Ebanghelio ni Lucas 11:1-54

  • No kasano ti agkararag (1-13)

    • Pagtuladan a kararag (2-4)

  • Ramay ti Dios ti nangparuar kadagiti demonio (14-23)

  • Agsubli dagiti dakes nga espiritu (24-26)

  • Pudno a kinaragsak (27, 28)

  • Pagilasinan a napasamak ken Jonas (29-32)

  • Lampara ti bagi (33-36)

  • Kaasi pay dagiti relihioso a managinsisingpet (37-54)

11  Agkarkararag idi iti maysa a lugar ket idi nalpasen, kinuna ti maysa kadagiti adalanna: “Apo, isuronakami nga agkararag, kas iti panangisuro ni Juan kadagiti adalanna.”  Kinunana kadakuada: “No agkararagkayo, kunayo: ‘Ama, masantipikar koma* ti naganmo.+ Umay koma ti Pagariam.+  Itedmo koma ti taraonmi* sigun iti inaldaw a kasapulanmi.+  Pakawanem koma dagiti basolmi,+ ta pakawanenmi met dagiti nakautang kadakami;+ ken dinakami iyeg iti sulisog.’”+  Kinuna pay ni Jesus: “Kas pagarigan, adda gayyemyo ket mapankayo kenkuana iti tengnga ti rabii, ket kunayo, ‘Gayyem, pabulodannak man pay laeng iti tallo a tinapay,  ta simmangpet ti maysa kadagiti gagayyemko manipud iti biahena ket awan ti maipasangok kenkuana.’  Ngem simmungbat ti gayyemyo, ‘Dinak istorbuen. Nakaserran ti ridaw, ken matmaturogkamin kadagiti annakko. Saankon a mabalin ti bumangon ken mangted kenka iti aniaman.’  Ibagak kadakayo, uray no saan a bumangon ken saan a mangted iti aniaman gapu ta gayyemna, sigurado a bumangon gapu iti natured a panangipilit ti gayyemna+ ket itedna ti aniaman a kasapulanna.  Isu a kunak kadakayo, itultuloyyo ti agdawat,+ ket maikkankayto; itultuloyyo ti agsapul, ket makasarakkayto; itultuloyyo ti agtuktok, ket mailukatankayto.+ 10  Ta asinoman nga agdawat maikkanto,+ ken asinoman nga agsapul makasarakto, ken asinoman nga agtuktok mailukatanto. 11  Kinapudnona, adda kadi ama a no dumawat ti anakna iti ikan, ikanna iti uleg imbes nga ikan?+ 12  Wenno no dumawat iti itlog, ikkanna kadi iti manggagama? 13  No dakayo, nupay dakeskayo, ammoyo ti mangted iti nagsasayaat a sagut kadagiti annakyo, anian nga ad-adda pay ti Ama idiay langit a mangted iti nasantuan nga espiritu kadagidiay agdawdawat kenkuana!”+ 14  Kalpasanna, pinaruarna ti maysa a demonio iti umel a lalaki.+ Idi nakaruaren ti demonio, makasaon ti lalaki isu a nasdaaw dagiti tattao.+ 15  Ngem adda dagiti mangibagbaga: “Parparuarenna dagiti demonio babaen ken Beelzebub* a panguluen dagiti demonio.”+ 16  Ngem kayat ti dadduma a suboken ni Jesus isu a kiniddawda a mangipakita iti pagilasinan+ manipud iti Dios. 17  Gapu ta ammo ni Jesus ti pampanunotenda,+ kinunana: “Marpuog ti pagarian a saan nga agkaykaysa dagiti umilina, ken mawarawara ti sangakabbalayan a saan nga agtutunos dagiti miembrona. 18  Kasta met, no lablabanan ni Satanas ti bagina, kasano a mataginayon ti pagarianna? Ta ibagbagayo a mangparparuarak kadagiti demonio babaen ken Beelzebub. 