Umuna Kadagiti Taga-Corinto 16:1-24

  • Panagkolekta para kadagiti Kristiano idiay Jerusalem (1-4)

  • Plano ni Pablo iti panagdaliasatna (5-9)

  • Naiplano nga ibibisita da Timoteo ken Apolos (10-12)

  • Dagiti balakad ken pakomusta (13-24)

16  Ita, no maipapan iti panagkolekta para kadagiti nasantuan,+ mabalinyo a suroten dagiti imbilinko kadagiti kongregasion ti Galacia.  Iti umuna nga aldaw ti tunggal lawas, mangilasin koma ti tunggal maysa kadakayo sigun iti kabaelanna, tapno awan ti panagkolekta inton dumtengak.  Ngem inton makasangpetak dita, ibaonkonto dagiti lallaki a pagtaltalkanyo sigun iti suratyo+ tapno ipanda idiay Jerusalem ti naimbag a sagutyo.  Ngem no nasaysayaat a mapanak met sadiay, kumuyogdanto kaniak.  Ngem umayakto kadakayo kalpasan a mapanak idiay Macedonia, ta lumasatak iti Macedonia;+  ken nalabit makipagyanakto kadakayo wenno palabsek pay ketdi ti tiempo ti lam-ek dita, tapno maituloddak iti dalan nga agturong iti papanak.  Ta diak kayat nga apagbiit laeng a makitakayo, ta kayatko a makaduakayo iti sumagmamano a tiempo,+ no ipalubos ni Jehova.*  Ngem agyanak ditoy Efeso+ agingga iti Piesta ti Pentecostes,  ta naluktan kaniak ti dakkel a ruangan a mangaramid iti ad-adu pay,+ ngem adu ti bumusbusor. 10  Inton sumangpet ni Timoteo,+ siguraduenyo nga awan pagdanaganna bayat a kaduayo, ta ar-aramidenna ti trabaho ni Jehova,*+ a kas kaniak. 11  Awan koma ngarud ti mangumsi kenkuana. Itulodyo a sitatalged iti dalanna, tapno makaumay ditoy, ta ur-urayek agraman dagiti kakabsat. 12  No maipapan ken Apolos+ a kabsattayo, impakaasik nga umay kadakayo a kaduana dagiti kakabsat. Saanna pay a plano ti umay ita, ngem umayto inton adda gundawayna. 13  Agtalinaedkayo a siririing,+ patibkerenyo ti pammatiyo,+ itultuloyyo a pabilgen ti pakinakemyo,*+ bumilegkayo.+ 14  Mabuyogan koma iti ayat ti amin nga aramidyo.+ 15  Ita, iparegtak kadakayo, kakabsat: Ammoyo a ti sangakabbalayan ni Estefanas ti umuna a bungbunga ti Acaya ken impamaysada ti nagserbi kadagiti nasantuan. 16  Itultuloyyo met koma ti agpasakup kadagiti kasta a tattao ken iti amin a tumultulong ken agbambannog a kaduami.+ 17  Ngem maragsakanak iti kaadda da Estefanas,+ Fortunato, ken Acaico, ta isuda ti nangsandi kadakayo ditoy. 18  Ta binang-aranda ti espirituk ken ti espirituyo. Gapuna, apresiarenyo dagiti kasta a tattao. 19  Ipaw-it dagiti kongregasion iti Asia ti pakomustada kadakayo. Naimpusuan a pakomustaandakayo dagiti adalan ti Apo a da Aquila ken Prisca agraman ti kongregasion nga adda iti balayda.+ 20  Pakomustaandakayo ti amin a kakabsat ditoy. Agkikinnablaawkayo iti nasantuan nga agep. 21  Awatenyo ti pakomustak, siak, ni Pablo, ti nagsurat iti daytoy. 22  Mailunod koma ti asinoman nga awan panagayatna iti Apo. O Apomi, umayka! 23  Maadda koma kadakayo ti nagpaiduma a kinaimbag ni Apo Jesus. 24  Maadda koma ti ayatko kadakayo amin a naikaykaysa ken Kristo Jesus.

Footnotes

Kitaem ti App. A5.
Kitaem ti App. A5.
Lit., “agbalinkayo a malalaki.”