Ebanghelio ni Mateo 11:1-30
11 Idi nabilinen ni Jesus ti 12 nga adalanna, napan nangisuro ken nangasaba kadagiti asideg a siudad.+
2 Adda idi ni Juan iti pagbaludan+ ket idi nadamagna dagiti ar-aramiden ti Kristo, imbaonna dagiti adalanna+
3 tapno isaludsodda: “Sika kadi Daydiay Umay, wenno adda sabali?”+
4 Insungbat ni Jesus: “Agsublikayo ken Juan ket ipadamagyo ti mangmangngeg ken makitkitayo:+
5 Makakitan dagiti bulsek,+ makapagnan dagiti pilay, immimbagen dagiti agkukutel,+ makangngegen dagiti tuleng, napagungaren dagiti natay, ken maikaskasaban ti naimbag a damag+ kadagiti napanglaw.
6 Naragsak daydiay saan a maitibkol gapu kaniak.”+
7 Idi nakapanawdan, imbaga ni Jesus kadagiti tattao maipapan ken Juan: “Ania ti napanyo kinita idiay let-ang?+ Maysa a runo a mayang-angin?+
8 Ania ti nakitayo? Maysa a tao a nakabado iti nalamuyot* a lupot? Agnanaed dagiti nakabado iti nalamuyot iti balay dagiti ari.
9 Apay ngarud a rimmuarkayo? Tapno kitaenyo ti maysa a propeta? Wen, nakakitakayo iti propeta, ngem saan laeng a basta propeta.+
10 Isu daytoy daydiay tuktukoyen ti naisurat: ‘Adtoy! Ibaonko ti mensaherok nga umun-una ngem sika* a mangisagananto iti dalanmo!’+
11 Pudno kunak kadakayo, iti amin a nayanak, awan ti natantan-ok ngem ni Juan a Mammautisar. Ngem daydiay kanunumuan iti Pagarian ti langit ket natantan-ok ngem ni Juan.+
12 Idi pay panawen ni Juan a Mammautisar, ikagkagumaanen dagiti tattao ti sumrek iti Pagarian ti langit ket agballigi dagidiay saan a sumuko.+
13 Ta amin a Propeta ken ti Linteg nagipadtoda agingga ken Juan.+
14 Patienyo man wenno saan, isu ti ‘Elias a naipadto nga umay.’+
15 Asinoman nga adda lapayagna, dumngeg koma.
16 “Ania ti pangipadaak iti daytoy a henerasion?+ Kasda la kadagiti ubbing nga agtugtugaw kadagiti pagtagilakuan a mangipukpukkaw kadagiti kaay-ayamda:
17 ‘Tinokarandakayo iti plauta ngem saankayo a nagsala, nagdung-awkami ngem saanyo a dinanog ti bagiyo gapu iti ladingit.’
18 Immay met ni Juan a saan a nangnangan wenno immin-inum, ngem kuna dagiti tattao, ‘Adda demoniona.’
19 Immay ti Anak ti tao a mangmangan ken umin-inum,+ ngem kuna dagiti tattao, ‘Narawet ken mangnginum iti arak daytoy a tao, gayyem dagiti agsingsingir iti buis ken dagiti managbasol.’+ Nupay kasta, ti sirib mapaneknekan a nalinteg babaen kadagiti aramidna.”+
20 Binabalawna dagiti siudad a nakapasamakan ti kaaduan kadagiti milagrona gapu ta saanda a nagbabawi, ket kinunana:
21 “Kaasika pay, Corazin! Kaasika pay, Betsaida! Ta no napasamak koma idiay Tiro ken Sidon dagiti milagro a napasamak kadakayo, nabayag koman a nagbabawida babaen ti panagbadoda iti nakersang a lupot ken panagtugawda iti dapdapo.+
22 Ngem ibagak kadakayo, nalaglag-anto ti dusa ti Tiro ken Sidon ngem dakayo inton Aldaw ti Panangukom.+
23 Ket sika, Capernaum,+ maitan-okkanto kadi idiay langit? Maipababakanto iti Tanem;*+ ta no napasamak koma idiay Sodoma dagiti milagro a napasamak kenka, adda pay koma ita ti Sodoma.
24 Ngem ibagak kadakayo, nalaglag-anto ti dusa ti Sodoma ngem dakayo inton Aldaw ti Panangukom.”+
25 Iti dayta a tiempo, kinuna ni Jesus: “Idaydayawka, Ama, Apo ti langit ken daga, gapu ta inlemmengmo dagitoy kadagiti masirib ken nalaing ket impakitam kadagiti ubbing.+
26 Wen, O Ama, naaramid daytoy maitunos iti pagayatam.
27 Inyawaten kaniak ni Amak ti amin a banag,+ ket awan ti naan-anay a makaam-ammo iti Anak no di ti Ama;+ awan met ti naan-anay a makaam-ammo iti Ama no di ti Anak ken ti asinoman a kayat ti Anak a pangipakaammuan.+
28 Umaykayo kaniak, dakayo amin a nabannog ken madagdagsenan, ket pagin-awaenkayto.
29 Alaenyo ti sangolko ken agsursurokayo kaniak, ta naalumamay ken napakumbabaak,+ ket magin-awaankayto.*
30 Ta naasi* ti sangolko, ken nalag-an ti awitko.”
