Ebanghelio ni Mateo 27:1-66
27 Idi bumigaten, nagtutulag ti amin a panguluen a papadi ken panglakayen dagiti umili no kasanoda a papatayen ni Jesus.+
2 Ginalutanda dagiti imana sa impanda ken Pilato a gobernador.+
3 Nasentensiaan ni Jesus a mapapatay. Idi naammuan dayta ni Judas a nangtraidor kenkuana, nakonsiensia ket insublina ti 30 a pedaso a pirak kadagiti panguluen a papadi ken panglakayen.+
4 Imbagana: “Nagbasolak ta trinaidorko ti nalinteg a tao.”* Insungbatda: “Ania koma ti bibiangmi? Problemam daytan!”
5 Gapuna, impuruakna iti templo dagiti pedaso a pirak sa pimmanaw ket nagbitay.+
6 Ngem pinidut dagiti panguluen a papadi dagiti pirak ket kinunada: “Saan nga umiso nga ikabil dagitoy iti sagrado a pagidulinan iti gameng, ta bayad dagitoy ti dara.”
7 Idi nalpasdan a nagsasarita, inusarda ti kuarta a manggatang iti daga ti agdamdamili a pakaitabonan dagiti estranghero.
8 Gapuna, naawagan dayta iti Talon ti Dara+ agingga ita.
9 Iti kasta, natungpal ti naipadto babaen ken propeta Jeremias: “Innalada ti 30 a pedaso a pirak, ti gatad a nagtutulagan ti dadduma nga annak ni Israel nga ibayad para kenkuana,
10 ket inggatangda iti daga ti agdamdamili, sigun iti imbilin kaniak ni Jehova.”*+
11 Nagtakder ni Jesus iti sango ti gobernador, ket insaludsod ti gobernador: “Sika kadi ti Ari dagiti Judio?” Insungbat ni Jesus: “Sika a mismo ti nangibaga iti dayta.”+
12 Ngem saanna a sinungbatan dagiti pammabasol dagiti panguluen a papadi ken panglakayen.+
13 Insaludsod ni Pilato: “Saanmo kadi a mangngeg ti adu nga ipabpabasolda kenka?”
14 Ngem saan a pulos a simmungbat, isu a nagsiddaaw unay ti gobernador.
15 Tunggal piesta, kaugalian idi a mangwayawaya ti gobernador iti maysa a balud, daydiay kayat dagiti tattao.+
16 Nakabalud idi a tiempo ti maysa a nakadakdakes a kriminal nga agnagan Barabas.
17 Gapuna, idi naguummong dagiti tattao, insaludsod kadakuada ni Pilato: “Asino ti kayatyo a wayawayaak, ni Barabas wenno ni Jesus a maawagan Kristo?”
18 Ta ammo ni Pilato nga apal ti makagapu nga inyawatda ni Jesus kenkuana.
19 Kasta met, bayat a nakatugaw iti pangukoman, impaibaga ti asawana: “Dimo bibiangan dayta a nalinteg a tao, ta nagsagabaak ita nga aldaw gapu iti natagtagainepko maipapan kenkuana.”
20 Ngem dagiti panguluen a papadi ken panglakayen sinugsoganda dagiti tattao a kiddawenda a mawayawayaan ni Barabas,+ ngem mapapatay ni Jesus.+
21 Kinuna ti gobernador: “Asino kadagiti dua ti kayatyo a wayawayaak?” Insungbatda: “Ni Barabas.”
22 Imbaga ni Pilato: “Ania ngarud ti aramidek ken Jesus a maawagan Kristo?” Insungbatda amin: “Ibitaymo iti kayo!”+
23 Kinunana: “Apay? Ania ti dakes nga inaramidna?” Ngem inyad-addada nga impukkaw: “Ibitaymo iti kayo!”+
24 Idi makita ni Pilato nga awanen ti maaramidanna ken ad-adda laeng a nakapungtot dagiti tattao, nangala iti danum ket binugguanna dagiti imana iti sanguananda sa kinunana: “Awan basolko iti dara daytoy a tao. Dakayo ti makimbasol.”
25 Iti kasta, kinuna ti amin a tattao: “Dakami ken dagiti annakmi ti makimbasol iti darana.”+
26 Winayawayaanna ni Barabas, ngem pinasaplitna ni Jesus+ ken inyawatna kadagiti soldado tapno maibitay iti kayo.+
27 Kalpasanna, dagiti soldado ti gobernador impanda ni Jesus iti pagtaengan ti gobernador sa inummongda ti amin a soldado.+
28 Inikkatda ti badona ket kinagayanda iti nalabaga a lupot.+
29 Nangaramidda iti korona a sisiit ket inkabilda iti ulona ken nangalada iti runo nga impaiggemda iti kannawan nga imana. Nagparintumengda iti sanguananna, sa inyang-angawda: “Agbiagka,* Ari dagiti Judio!”
30 Tinupraanda+ ket innalada ti runo sa impakpak-olda iti ulona.
31 Idi nalpasdan a nagang-angawan, inikkatda ti kagayna ken insuotda kenkuana ti makinruar a badona, sa inruarda tapno mailansa iti kayo.+
32 Bayat a rumrummuarda, nasabatda ti maysa a lalaki a taga-Cirene nga agnagan Simon. Pinilitda daytoy a lalaki a mangawit iti kayo a pagtutuokan* ni Jesus.+
33 Idi nakadanonda iti lugar a maaw-awagan Golʹgo·tha, kayatna a sawen, Lugar ti Bangabanga,+
34 inikkanda ni Jesus iti arak a nalaokan iti apro,*+ ngem idi naramananna, saanna a kayat nga inumen.
