Umuna Kadagiti Taga-Corinto 10:1-33
10 Ita, kayatko a maammuanyo, kakabsat, a nagna amin dagidi ammami iti baba ti ulep+ ken limmasatda amin iti baybay+
2 ken nabautisaranda amin ken Moises babaen ti ulep ken ti baybay,
3 ken agpapada amin ti kinnanda a naespirituan a taraon+
4 ken agpapada amin ti ininumda a naespirituan a danum.+ Ta imminumda idi manipud iti naespirituan a bato a simmurot kadakuada, ket dayta a bato irepresentarna* ti Kristo.+
5 Ngem saan a naragsakan ti Dios iti kaaduan kadakuada, ta napapatayda idiay let-ang.+
6 Nagbalin dagitoy a pakdaar kadatayo, tapno ditay agbalin a kas kadakuada a nagtarigagay iti dakes a bambanag.+
7 Dikay met agdaydayaw iti idolo, kas inaramid ti dadduma kadakuada; ta naisurat maipapan kadakuada: “Nagtugaw dagiti tattao tapno mangan ken uminumda, sa timmakderda tapno agraragsak.”+
8 Ditay met iyugali ti seksual nga immoralidad,* kas iti dadduma kadakuada a nakiraman iti seksual nga immoralidad,* isu a natay ti 23,000 kadakuada iti maysa nga aldaw.+
9 Ditay met suboken ni Jehova,*+ kas iti panangsubok kenkuana ti dadduma, isu a natayda idi nakagatda iti uleg.+
10 Dikay met agtanabutob, kas iti panagtanabutob ti dadduma kadakuada,+ isu a pinatay ida ti manangpapatay.+
11 Napasamak dagitoy a banag kas pakasursuruantayo, ken naisurat kas pakdaar kadatayo+ tapno datayo nga agbibiag iti panungpalan daytoy a sistema ti bambanag ket saan nga agbalin a kas kadakuada.
12 Isu nga agannad koma daydiay mangipagarup a nakatakder tapno saan a matumba.+
13 Awan ti sulisog a dimteng kadakayo malaksid iti gagangay kadagiti tattao.+ Ngem matalek ti Dios, ket dina ipalubos a masulisogkayo iti diyo kabaelan,+ no di ket mangisagana iti dalan a pagruaran tapno maibturanyo dayta a sulisog.+
14 Gapuna, patpatgek, adaywanyo ti idolatria.+
15 Ammok a masiribkayo, isu nga ikeddengyo no umiso wenno saan ti ibagbagak.
16 No maipapan iti kopa ti bendision nga ikarkararagtayo, saan kadi a pannakiraman dayta iti dara ti Kristo?+ No maipapan iti tinapay a pispisientayo, saan kadi a pannakiraman dayta iti bagi ti Kristo?+
17 Adda maymaysa a tinapay, isu nga uray adutayo, maymaysatayo a bagi,+ ta mangmangantayo amin iti dayta a maymaysa a tinapay.
18 Usigentayo dagidi Israelita: Saan kadi a dagidiay mangan kadagiti naidaton iti altar makipangpanganda iti Dios?+
19 Ania ngarud ti kayatko a sawen? A napateg ti idolo ken ti naidaton iti idolo?
20 Saan; ti kayatko a sawen ket ti idatdaton dagiti nasion, nga idatdatonda kadagiti demonio saan nga iti Dios.+ Diak kayat a makiramankayo kadagiti demonio.+
21 Diyo mabalin ti uminum iti kopa ni Jehova* ken iti kopa dagiti demonio; diyo mabalin ti mangan iti “lamisaan ni Jehova”*+ ken iti lamisaan dagiti demonio.
22 Wenno ‘kayattayo kadi nga agimon ni Jehova’?*+ Napigpigsatayo aya ngem iti Dios?
23 Amin a banag ket nainkalintegan,* ngem saan nga amin a banag ket makagunggona. Amin a banag ket nainkalintegan, ngem saan nga amin a banag ket makapabileg.+
24 Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.+
25 Kanenyo ti aniaman a karne a mailako iti tiendaan, a dikay agsalsaludsod gapu iti konsiensiayo,
26 ta “kukua ni Jehova* ti daga ken ti amin nga adda iti dayta.”+
27 No adda di manamati a mangawis kadakayo iti pannangan ket kayatyo ti mapan, kanenyo ti aniaman nga idasarna, a dikay agsalsaludsod gapu iti konsiensiayo.
28 Ngem no adda mangibaga kadakayo, “Naidaton daytoy,” diyo kanen gapu iti nangibaga kadakayo ken gapu iti konsiensia.+
29 Saan a ti konsiensiayo ti tuktukoyek, no di ket ti konsiensia ti sabali a tao. Ta apay koma nga ukomen ti konsiensia ti sabali a tao ti wayawayak?+
30 No mangan ken agyamanak iti Dios, apay a mapagsawsawanak gapu iti makan a nakaigapuan ti panagyamanko?+
31 Gapuna, mangmangan wenno umin-inum wenno aniaman ti ar-aramidenyo, aramidenyo ti amin a banag a pakaidayawan ti Dios.+
32 Liklikanyo ti agbalin a pakaitibkolan dagiti Judio kasta met dagiti Griego ken ti kongregasion ti Dios,+
33 kas iti panangikagumaak a mangparagsak iti amin a tattao iti amin a banag, a diak sapsapulen ti bukodko a pagimbagan,+ no di ket ti pagimbagan ti adu, tapno maisalakanda koma.+
