Ebanghelio ni Mateo 7:1-29

  • SERMON ITI BANTAY (1-27)

    • Isardeng ti mangukom (1-6)

    • Itultuloy ti agdawat, agsapul, agtuktok (7-11)

    • Nabalitokan a Bilin (12)

    • Akikid a ruangan (13, 14)

    • Mailasin babaen kadagiti bungada (15-23)

    • Balay iti rabaw ti bato, balay iti kadaratan (24-27)

  • Nagsiddaaw ti adu a tattao iti panangisuro ni Jesus (28, 29)

7  “Isardengyo ti mangukom+ tapno saankayo a maukom;  ta maukomkayto sigun iti panangukomyo iti sabsabali,+ ken rukodendakayto sigun iti rukod a pangrukrukodyo.+  Apay ngarud a dillawem ti puling iti mata ti kabsatmo idinto ta dimo pay madlaw ti kayo dita matam?+  Wenno ibagam kadi iti kabsatmo, ‘Ikkatek man ti puling dita matam,’ idinto ta adtoy! adda met kayo dita matam?  Aginsisingpet! Ikkatem nga umuna ti kayo dita matam tapno nalawag a makitam ti ikkatem a puling iti mata ti kabsatmo.  “Diyo ited kadagiti aso ti aniaman a nasantuan wenno ipuruak kadagiti baboy dagiti perlasyo,+ tapno saanda koma a baddebaddekan dagita sa dangrandakayo.  “Itultuloyyo ti agdawat, ket maikkankayto;+ itultuloyyo ti agsapul, ket makasarakkayto; itultuloyyo ti agtuktok, ket mailukatankayto;+  ta asinoman nga agdawat maikkanto,+ ken asinoman nga agsapul makasarakto, ken asinoman nga agtuktok mailukatanto.  Adda kadi asinoman kadakayo a mangted iti bato no dumawat ti anakna iti tinapay? 10  Wenno mangted kadi iti uleg no dumawat iti ikan? 11  No dakayo, nupay dakeskayo, ammoyo ti mangted iti nagsasayaat a sagut kadagiti annakyo, anian nga ad-adda pay ni Amayo idiay langit! Sigurado nga ikkanna iti naimbag a bambanag+ dagidiay agdawdawat kenkuana!+ 12  “Aramidenyo ngarud kadagiti tattao ti amin a kayatyo nga aramidenda kadakayo.+ Kinapudnona, dayta ti isursuro ti Linteg ken dagiti Propeta.+ 13  “Sumrekkayo iti akikid a ruangan,+ gapu ta ti akaba a ruangan ken nalawa a dalan ket agturong iti pannakadadael, ket adu ti sumrek iti dayta; 14  idinto ta ti akikid a ruangan ken nailet a dalan ket agturong iti biag, ket manmano ti makasarak iti dayta.+ 15  “Agannadkayo kadagiti ulbod a propeta+ nga agpampammarang a kas karnero,+ ngem ti agpayso, narawetda a lobo.+ 16  Mailasinyonto ida babaen iti bungada. Adda aya maburasyo nga ubas iti siitan a kayo wenno higos iti kalunay?+ 17  Kasta met, nasayaat ti bunga ti tunggal nasayaat a kayo, ngem dakes ti bunga ti tunggal dakes* a kayo.+ 18  Ti nasayaat a kayo saan nga agbunga iti dakes, ket ti dakes a kayo saan met nga agbunga iti nasayaat.+ 19  Mapukan ken mapuoran ti tunggal kayo a saan a nasayaat ti bungana.+ 20  Mailasinyonto ngarud dagita a tattao babaen iti bungada.+ 21  “Saan a ti tunggal maysa nga agkuna kaniak, ‘Apo, Apo,’ makastrekto iti Pagarian ti langit, no di ket daydiay laeng mangar-aramid iti pagayatan ni Amak nga adda idiay langit.+ 22  Adunto ti agkuna kaniak iti dayta nga aldaw: ‘Apo, Apo,+ saan aya a nagipadtokami iti naganmo, ken nangparuar kadagiti demonio iti naganmo, ken nagaramid iti adu a milagro iti naganmo?’+ 23  Ngem ibagakto kadakuada: ‘Saankayo nga am-ammo! Pumanawkayo, dakayo nga agar-aramid iti dakes!’+ 24  “Gapuna, asinoman a dumngeg ken mangtungpal kadagitoy a sasaok ket mayarig iti masirib a tao a nangibangon iti balayna iti rabaw ti dakkel a bato.+ 25  Nagtudo ket naglayus ken nagangin iti napigsa ngem saan a narba dayta a balay ta naibangon iti rabaw ti dakkel a bato. 26  Ngem asinoman a saan a dumngeg ken mangtungpal kadagitoy a sasaok ket mayarig iti maag a tao a nangibangon iti balayna iti kadaratan.+ 27  Nagtudo ket naglayus ken nagangin iti napigsa ket narba dayta a balay.+ Nakaro ti pannakadadaelna.” 28  Idi naibagan ni Jesus dagitoy, nagsiddaaw ti adu a tattao iti pamay-an ti panangisurona,+ 29  ta nangisuro kas maysa nga addaan autoridad,+ saan ket a kas kadagiti eskriba.

Footnotes

Lit., “rinuker.”