Umuna Kadagiti Taga-Corinto 1:1-31

  • Kablaaw (1-3)

  • Agyaman ni Pablo iti Dios gapu kadagiti taga-Corinto (4-9)

  • Maiparegta ti panagkaykaysa (10-17)

  • Ni Kristo, ti pannakabalin ken sirib ti Dios (18-25)

  • Ni Jehova laeng ti ipannakkel (26-31)

1  Siak ni Pablo, naayaban nga agbalin nga apostol+ ni Kristo Jesus babaen ti pagayatan ti Dios, kasta met ni Sostenes a kabsattayo,  nagsuratkami iti kongregasion ti Dios dita Corinto,+ dakayo nga inlasin ti Dios kas adalan ni Kristo Jesus,+ dakayo a naayaban nga agbalin a nasantuan, agraman ti amin nga adda iti sadinoman nga umaw-awag iti nagan ni Apotayo a Jesu-Kristo,+ ti Apoda ken Apotayo:  Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo.  Kanayon nga agyamyamanak iti Diosko gapu iti nagpaiduma a kinaimbagna kadakayo babaen ken Kristo Jesus;  ta napabaknangkayo iti amin a banag gapu kenkuana, iti abilidadyo a mangiwaragawag iti sao ken napnokayo iti pannakaammo,+  ken napatibkerkayo iti panangsaksi maipapan iti Kristo,+  tapno dikay agkurang iti aniaman a sagut, bayat a sigagagar nga ur-urayenyo ti pannakaipalgak ni Apotayo a Jesu-Kristo.+  Patibkerennakayto met agingga iti panungpalan, tapno awan ti mangakusar kadakayo iti aldaw nga iyaay ni Apotayo a Jesu-Kristo.+  Matalek ti Dios,+ a nangayab kadakayo a makikadua* iti Anakna, ni Jesu-Kristo nga Apotayo. 10  Paregtaenkayo, kakabsat, babaen ti nagan ni Apotayo a Jesu-Kristo, nga agtutunos koma ti sasaoyo ken dikay koma mabingbingay,+ no di ket naan-anay koma nga agkaykaysakayo iti panunot ken opinion.+ 11  Ta impadamag kaniak ti dadduma iti sangakabbalayan ni Cloe, a dikay agtutunos, kakabsatko. 12  Ti kayatko a sawen, ibagbaga ti tunggal maysa kadakayo: “Pasurotnak ni Pablo,” “Pasurotnak ni Apolos,”+ “Pasurotnak ni Cefas,”* ken “Pasurotnak ni Kristo.” 13  Nabingbingay kadi ti Kristo? Nabitay kadi ni Pablo iti kayo para kadakayo? Wenno nabautisarankayo kadi iti nagan ni Pablo? 14  Agyamanak iti Dios ta awan ti binautisarak kadakayo malaksid kada Crispo+ ken Gayo,+ 15  tapno awan ti mangibaga kadakayo a nabautisarankayo iti naganko. 16  Wen, binautisarak met ti sangakabbalayan ni Estefanas.+ Ngem diak malagip no adda pay binautisarak. 17  Ta imbaonnak ni Kristo, saan a tapno mangbautisar, no di ket tapno mangipakaammo iti naimbag a damag;+ ken saan a buyogen ti sasao dagiti masirib,* tapno saan nga agbalin nga awan serserbi ti kayo a pagtutuokan* ti Kristo. 18  Ta ti pannursuro maipapan iti kayo a pagtutuokan* ket kinamaag kadagidiay agturong iti pannakadadael,+ ngem kadatayo a maisalakan, pannakabalin dayta ti Dios.+ 19  Ta naisurat: “Pukawekto ti sirib dagiti masirib a tattao, ken laksidekto* ti laing dagiti nalaing a tattao.”+ 20  Ayan ti masirib a tao? Ayan ti eskriba?* Ayan ti mannakidebate iti daytoy a sistema ti bambanag?* Saan kadi a pinagbalin ti Dios a kinamaag ti sirib ti lubong? 21  Gapu ta nagtalek ti lubong iti bukodna a sirib+ ken saanna a naam-ammo ti Dios,+ naay-ayo ti Dios iti kinamaag+ a maikaskasaba tapno maisalakan dagiti mamati. 22  Ta agkidkiddaw dagiti Judio kadagiti pagilasinan+ ken agbirbirok dagiti Griego iti sirib; 23  ngem ikaskasabatayo a nabitay ni Kristo iti kayo, a pakaitibkolan kadagiti Judio ken kinamaag kadagiti nasion.+ 24  Nupay kasta, kadagidiay naayaban, agpadpada kadagiti Judio ken Griego, ni Kristo ti pannakabalin ti Dios ken ti sirib ti Dios.+ 25  Ta ti ibilang ti Dios a maag ket nasirsirib ngem ti tao, ken ti ibilang ti Dios a nakapuy ket napigpigsa ngem ti tao.+ 26  Ta nakitayo idi naayabankayo, kakabsat, a manmano ti naayaban a masirib sigun iti pagalagadan ti tao,*+ mannakabalin, ken nagtaud iti natan-ok* a pamilia,+ 27  ngem pinili ti Dios ti maag a bambanag iti lubong tapno maibabain dagiti masirib a tattao; ken pinili ti Dios ti nakapuy a bambanag iti lubong tapno maibabain ti napigsa a bambanag;+ 28  ken pinili ti Dios ti saan a napateg a bambanag iti lubong ken ti bambanag a matagtagibassit, ti bambanag a maibilang nga awan, tapno pagbalinenna nga awan mamaayna dagidiay a bambanag,+ 29  iti kasta, awan ti asinoman* nga agpannakkel iti imatang ti Dios. 30  Ngem gapu kenkuana, naikaykaysakayo ken Kristo Jesus, a nagbalin kadatayo a sirib manipud iti Dios. Nagbalintayo met a nalinteg+ ken nasantuan+ ken nawayawayaan babaen ti subbot,+ 31  tapno matungpal ti naisurat: “Ti agpannakkel, ipannakkelna koma ni Jehova.”*+

Footnotes

Wenno “makiraman.”
Naawagan met iti Pedro.
Wenno “nasikap a sasao.”
Kitaem ti Glosario.
Kitaem ti Glosario.
Wenno “diakto awaten.”
Kayatna a sawen, ti eksperto iti Linteg.
Wenno “iti agdama a panawen.” Kitaem ti Glosario.
Lit., “masirib maitunos iti lasag.”
Wenno “napateg.”
Lit., “lasag.”
Kitaem ti App. A5.