Ebanghelio ni Mateo 26:1-75

  • Plano dagiti papadi a mangpapatay ken Jesus (1-5)

  • Naibukbok ken Jesus ti nabanglo a lana (6-13)

  • Ti maudi a Paskua ken ti panangtraidor (14-25)

  • Mairugi ti Pangrabii ti Apo (26-30)

  • Naipadto ti panaglibak ni Pedro (31-35)

  • Agkararag ni Jesus idiay Getsemani (36-46)

  • Naaresto ni Jesus (47-56)

  • Mabista iti Sanhedrin (57-68)

  • Ilibak ni Pedro ni Jesus (69-75)

26  Ita, idi naibagan ni Jesus dagitoy, kinunana kadagiti adalanna:  “Ammoyo a dua nga aldaw laengen sakbay ti Paskua,+ ket ti Anak ti tao mayawatto kadagiti tattao tapno maibitay iti kayo.”+  Kabayatanna, naguummong dagiti panguluen a papadi ken dagiti panglakayen dagiti umili iti paraangan ti nangato a padi a ni Caifas,+  ket nagtutulaganda+ a sikapan ni Jesus tapno matiliw* ken mapapatayda.  Ngem kinunada: “Ditay iranrana iti piesta amangan no mangriribuk dagiti tattao.”  Bayat nga adda ni Jesus idiay Betania iti balay ni Simon nga agkukutel,+  immasideg ti maysa a babai a nangitugot iti alabastro a pagkargaan iti nangina a nabanglo a lana, ket imbukbokna dayta iti ulo ni Jesus bayat a mangmangan.*  Nakapungtot dagiti adalan idi makitada daytoy ket kinunada: “Apay a sinayangna dayta?  Ta mabalin koma a nailako iti nangina sa naited kadagiti napanglaw.” 10  Ammo ni Jesus ti ibagbagada isu a kinunana: “Apay a kasta ti ibagbagayo iti daytoy a babai? Nasayaat ti inaramidna kaniak. 11  Ta kanayon a kaduayo dagiti napanglaw,+ ngem saan a kanayon a kaduadak.+ 12  Idi imbukbokna iti bagik ti nabanglo a lana, insagananak para iti pannakaitabonko.+ 13  Pudno kunak kadakayo, sadinoman a pakaikasabaan daytoy naimbag a damag iti intero a lubong, maipadamagto met ti inaramid daytoy a babai kas pakalaglagipan kenkuana.”+ 14  Kalpasanna, ti maysa kadagiti Sangapulo ket Dua, daydiay maawagan Judas Iscariote,+ ket napan kadagiti panguluen a papadi+ 15  sa kinunana: “Ania ti itedyo kaniak no traidorek?”+ Inkarida a mangtedda iti 30 a pedaso a pirak.+ 16  Manipud idin, nangbirbirok ni Judas iti nasayaat a gundaway a mangtraidor kenkuana. 17  Iti umuna nga aldaw ti Piesta ti Tinapay nga Awan Lebadurana,+ immasideg ken Jesus dagiti adalanna ket insaludsodda: “Sadino ti kayatmo a pangisaganaanmi iti pangrabii ti Paskua?”+ 18  Insungbatna: “Mapankayo iti siudad ket makakitakayo iti maysa a lalaki. Ibagayo, ‘Kuna ti Mannursuro: “Asidegen ti tiempo nga ipapatayko. Selebrarak ken dagiti adalak ti Paskua iti balaymo.”’” 19  Isu nga inaramid dagiti adalan ti imbilin ni Jesus ket nagsaganada para iti Paskua. 20  Idi rumabiin,+ nagsadag ni Jesus ken ti 12 nga adalanna iti lamisaan.+ 21  Bayat a mangmanganda, kinunana: “Pudno kunak kadakayo, maysa kadakayo ti mangtraidorto kaniak.”+ 22  Naladingitanda unay iti daytoy ket kinunada amin kenkuana: “Apo, saan a siak, di ngamin?” 23  Insungbatna: “Daydiay mangisawsaw iti tinapayna iti malukong a pagisawsawsawak isunto ti mangtraidor kaniak.+ 24  Pudno a pumanawto ti Anak ti tao, kas iti naisurat maipapan kenkuana, ngem kaasi pay+ ti mangtraidor iti Anak ti tao!+ Nasaysayaat no saan koman a nayanak.”+ 25  Kinuna ni Judas, a dandani idin mangtraidor kenkuana: “Siak kadi dayta, Rabbi?” Insungbat ni Jesus: “Sika a mismo ti nangibaga iti dayta.” 