Umuna Kadagiti Taga-Corinto 3:1-23

  • Nainlasagan pay laeng dagiti taga-Corinto (1-4)

  • Ti Dios ti mangpadakkel (5-9)

    • Dagiti katrabahuan ti Dios (9)

  • Agusar iti saan a mauram a materiales iti panagibangon (10-15)

  • Dakayo ti templo ti Dios (16, 17)

  • Kinamaag iti Dios ti sirib ti lubong (18-23)

3  Gapuna, kakabsat, saanak a nagsao kadakayo a kas kadagiti naespirituan a tattao,+ no di ket kas kadagiti nainlasagan a tattao, kas maladaga+ maipapan iti Kristo.  Inikkankayo iti gatas, saan a natangken a makan, ta saanyo pay a kabaelan a kanen dayta. Kinapudnona, saanyo pay a kabaelan agingga ita,+  ta nainlasagankayo pay laeng.+ Gapu ta agiinnimon ken agriririkayo, saan kadi a nainlasagankayo+ ken magmagnakayo a kas kadagiti tattao iti lubong?  Ta no kuna ti maysa, “Pasurotnak ni Pablo,” ngem kuna ti sabali, “Pasurotnak ni Apolos,”+ saan kadi nga agtigtignaykayo a kas kadagiti tattao iti lubong?  Asino ngarud ni Apolos? Wen, asino ni Pablo? Ministroda+ a babaen kadakuada, nagbalinkayo a manamati, kas impaay ti Apo iti tunggal maysa.  Siak ti nagmula,+ ni Apolos ti nagsibug,+ ngem ti Dios ti nangpadpadakkel iti dayta,  tapno saan a maidaydayaw ti nagmula wenno ti nagsibug, no di ket ti Dios a nangpadakkel iti dayta.+  Maymaysa* daydiay nagmula ken daydiay nagsibug, ngem umawatto iti gunggona ti tunggal maysa sigun iti panagtrabahona.+  Ta katrabahuannakami ti Dios. Dakayo ti daga a taltalonen ti Dios, ken ti patakder nga ibangbangon ti Dios.+ 10  Impaayannak ti Dios iti nagpaiduma a kinaimbag ket nangisaadak iti maysa a pundasion+ kas nalaing a managibangon,* ngem sabali ti agibangbangon iti rabaw dayta. Isu a siputan koma ti tunggal maysa no kasano ti panagbangonna iti rabaw ti pundasion. 11  Ta awan ti asinoman a makaisaad iti sabali a pundasion malaksid iti naisaaden, ni Jesu-Kristo.+ 12  No adda asinoman nga agbangon iti rabaw ti pundasion nga agusar iti balitok, pirak, napateg a batbato, kayo, garami, wenno naggapasan, 13  makitanto* ti trabaho ti tunggal maysa inton dumteng ti aldaw. Masubokto iti apuy+ ti kualidad ti trabaho ti tunggal maysa. 14  No saan a mauram ti imbangon ti asinoman, umawatto iti gunggona; 15  no mauram ti imbangon ti asinoman, dakkelto ti pukawna, ngem makalasatto; kaskasdi, kaslanto iti tao a dandani saan a nakalasat iti apuy. 16  Saanyo kadi nga ammo a dakayo ti templo ti Dios+ ken agnanaed kadakayo ti espiritu ti Dios?+ 17  Asinoman a mangdadael iti templo ti Dios, dadaelento ti Dios; ta nasantuan ti templo ti Dios, ket dakayo dayta a templo.+ 18  Awan koma ti mangallilaw iti bagina: No ipagarup ti asinoman kadakayo a masirib iti daytoy a sistema ti bambanag,* agbalin koma a maag, tapno agbalin a masirib. 19  Ta ti sirib daytoy a lubong ket kinamaag iti Dios, ta naisurat: “Tiliwenna dagiti masirib iti bukodda a kinasikap.”+ 20  Kasta met: “Ammo ni Jehova* nga awan serserbi ti panagrasrason dagiti masirib a tattao.”+ 21  Isu nga awan koma ti agpannakkel maipapan iti tattao; ta kukuayo ti amin a banag, 22  uray ni Pablo wenno ni Apolos wenno ni Cefas*+ wenno ti lubong wenno ti biag wenno ti ipapatay wenno ti bambanag nga addan wenno ti bambanag nga umay, kukuayo ti amin a banag; 23  ken kukuanakayo ni Kristo;+ ket ni Kristo, kukua ti Dios.

Footnotes

Wenno “Maymaysa ti panggep.”
Wenno “nalaing a mangiwanwan iti trabaho.”
Lit., “maipalgakto.”
Wenno “iti agdama a panawen.” Kitaem ti Glosario.
Kitaem ti App. A5.
Naawagan met iti Pedro.