Ebanghelio ni Mateo 22:1-46

  • Ilustrasion maipapan iti padaya ti kasar (1-14)

  • Ti Dios ken ni Cesar (15-22)

  • Saludsod maipapan iti panagungar (23-33)

  • Dua a kangrunaan a bilin (34-40)

  • Ti kadi Kristo ket anak ni David? (41-46)

22  Nagusar manen ni Jesus kadagiti ilustrasion iti pannakisaritana kadakuada, ket kinunana:  “Mayarig ti Pagarian ti langit iti maysa nga ari a nangaramid iti selebrasion ti kasar+ ti anakna a lalaki.  Imbaonna dagiti adipenna nga ayabanda dagiti naawis iti selebrasion ti kasar, ngem saanda a kayat ti mapan.+  Nangibaon manen kadagiti sabali pay nga adipen, ket kinunana, ‘Ibagayo kadagidiay naawis: “Naisaganan dagiti taraon, napartin dagiti baka ken nalulukmeg nga animal, ket nakasaganan ti amin. Umaykayon iti selebrasion.”’  Ngem saanda a nangikankano, adda napan iti talonna, adda met napan iti negosiona;+  ngem dadduma kadakuada ti nangtiliw kadagiti adipenna, ket kinabkabil ken pinapatayda ida.  “Nakapungtot unay ti ari ket imbaonna dagiti soldadona tapno patayenda dagiti nangpapatay kadagiti adipenna ken puoranda ti siudadda.+  Kalpasanna, imbagana kadagiti adipenna, ‘Nakasaganan ti selebrasion ti kasar, ngem saan a maikari dagidiay naawis.+  Gapuna, mapankayo kadagiti dadakkel a kalsada, ket awisenyo iti selebrasion ti kasar ti asinoman a makitayo.’+ 10  Iti kasta, napan dagiti adipen kadagiti kalsada ket inummongda ti amin a nakitada, dakes man wenno naimbag; ket napno iti bisita* ti siled a pakaaramidan ti kasar. 11  “Idi simrek ti ari tapno kitaenna dagiti bisita, nakitana ti maysa a lalaki a saan a maitutop ti badona iti okasion. 12  Gapuna, kinuna ti ari, ‘Gayyem, apay nga addaka ditoy idinto ta saan a maitutop ti badom?’ Saan a nakauni ti lalaki. 13  Kinuna ti ari kadagiti adipenna, ‘Galutanyo ti ima ken sakana sa ipuruakyo iti kasipngetan, ket agsangit ken agngaretngetto.’ 14  “Ta adu ti naawis, ngem bassit dagiti napili.” 15  Pimmanaw dagiti Fariseo ket nagtutulagda tapno mapagsaoda ni Jesus iti pangtiliwanda kenkuana.+ 16  Gapuna, imbaonda dagiti pasurotda, agraman dagiti sumupsuporta ken Herodes,+ ket kinunada ken Jesus: “Mannursuro, ammomi a napudnoka, saanka a mangidumduma, ta saan a ti kasasaad ti panagbiag dagiti tattao ti kitkitaem, no di ket isursurom ti kinapudno maipapan iti pagayatan ti Dios. 17  Ibagam ngarud kadakami no ania ti makunam. Umiso* kadi ti agbayad iti buis* ken Cesar wenno saan?” 18  Ngem gapu ta ammo ni Jesus ti dakes a panggepda, kinunana: “Apay a subsubokendak, dakayo a managinsisingpet? 19  Ipakitayo kaniak ti sinsilio a pagbayad iti buis.” Nangtedda iti maysa a denario.* 20  Insaludsodna kadakuada: “Makinladawan ken makinnagan iti daytoy?” 21  Insungbatda: “Ni Cesar.” Kinuna ni Jesus: “Itedyo ngarud ken Cesar dagiti kukua ni Cesar, ngem itedyo iti Dios dagiti kukua ti Dios.”+ 22  Nagsiddaawda idi nangngegda dayta, sa pimmanawda. 23  Iti dayta nga aldaw, napan ken Jesus dagiti Saduceo a saan a mamati iti panagungar+ ket insaludsodda:+ 24  “Mannursuro, kinuna ni Moises: ‘No matay ti maysa a lalaki a saan a naaddaan iti anak, ti kabsatna a lalaki ti masapul a mangasawa iti nabalo nga ipagna tapno maaddaan iti anak ti natay a lalaki.’+ 25  Adda pito nga agkakabsat a lallaki. Nangasawa ti inauna ngem natay nga awan putotna, isu a ti sumaruno a kabsatna ti nangasawa ken baketna. 26  Kasta met laeng ti napasamak iti maikadua ken iti maikatlo, agingga iti maikapito. 27  Kamaudiananna, natay met ti babai. 28  Inton panagungar, asino ngarud kadagiti pito ti makin-asawa iti babai ta nagbalinda amin nga asawana?” 29  Insungbat ni Jesus: “Nagkamalikayo, ta diyo maawatan ti Kasuratan wenno ti pannakabalin ti Dios;+ 30  ta inton panagungar, saanto a mangasawa dagiti lallaki wenno makiasawa dagiti babbai, no di ket kasladanto kadagiti anghel idiay langit.+ 31  No maipapan iti panagungar, saanyo kadi a nabasa ti kuna ti Dios: 32  ‘Siak ti Dios ni Abraham ken ti Dios ni Isaac ken ti Dios ni Jacob’?+ Isu ti Dios, saan a dagiti natay, no di ket dagiti sibibiag.”+ 33  Nagsiddaaw dagiti tattao idi nangngegda ti pannursurona.+ 34  Idi nadamag dagiti Fariseo a saan a nakauni dagiti Saduceo, napanda ken Jesus kas grupo. 35  Maysa kadakuada, a nalaing iti Linteg, ti nagsaludsod tapno subokenna ni Jesus: 36  “Mannursuro, ania ti kangrunaan a bilin iti Linteg?”+ 37  Insungbatna: “‘Masapul nga ayatem ni Jehova* a Diosmo iti amin a pusom ken amin a kararuam* ken amin a panunotmo.’+ 38  Daytoy ti kangrunaan ken umuna a bilin. 39  Umasping iti dayta ti maikadua, ‘Masapul nga ayatem ti kaarrubam a kas iti bagim.’+ 40  Dagitoy a dua a bilin ti nakaibatayan ti intero a Linteg ken dagiti Propeta.”+ 41  Bayat nga adda pay laeng dagiti Fariseo, insaludsod ni Jesus:+ 42  “Ania ti makunayo maipapan iti Kristo? Makin-anak kenkuana?” Imbagada: “Ni David.”+ 43  Insaludsodna pay: “Apay ngarud a ti nasantuan nga espiritu tinignayna ni David+ a mangawag kenkuana iti Apo, idi kinunana: 44  ‘Imbaga ni Jehova* iti Apok: “Agtugawka iti makannawanko agingga nga ikabilko dagiti kabusormo iti baba dagiti sakam”’?+ 45  No Apo ti awag kenkuana ni David, kasano ngarud a nagbalin nga anakna?”+ 46  Awan ti naisungbatda. Manipud idin, awanen ti nakaitured nga agsaludsod kenkuana.

Footnotes

Wenno “kadagiti agsadag iti lamisaan.”
Wenno “Nainkalintegan.”
Kayatna a sawen, buis ti kada tao.
Kitaem ti App. B14.
Kitaem ti App. A5.
Kitaem ti Glosario.
Kitaem ti App. A5.