Umuna Kadagiti Taga-Corinto 4:1-21
4 Ibilangdakami koma dagiti tattao kas katulongan* ni Kristo ken mayordomo dagiti sagrado a palimed ti Dios.+
2 Mainaig iti daytoy, manamnama kadagiti mayordomo nga agbalinda a matalek.
3 Ita, saan a napateg kaniak no dakayo wenno ti korte ti tao ti mangsukimat kaniak. Kinapudnona, saanko pay ketdi a suksukimaten ti bagik.
4 Ta awan ti ammok a dakes nga inaramidko. Ngem saanna a kayat a sawen a nalintegak, ta ni Jehova* ti mangsukimat kaniak.+
5 Gapuna, dikay ukomen+ ti asinoman sakbay ti naikeddeng a tiempo, agingga nga umay ti Apo. Ipalgaknanto ti nalimed a bambanag iti kinasipnget ken ipakaammonanto ti panggep ti puso dagiti tattao, ket awatento ti tunggal maysa ti dayaw manipud iti Dios.+
6 Kakabsat, inyaplikarko* dagitoy a banag kasta met ni Apolos+ para iti pagimbaganyo, tapno masursuroyo koma daytoy a paglintegan: “Dikay lumbes iti bambanag a naisurat,” tapno dikay agpannakkel,+ ket paboranyo ti maysa ngem saan ti sabali.
7 Ta asino ti namagbalin kenka a naiduma iti sabali? Kinapudnona, ania ti adda kenka a dimo inawat?+ No inawatmo dayta, apay nga agpannakkelka a kasla dimo inawat?
8 Napnekkay kadin? Nabaknangkay kadin? Nangrugikay kadin nga agturay kas ari+ nga awankami? Kayatko a nangrugikay koman nga agturay kas ari, tapno makipagturaykami met kadakayo kas ari.+
9 Ta pagarupek a dakami nga apostol ti naud-udi a pinastrek ti Dios iti teatro tapno makita ti amin, ta nasentensiaankami a matay.+ Buybuyaennakami ti intero a lubong,+ dagiti anghel, ken dagiti tattao.
10 Maibilangkami a maag+ gapu ken Kristo, ngem ibilangyo ti bagiyo a masirib gapu iti panangsurotyo ken Kristo; nakapuykami, ngem napigsakayo; maidaydayawkayo, ngem maibabainkami.
11 Agingga ita, kanayon a mabisinan+ ken mawawkami+ ken nakapimpiman ti badomi* ken makabkabil*+ ken awan pagtaenganmi
12 ken agtrabtrabahokami a naimbag.+ No main-insultokami, mangbendisionkami;+ no maidaddadaneskami, siaanus nga agibturkami;+
13 no mapadpadakeskami, siaalumamay a sumungbatkami.*+ Naibilangkami a basura iti lubong, ti rugit ti amin a banag, agingga ita.
14 Isursuratko dagitoy, saan a tapno mabainankayo, no di ket tapno paregtaenkayo kas patpatgek nga annak.
15 Ta uray no adda 10,000 a mannursuro* kadakayo maipapan ken Kristo, sigurado a saan nga adu ti amayo; ta babaen ken Kristo Jesus, nagbalinak nga amayo babaen ti naimbag a damag.+
16 Iparegtak ngarud kadakayo a tuladendak.+
17 Isu nga ibaonko kadakayo ni Timoteo, ta isu ti ipatpateg ken matalek nga anakko iti Apo. Ipalagipnanto kadakayo dagiti pamay-an a panagserbik* ken Kristo Jesus,+ no kasano a nangisursuroak iti amin a lugar iti tunggal kongregasion.
18 Timmangsit ti dadduma kadakayo ta ipagarupda a saanakon nga umay.
19 Ngem umayakto kadakayo iti mabiit, no pagayatan ni Jehova,* ket ammuekto, saan a ti ibagbaga dagiti natangsit, no di ket no adda kadakuada ti pannakabalin ti Dios.
20 Ta saan a maiparangarang ti Pagarian ti Dios babaen iti sasao, no di ket iti pannakabalin.
21 Ania ti kaykayatyo? Umayak kadakayo nga addaan iti pagbaut+ wenno napnuan iti ayat ken kinaalumamay?
Footnotes
^ Wenno “adipen.”
^ Wenno “inyallatiwko.”
^ Lit., “ken lamolamokami.”
^ Wenno “madandanog.”
^ Lit., “nga agpakpakaasikami.”
^ Wenno “mangay-aywan.”
^ Lit., “dagiti dalanko.”
