Umuna Kadagiti Taga-Corinto 8:1-13

  • Taraon a naidaton kadagiti idolo (1-13)

    • Maymaysa laeng ti Diostayo (5, 6)

8  Ita, maipapan iti taraon a naidaton kadagiti idolo:+ Ammotayo nga addaantayo amin iti pannakaammo.+ Ti pannakaammo mamagtangsit, ngem ti ayat mangpabileg.+  No ipagarup ti asinoman nga ammona ti maysa a banag, saanna pay nga ammo ti amin maipapan iti dayta.  Ngem am-ammo ti Dios ti asinoman a mangay-ayat kenkuana.  No maipapan iti pannangan iti taraon a naidaton kadagiti idolo, ammotayo nga awan serserbi ti idolo,+ ken maymaysa laeng ti Dios.+  Ta uray no adda dagidiay maawagan iti dios, idiay man langit wenno ditoy daga,+ no kasano nga adu ti “dios” ken adu ti “apo,”  kinaagpaysuanna, maymaysa laeng ti Dios,+ ti Ama,+ a nagtaudan ti amin a banag ken agbibiagtayo para kenkuana;+ ken maymaysa ti Apo, ni Jesu-Kristo, a naadda ti amin a banag babaen kenkuana+ ken naaddatayo babaen kenkuana.  Nupay kasta, saan nga ammo daytoy ti amin.+ Ngem ti dadduma, gapu ta agdaydayawda idi iti idolo, no manganda iti taraon nga ibilangda a naidaton iti idolo,+ mariribukan ti nakapuy a konsiensiada.+  Ngem saan a ti taraon ti mangyasideg kadatayo iti Dios;+ awan ti mapukawtayo no saantayo a mangan, ken awan ti magun-odtayo no mangantayo.+  Ngem agannadkayo tapno ti kalinteganyo nga agpili ket saan a pakaitibkolan dagiti nakapuy.+ 10  Ta no sika nga addaan pannakaammo ket makita ti asinoman a mangmanganka iti templo a pagdaydayawan iti idolo, saanto ngata a mapatured ti nakapuy a konsiensiana a mangan iti taraon a naidaton kadagiti idolo? 11  Wen, babaen ti pannakaammom, madadael ti pammati ti tao a nakapuy, ti kabsatmo a nakaigapuan ti ipapatay ni Kristo.+ 12  No agbasolka kadagiti kakabsatmo iti kastoy a pamay-an ket madangram ti nakapuy a konsiensiada,+ agbasbasolka ken Kristo. 13  Isu a no maitibkol ti kabsatko gapu iti taraon, pulos a saanakton a mangan iti karne, tapno saanko a maitibkol ti kabsatko.+

Footnotes