26  Bayat a mangmanganda, nangala ni Jesus iti tinapay ket kalpasan a dimmawat iti pamendision, pinispisina+ sa intedna kadagiti adalanna sa kinunana: “Mangalakayo ket kanenyo, ta daytoy ti mangisimbolo iti bagik.”+ 27  Kalpasanna, nangala iti kopa, nagyaman iti Dios sa intedna kadakuada ket kinunana: “Uminumkayo amin,+ 28  ta daytoy ti mangisimbolo iti darak nga isu ti ‘dara+ ti tulag,’+ a maibukbok para iti adu+ tapno mapakawan dagiti basol.+ 29  Ngem ibagak kadakayo: Diakto uminumen iti daytoy nga arak ti ubas agingga nga uminumak iti baro nga arak iti Pagarian ni Amak.”+ 30  Kalpasan a nagkantada iti panangidaydayaw,* napanda iti Bantay Dagiti Olibo.+ 31  Kinuna ni Jesus: “Iti daytoy a rabii, maitibkolkayto amin, ta naisurat: ‘Patayekto ti pastor, ket mawarawaranto dagiti karnero iti arban.’+ 32  Ngem kalpasan a mapagungarak, umun-unaakto ngem dakayo a mapan idiay Galilea.”+ 33  Ngem insungbat ni Pedro: “Uray maitibkolda amin, saanakto a pulos a maitibkol!”+ 34  Kinuna ni Jesus: “Pudno kunak kenka, sakbay nga agtaraok ti kawitan ita a rabii, namitlonton nga inlibaknak.”+ 35  Kinuna ni Pedro: “Uray pay pakatayak, dikanto pulos ilibak.”+ Kasta met laeng ti imbaga ti dadduma pay nga adalan. 36  Napan ni Jesus ken dagiti adalanna iti lugar a maawagan Getsemani,+ ket kinunana kadakuada: “Agtugawkayo ditoy ta mapanak agkararag.”+ 37  Inkuyogna ni Pedro ken ti dua nga annak ni Zebedeo, ket nagladingit ken nariribukan unay.+ 38  Imbagana kadakuada: “Napalalo ti ladingitko. Ditoykayo laeng, ket kaduaendak nga agtultuloy nga agbantay.”+ 39  Immadayo bassit, nagrukob ket inkararagna:+ “Ama, no mabalin, ikkatem koma kaniak daytoy a kopa.+ Ngem saan a ti pagayatak ti matungpal no di ket ti pagayatam.”+ 40  Idi nagsubli, nadanonanna a matmaturog dagiti adalan isu a kinunana ken Pedro: “Didak aya makadua nga agtultuloy nga agbantay uray maysa laeng nga oras?+ 41  Itultuloyyo ti agbantay+ ken itultuloyyo ti agkararag,+ tapno saankayo a masulisog.+ Ta magagaran* ti espiritu, ngem nakapuy ti lasag.”+ 42  Immadayo manen ni Jesus ket inkararagna: “Ama, no mabalin, lumasat koma kaniak daytoy a kopa. Ngem saan a ti pagayatak ti matungpal no di ket ti pagayatam.”+ 43  Idi nagsubli, nadanonanna manen ida a matmaturog, ta makaturturogda la unay. 44  Immadayo manen tapno agkararag iti maikatlo a daras ket inulitna ti inkararagna. 45  Idi nagsubli kadagiti adalanna, kinunana: “Saan nga ita ti tiempo a maturog ken aginanakayo! Adtoy! Dimtengen ti oras a matraidor ti Anak ti tao ken mayawat kadagiti managbasol. 46  Tumakderkayo, intayon. Adtoy! Addan ti mangtraidor kaniak!” 47  Agsasao pay laeng ni Jesus idi sumangpet ni Judas, a maysa kadagiti Sangapulo ket Dua. Adu ti kaduana a nakaiggem iti espada ken pang-or nga imbaon dagiti panguluen a papadi ken panglakayen dagiti umili.+ 48  Kastoy ti pagilasinan nga imbaga kadakuada ti mangtraidor kenkuana: “Asinoman nga agepak, isu daydiay; tiliwenyo, alaenyo.” 49  Immasideg a dagus ken Jesus ket kinunana: “Naimbag a rabiim, Rabbi!” sa inagepanna a sidudungngo. 50  Ngem kinuna ni Jesus kenkuana: “Apay nga addaka ditoy?”+ Immasideg dagiti tattao ket tiniliw ken innalada ni Jesus. 51  Ngem inasut ti maysa kadagiti kadua ni Jesus ti espadana sa piningasna ti lapayag ti adipen ti nangato a padi.