19  No paruarek dagiti demonio babaen ken Beelzebub, nangalaan ngarud dagiti annakyo iti pannakabalin a mangparuar kadagiti demonio? Gapuna, isudanto ti mangukom kadakayo. 20  Ngem no babaen ti ramay ti Dios+ a parparuarek dagiti demonio, dimtengen ti Pagarian ti Dios a diyo napupuotan.+ 21  No adu ti armas ti maysa a napigsa a tao a mangguarguardia iti palasiona, saan a maan-ano dagiti sanikuana. 22  Ngem no isu ket rauten ken parmeken ti maysa a tao a napigpigsa, alaen dayta a tao ti amin nga armas a pagpampannurayanna, sana bingaybingayen dagiti natakawna. 23  Ti saan a makikadua kaniak, busorennak; ket ti saan a tumulong kaniak nga agurnong, agiwara.+ 24  “No rummuar ti dakes nga espiritu iti maysa a tao, agsursor kadagiti namaga a lugar tapno agbirok iti paginanaan. Ngem no awan ti masarakanna, kunana, ‘Agsubliak iti balay a pinanawak.’+ 25  Ket inton agsubli, makitana a nadalus ken naarkosan dayta. 26  Kalpasanna, agsubli ken mangikuyog iti pito nga espiritu a dakdakes ngem isuna, ket inton makastrekdan, agnaeddan sadiay. Isu a dakdakesto ti kasasaad dayta a tao ngem idi damo.” 27  Bayat nga agsasao, maysa a babai iti bunggoy ti nangipukkaw: “Naragsak ti ina a nangyanak ken nangpasuso kenka!”+ 28  Ngem kinuna ni Jesus: “Saan, naragragsak ketdi dagidiay dumdumngeg iti sao ti Dios ken mangtungtungpal iti dayta!”+ 29  Idi naguummong ti adu a tattao, kinuna ni Jesus kadakuada: “Daytoy a henerasion ket dakes a henerasion; agsapsapulda iti pagilasinan, ngem awanto ti makitada malaksid iti pagilasinan a napasamak ken Jonas.+ 30  Ta no kasano a nagbalin ni Jonas+ a pagilasinan kadagiti taga-Nineve, kastanto met ti Anak ti tao iti daytoy a henerasion. 31  Inton Aldaw ti Panangukom, mapagungarto ti reyna ti abagatan+ agraman dagiti tattao iti daytoy a henerasion, ket babalawennanto ida ta immay dimngeg iti sirib ni Solomon uray adayo ti naggapuanna. Ngem adda ditoy ti natantan-ok ngem ni Solomon.+ 32  Inton Aldaw ti Panangukom, mapagungarto dagiti taga-Nineve agraman daytoy a henerasion, ket babalawendanto daytoy a henerasion ta nagbabawida gapu iti panangasaba ni Jonas.+ Ngem adtoy! adda ditoy ti natantan-ok ngem ni Jonas. 33  No sinindian ti maysa a tao ti lampara, saanna nga ilemmeng wenno kaluban dayta iti basket,* no di ket ikabilna iti pagiparabawan iti silaw+ tapno dagidiay sumrek makitada ti lawag. 34  Ti matam ti lampara ti bagim. No ngarud naipamaysa* ti matam, naraniag* met ti intero a bagim. Ngem no naapal* ti matam, nasipnget met ti intero a bagim.+ 35  Siguraduem ngarud a ti lawag nga adda kenka ket saan a kinasipnget. 36  Isu a no ti intero a bagim ket naraniag ken awan pasetna a nasipnget, nalawagto dayta a kas iti lampara a mangraniag kenka.” 37  Idi naibaganan dayta, inawis ti maysa a Fariseo a makipangan kenkuana. Isu a napan ket nagsadag iti lamisaan. 