35 Idi nailansadan iti kayo, nagbibingayanda dagiti makinruar a badona babaen ti binnunot,+
36 ket nagtugawda a mangbambantay kenkuana.
37 Insuratda met iti ngatuen ti ulona ti kastoy a pammabasol kenkuana: “Daytoy ni Jesus nga Ari Dagiti Judio.”+
38 Adda dua a mannanakaw a nailansa iti kayo iti abayna, maysa iti kannawanna ken maysa iti kannigidna.+
39 Uy-uyawen dagiti lumablabas+ ken agwingwingiwingda,+
40 nga ibagbagada: “Sika a mangrebba iti templo sa bangonem iti tallo nga aldaw,+ isalakanmo ta bagim! No anaknaka ti Dios, umulogka iti kayo a pagtutuokan!”*+
41 Nagang-angawan met dagiti panguluen a papadi agraman dagiti eskriba ken panglakayen ket kinunada:+
42 “Insalakanna ti dadduma ngem dina maisalakan ti bagina! No isu ti Ari ti Israel,+ umulog koma iti kayo a pagtutuokan* ket mamatikamto kenkuana.
43 Agtaltalek iti Dios. No talaga nga ipatpateg ti Dios, kitaentay man no isalakanna,+ ta ibagbagana, ‘Siak ti Anak ti Dios.’”+
44 Linalais met uray dagiti mannanakaw a nailansa iti abayna.+
45 Idi agarup alas dose ti aldaw,* simmipnget ti intero a lugar agingga iti agarup alas tres ti malem.*+
46 Agarup alas tres ti malem* idi impukkaw ni Jesus: “Eʹli, Eʹli, laʹma sa·bach·thaʹni?” a kayatna a sawen, “Diosko, Diosko, apay a binaybay-annak?”+
47 Idi nangngeg daytoy ti dadduma nga agtaktakder sadiay, kinunada: “Ay-ayabanna ni Elias.”+
48 Dagus a timmaray ti maysa kadakuada ket nangala iti espongha, insawsawna iti naalsem nga arak, ken inkabilna iti maysa a runo sa intedna ken ni Jesus tapno inumenna.+
49 Ngem kinuna ti dadduma: “Bay-anyo! Kitaentayo man no umay isalakan ni Elias.”
50 Nagpukkaw manen ni Jesus sa nauyosen ti biagna.*+
51 Adtoy! Napisang ti kortina ti santuario,+ manipud ngato nga agpababa,+ ket nagginggined ken naburak dagiti bato.
52 Naluktan dagiti tanem* ket adu a bangkay ti naipalladaw
53 ket nakita dagita ti adu a tattao. (Kalpasan a napagungar ni Jesus, napan iti nasantuan a siudad ti dadduma a tattao a naggapu kadagiti tanem.)
54 Nagbuteng iti kasta unay ti opisial ti armada ken dagiti kakaduana a mangbambantay ken Jesus idi nariknada ti ginggined ken nakitada ti napasamak. Kinunada: “Talaga a daytoy ti Anak ti Dios.”+
55 Agbuybuya iti saan unay nga adayo ti adu a babbai a simmurot ken Jesus manipud Galilea tapno agserbida kenkuana.+
56 Karaman kadakuada ni Maria Magdalena, ni Maria nga ina da Santiago ken Joses, ken ti ina dagiti annak ni Zebedeo.+
57 Idi mumalemen, immasideg ti maysa a baknang a taga-Arimatea, nga agnagan Jose, a nagbalin met nga adalan ni Jesus.+
58 Napan ken Pilato ket kiniddawna ti bangkay ni Jesus.+ Imbilin ni Pilato a maited dayta kenkuana.+
59 Innala ni Jose ti bangkay, binalkutna iti nadalus ken dekalidad a lienso a lupot+
60 sa inkabilna iti baro a tanem* iti uneg ti dakkel a bato+ nga agpaay koma kenkuana. Nangitulid iti dakkel a bato a pinangserrana iti tanem* sa pimmanaw.
61 Ngem nagtalinaed sadiay ni Maria Magdalena ken ti sabali pay a Maria, a nagtugawda iti sango ti tanem.+
62 Iti sumaruno nga aldaw kalpasan ti Panagsagana,+ napan dagiti panguluen a papadi ken Fariseo iti sanguanan ni Pilato,
63 ket kinunada: “Apo, malagipmi nga imbaga dayta nga impostor idi sibibiag pay, ‘Agungarakto kalpasan ti tallo nga aldaw.’+
64 Isu nga ibilinmo a mabantayan ti tanemna agingga iti maikatlo nga aldaw, tapno saan a mapan takawen dagiti adalanna ti bangkay+ sa ibagadanto kadagiti tattao, ‘Napagungaren!’ No kasta ti mapasamak, dakdakesto daytoy maudi a panangallilaw ngem ti immuna.”
65 Kinuna ni Pilato: “Mangalakayo kadagiti guardia ket pabantayanyo a naimbag ti tanem.”
66 Pimmanawda ket rinikpanda a naimbag ti tanem babaen ti dakkel a bato sa pinaguardiaanda.
Footnotes
^ Lit., “inosente a dara.”
^ Wenno “Madaydayawka.”
^ Napait a likido.
^ Lit., “maikanem nga oras.”
^ Lit., “maikasiam nga oras.”
^ Lit., “maikasiam nga oras.”
^ Wenno “nagsaten ti angesna.”
^ Wenno “pakalaglagipan a tanem.”
^ Wenno “pakalaglagipan a tanem.”
^ Wenno “pakalaglagipan a tanem.”
