
17 Daydiay met immawat iti dua nakaganansia iti dua.
18 Ngem daydiay adipen nga immawat iti maysa inkalina ti kuarta* ti apona.
19 “Kalpasan ti napaut a tiempo, simmangpet ti apo ket nakikuenta kadagiti adipenna.+
20 Immasideg daydiay immawat iti lima a talento ken nangted iti lima pay a talento, ket kinunana, ‘Apo, inikkannak iti lima a talento ket nakaganansiaak iti lima.’+
21 Kinuna ti apona: ‘Nasayaat ti inaramidmo, naimbag ken matalek nga adipen! Matalekka iti sumagmamano a banag. Ipaaywankonto kenka ti adu a banag.+ Sumrekka ket makipagragsakka iti apom.’+
22 Immasideg met daydiay immawat iti dua a talento ket kinunana, ‘Apo, inikkannak iti dua a talento ket nakaganansiaak iti dua.’+
23 Kinuna ti apona: ‘Nasayaat ti inaramidmo, naimbag ken matalek nga adipen! Matalekka iti sumagmamano a banag. Ipaaywankonto kenka ti adu a banag. Sumrekka ket makipagragsakka iti apom.’
24 “Kamaudiananna, immasideg daydiay immawat iti maysa a talento ket kinunana: ‘Apo, ammok nga istriktoka, apitem ti saanmo nga immula ken idulinmo ti saanmo nga intaep.+
25 Nagbutengak isu nga inkalik ti intedmo a talento. Isublikon kenka.’
26 Kinuna ti apona: ‘Dakes ken sadut nga adipen, saan kadi nga ammom nga apitek ti saanko nga immula ken idulinko ti saanko nga intaep?
27 Apay ngarud a saanmo nga inted ti kuartak* kadagiti agpapautang tapno inton sumangpetak, isublim kaniak nga adda interesna?
28 “‘Alaenyo ngarud kenkuana ti talento ket itedyo iti daydiay addaan iti 10 a talento.+
29 Ta ti asinoman nga addaan, ad-adunto pay ti maited kenkuana ket aglaplapusananto. Ngem ti asinoman nga awanan, maalanto uray ti adda kenkuana.+
30 Ipuruakyo iti kasipngetan daytoy awan serserbina nga adipen, ket agsangit ken agngaretngetto.’
31 “Inton umay ti Anak ti tao+ nga addaan iti dakkel nga autoridad, a kaduana ti amin nga anghel,+ agtugawto iti nadayag a tronona.
32 Maurnongto amin a nasion iti sanguananna, ket paglalasinennanto dagiti tattao a kas iti panamaglalasin ti maysa a pastor kadagiti karnero ken kalding.
33 Ikabilnanto dagiti karnero+ iti kannawanna, ken dagiti kalding iti kannigidna.+
34 “Ibaganto ti Ari kadagidiay adda iti makannawanna: ‘Umaykayo, dakayo a binendisionan ni Amak, tawidenyo ti Pagarian a naisagana kadakayo manipud idi panangrugi ti sangatauan.
35 Ta idi nagbisinak, inikkandak iti kanek; idi nawawak, inikkandak iti inumek. Idi ganggannaetak, pinadagusdak;+
36 idi lamolamoak,* binaduandak.+ Idi nagsakitak, inaywanandak. Idi naibaludak, binisitadak.’+
37 Ibaganto kenkuana dagiti nalinteg: ‘Apo, kaanoka a nagbisin ket pinakandaka, wenno nawaw ket pinainumdaka?+
38 Kaano a nagbalinka a ganggannaet ket pinadagusdaka, wenno lamolamoka ket binaduandaka?
39 Kaanoka a nagsakit wenno naibalud ket binisitadaka?’
40 Isungbatto ti Ari, ‘Pudno kunak kadakayo, no inaramidyo dayta iti maysa kadagiti kanunumuan kadagitoy a kakabsatko, inaramidyo metten dayta kaniak.’+
41 “Kalpasanna, ibaganto ti Ari kadagidiay adda iti makannigidna: ‘Umadayokayo kaniak,+ dakayo a nailunod, ket mapankayo iti agnanayon nga apuy*+ a naisagana para iti Diablo ken kadagiti anghelna.+
42 Ta idi nagbisinak, saandak a pinakan; idi nawawak, saandak a pinainum.
43 Idi ganggannaetak, saandak a pinadagus; idi lamolamoak, saandak a binaduan; idi nagsakit ken naibaludak, saandak nga inaywanan.’
44 Ibagadanto met kenkuana: ‘Apo, kaanoka a nagbisin wenno nawaw wenno nagbalin a ganggannaet wenno lamolamo wenno nagsakit wenno naibalud ket saandaka a tinulongan?’
45 Isungbatto ti Ari: ‘Pudno kunak kadakayo, no saanyo nga inaramid dayta iti maysa kadagitoy a nanumo, saanyo met nga inaramid dayta kaniak.’+
46 Madadaelto dagitoy iti agnanayon,+ ngem agbiagto nga agnanayon dagiti nalinteg.”+
Footnotes
^ Lit., “pirak.”
^ Lit., “pirakko.”
^ Wenno “dandani awan ti pagbadok.”
^ Tumukoy daytoy iti agnanayon a pannakadadael.