38  Nasdaaw ti Fariseo idi makitana a saan a nagbuggo* nga umuna ni Jesus sakbay ti pannangan.+ 39  Ngem kinuna ti Apo: “Dakayo a Fariseo, dalusanyo ti ruar ti kopa ken pinggan, ngem napno ti unegyo* iti kinaagum ken kinadakes.+ 40  Dakayo a maag! Saan aya a ti nangaramid iti makinruar ti nangaramid met laeng iti makin-uneg? 41  Ngem mangtedkayo iti sagut ti asi* a nagtaud iti kaunggan ti pusoyo, ket nadaluskayto iti amin a bambanag. 42  Kaasikayo pay, dakayo a Fariseo, ta itedyo ti apagkapullo ti yerbabuena, ruda, ken dadduma a mulmula,*+ ngem diyo met ipakpakita ti kinahustisia ken ti ayat ti Dios! Dagitoy ti rumbeng nga aramidenyo ngem diyo met baybay-an ti dadduma a banag.+ 43  Kaasikayo pay, dakayo a Fariseo, ta kaykayatyo dagiti makinsango* a tugaw kadagiti sinagoga ken ti makablaawan kadagiti pagtagilakuan!+ 44  Kaasikayo pay, ta kaslakayo kadagiti tanem* a narigat a mailasin,*+ a pagnapagnaan dagiti tattao ta dida ammo a dayta ket tanem!” 45  Ngem insungbat ti maysa kadagiti eksperto iti Linteg: “Mannursuro, in-insultuennakami met kadagita nga ibagbagam.” 46  Innayon ni Jesus: “Kaasikayo met nga eksperto iti Linteg, ta pagawitenyo dagiti tattao iti nadagsen, ngem diyo met kayat nga awiten dagita uray maysa la koma a ramayyo!+ 47  “Kaasikayo pay, ta iyar-aramidanyo iti tanem* dagiti propeta a pinatay dagidi ammayo!+ 48  Kinapudnona, ipakpakitayo nga ammoyo ti inar-aramid dagidi ammayo, ngem konkonsintirenyo ida, ta iyar-aramidanyo iti tanem dagiti propeta a pinatayda.+ 49  Gapuna, kinuna ti Dios babaen ti kinasiribna: ‘Mangibaonakto kadakuada kadagiti propeta ken apostol, ket patayen ken idadanesdanto ti dadduma kadakuada, 50  tapno maisingir iti daytoy a henerasion ti naibukbok a dara ti amin a propeta manipud panangrugi ti sangatauan,+ 51  manipud iti dara ni Abel+ agingga iti dara ni Zacarias, a napapatay iti nagbaetan ti altar ken ti balay.’*+ Wen, ibagak kadakayo, maisingirto dayta iti daytoy a henerasion. 52  “Kaasikayo pay, dakayo nga eksperto iti Linteg, ta inikkatyo ti tulbek ti pannakaammo. Diyo la ngaruden kayat ti sumrek, laplapdanyo pay dagiti sumsumrek!”+ 53  Idi nakaruaren ni Jesus, pinalawlawan ken binusor dagiti eskriba ken Fariseo, ken ad-adu pay ti insaludsodda kenkuana, 54  ta kayatda nga adda maibagana a pangtiliwanda kenkuana.+

Footnotes

Wenno “maibilang koma a sagrado; matrato koma a nasantuan.”
Wenno “tinapaymi.”
Awag ken Satanas.
Wenno “basket a pagsukat.”
Wenno “nalawag.” Lit., “simple.”
Wenno “napno iti lawag.”
Lit., “dakes.”
Kayatna a sawen, ti seremonial a panagdalus.
Wenno “pusoyo.”
Wenno “sagut kadagiti napanglaw.” Kitaem ti Glosario.
Wenno “natnateng.”
Wenno “kasayaatan.”
Wenno “pakalaglagipan a tanem.”
Wenno “awan markana a tanem.”
Wenno “pakalaglagipan a tanem.”
Wenno “templo.”