+ 52  Kinuna ni Jesus kenkuana: “Isublim ta espadam iti kalubanna,+ ta ti mangusar iti espada matayto iti espada.+ 53  Saanmo aya nga ammo a kabaelak ti agpatulong ken Amak tapno mangibaon a dagus iti nasurok a 12 a lehion nga anghel?+ 54  Ngem no aramidek dayta, kasano a matungpal ti kuna ti Kasuratan a masapul a mapasamak?” 55  Ngem kinuna ni Jesus kadagiti tattao: “Umaydak kadi tiliwen a kas iti mannanakaw ta nangitugotkayo pay kadagiti espada ken pang-or? Inaldaw a nakatugawak idi idiay templo a mangisursuro,+ ngem didak tiniliw.+ 56  Ngem maaramid amin dagitoy tapno matungpal ti insurat* dagiti propeta.”+ Kalpasanna, nagpapanaw amin nga adalan ket binaybay-anda ni Jesus.+ 57  Idi natiliwda ni Jesus, impanda ken Caifas+ a nangato a padi. Naguummong sadiay dagiti eskriba ken panglakayen.+ 58  Ngem simmursurot ni Pedro iti saan unay nga adayo, agingga iti paraangan ti nangato a padi. Simrek iti uneg ket nakikatugaw kadagiti agserserbi iti balay tapno maammuanna ti mapasamak.+ 59  Nagbirbirok dagiti panguluen a papadi ken ti intero a Sanhedrin iti ulbod a pammaneknek kontra ken Jesus tapno mapapatayda.+ 60  Ngem awan ti nasarakanda, uray no adu ti mayat nga agtestigo maikontra kenkuana.+ Kamaudiananna, adda dua nga immasideg 61  ket kinunada: “Imbaga daytoy a tao, ‘Kabaelak a rebbaen ti templo ti Dios sa bangonek iti tallo nga aldaw.’”+ 62  Gapuna, timmakder ti nangato a padi ket kinunana ken Jesus: “Awan kadi ti maisungbatmo? Ania ti makunam kadagitoy nga ipabpabasolda kenka?”+ 63  Ngem saan a nagun-uni ni Jesus,+ isu a kinuna ti nangato a padi: “Agsapataka iti sanguanan ti sibibiag a Dios ket ibagam kadakami no sika ti Kristo nga Anak ti Dios!”+ 64  Kinuna kenkuana ni Jesus: “Sika a mismo ti nangibaga iti dayta. Ngem ibagak kenka: Manipud ita, makitayonto ti Anak ti tao+ a nakatugaw iti makannawan Daydiay Mannakabalin+ ken um-umay kadagiti ulep ti langit.”+ 65  Gapuna, pinigis ti nangato a padi ti makinruar a badona, ket kinunana: “Agsasao maibusor iti Dios! Kasapulantay pay kadi dagiti testigo? Nangngegyo a mismo ti dakes nga imbagana! 66  Ania ti makunayo?” Insungbatda: “Maikari a mapapatay.”+ 67  Tinuptupraanda ti rupana+ ken dinandanogda.+ Adda met dagiti nangtungtungpa kenkuana+ 68  a nagkuna: “Sika a Kristo, no propetaka, ibagam man no asino ti nangkabil kenka?” 69  Agtugtugaw idi ni Pedro iti paraangan, ket adda immasideg nga adipen a babai, a nagkuna: “Uray sika, nakikadkaduaka met idi ken Jesus a taga-Galilea!”+ 70  Ngem naglibak iti sanguananda amin ket kinunana: “Diak ammo ti ibagbagam.” 71  Idi rimmuar iti ruangan ti balay, adda sabali pay a babai a nakakita kenkuana a nangibaga kadagiti adda sadiay: “Nakikadkadua met idi daytoy a lalaki ken Jesus a Nazareno.”+ 72  Naglibak manen, ket insapatana: “Diak am-ammo dayta a tao!” 73  Di nagbayag, immasideg dagiti agtaktakder iti aglawlaw ket kinunada ken Pedro: “Saankan nga aglibak a maysaka kadakuada, ta madlaw iti panagsasaom.”* 74  Ngem nagilunod ken nagsapata: “Diak am-ammo dayta a tao!” Dagus a nagtaraok ti kawitan. 75  Nalagip ni Pedro ti imbaga ni Jesus: “Sakbay nga agtaraok ti kawitan, namitlonton nga inlibaknak.”+ Rimmuar ket nagsangit gapu iti napalalo a ladingitna.

Footnotes

Wenno “maaresto.”
Wenno “nga agsadsadag iti lamisaan.”
Wenno “salmo.”
Wenno “situtulok.”
Wenno “kasuratan.”
Wenno “ayugmo.”