Ebanghelio ni Juan 17:1-26

  • Maudi a kararag ni Jesus a kaduana dagiti apostolna (1-26)

    • Maaddaan iti biag nga agnanayon dagidiay mangam-ammo iti Dios (3)

    • Saan a paset ti lubong dagiti Kristiano (14-16)

    • “Ti saom ket kinapudno” (17)

    • ‘Impakaammok ti naganmo’ (26)

17  Idi naibagan ni Jesus dagitoy, timmangad iti langit ket kinunana: “Ama, dimtengen ti oras. Padayagem ti anakmo, tapno maipadayagnaka met ti anakmo.+  Intalekmo kenkuana ti amin a tattao,*+ tapno maipaayanna iti biag nga agnanayon+ ti amin nga intedmo kenkuana.+  Maaddaanto iti biag nga agnanayon+ dagidiay mangam-ammo kenka,* ti maymaysa a pudno a Dios,+ ken ti imbaonmo, ni Jesu-Kristo.+  Pinadayagka ditoy daga,+ ta inleppasko ti trabaho nga intedmo.+  Ita, Ama, padayagennak iti abaymo kas iti pannakaipadayagko idi iti abaymo sakbay a naparsua ti lubong.+  “Impakaammok ti naganmo kadagiti tattao ditoy lubong nga intedmo kaniak.+ Kukuam ida, ngem intedmo kaniak, ket tinungpalda ti saom.*  Ita, ammodan a naggapu kenka ti amin nga intedmo kaniak;  gapu ta idi imbagak kadakuada dagiti imbagam kaniak,+ inawatda dagita ken naammuanda nga immayak kas pannakabagim,+ ken namatida nga imbaonnak.+  Agkiddawak maipapan kadakuada; saanak nga agkiddaw maipapan iti lubong, no di ket maipapan kadagidiay intedmo kaniak, ta kukuam ida. 10  Kukuam ti amin a kukuak ken kukuak met ti amin a kukuam,+ ket maipadayagak babaen kadakuada. 11  “Awanakon iti lubong, ngem addada iti lubong,+ ket umayakon kenka. Nasantuan nga Ama, pangngaasim ta aywanam ida+ maigapu iti naganmo nga intedmo kaniak, tapno agkaykaysada koma a kas iti panagkaykaysata.+ 12  Inaywanak ida bayat nga addaak kadakuada+ maigapu iti naganmo nga intedmo kaniak. Sinalaknibak ida, ket awan kadakuada ti napukaw+ no di laeng ti anak ti pannakadadael+ tapno matungpal ti kasuratan.+ 13  Ngem ita umayakon kenka, ket ibagbagak dagitoy bayat nga addaak iti lubong tapno naan-anay a mariknada ti rag-o a marikriknak.+ 14  Imbagak kadakuada ti saom, ngem ginura ida ti lubong, ta saanda a paset ti lubong,+ a kas kaniak a saan a paset ti lubong. 15  “Saanko a kiddawen nga ikkatem ida ditoy lubong, no di ket protektaram ida iti daydiay managdakdakes.+ 16  Saanda a paset ti lubong,+ a kas kaniak a saan a paset ti lubong.+ 17  Pagbalinem ida a nasantuan* babaen ti kinapudno;+ ti saom ket kinapudno.+ 18  No kasano nga imbaonnak ditoy lubong, ibaonko met ida ditoy lubong.+ 19  Agtaltalinaedak a nasantuan maigapu kadakuada, tapno agbalinda met a nasantuan babaen ti kinapudno. 20  “Agkiddawak saan laeng a para kadakuada, no di ket para met kadagidiay mamati kaniak babaen ti saoda, 21  tapno agkaykaysada amin,+ a kas kenka, Ama, a naikaykaysa kaniak ken naikaykaysaak met kenka,+ tapno maikaykaysada met kadata. Iti kasta, mamati ti lubong nga imbaonnak. 22  Intedko kadakuada ti dayag nga intedmo kaniak, tapno agkaykaysada a kas iti panagkaykaysata.+ 23  Naikaykaysaak kadakuada ken naikaykaysaka met kaniak, tapno naan-anay nga agkaykaysada. Iti kasta, maammuan ti lubong nga imbaonnak ken ay-ayatem ida kas iti panagayatmo kaniak. 24  Ama, kayatko a kaduak dagiti intedmo kaniak iti sadinoman nga ayanko,+ tapno makitada ti dayag nga intedmo kaniak, ta inayatnak sakbay pay ti panangrugi ti sangatauan.+ 25  Nalinteg nga Ama, pudno a saannaka a naammuan ti lubong,+ ngem am-ammoka,+ ket ammoda nga imbaonnak. 26  Impakaammok kadakuada ti naganmo ken itultuloyko nga ipakaammo,+ tapno ipakitada ti ayat a kas iti panagayatmo kaniak ken tapno maikaykaysaak kadakuada.”+

Footnotes

Lit., “lasag.”
Wenno “manggun-od iti pannakaammo maipapan kenka.”
Wenno “nagtulnogda iti saom.”
Wenno “Ilasinmo ida.”