Umuna Kadagiti Taga-Corinto 5:1-13
5 Kinapudnona, nadamagko a maar-aramid ti seksual nga immoralidad*+ iti tengngayo, nga adda lalaki a makidendenna* iti asawa ni amana.+ Dakdakes pay daytoy nga immoralidad* ngem iti ar-aramiden dagiti nasion.
2 Pagpannakkelyo kadi dayta? Saan kadi nga agladingitkayo koma,+ tapno maikkat iti tengngayo ti lalaki a nangaramid iti dayta?+
3 Nupay awanak dita iti pisikal, addaak dita iti espiritu, ket inukomkon ti lalaki a nangaramid iti kasta, a kas man la aktual a kaduakayo.
4 No aguummongkayo iti nagan ni Apotayo a Jesus, ken gapu ta ammoyo nga addaak kadakayo iti espiritu agraman ti pannakabalin ni Apotayo a Jesus,
5 masapul nga iyawatyo ken Satanas+ ti kasta a lalaki tapno maikkat ti dakes nga impluensiana,* ket mataginayon ti espiritualidad ti kongregasion iti aldaw ti Apo.+
6 Saan a nasayaat ti panagpannakkelyo. Diyo kadi ammo a ti bassit a lebadura paalsaenna ti intero a masa?+
7 Ikkatenyo ti daan a lebadura, tapno agbalinkayo a baro a masa, ta kaslakayo masa a saan a napaalsa.* Ta naidatonen ni Kristo,+ a nagbalin a korderotayo iti Paskua.+
8 Iti kasta, selebrarantayo ti piesta,+ saan a babaen ti daan a lebadura, wenno ti lebadura ti kinadakes, no di ket ti awan lebadurana a tinapay ti kinapasnek ken kinapudno.
9 Insuratko idi kadakayo nga isardengyo ti makikadkadua* kadagiti agar-aramid iti seksual nga immoralidad,*
10 saanna a kayat a sawen a naan-anay a dikay makikadua kadagiti agar-aramid iti seksual nga immoralidad* iti daytoy a lubong+ wenno kadagiti naagum wenno manangkikil wenno agdaydayaw iti idolo. Ta no kasta, masapul a rummuarkayo iti lubong.+
11 Ngem ita, isuratko kadakayo nga isardengyo ti makikadkadua*+ iti asinoman a maaw-awagan kabsat nga agar-aramid iti seksual nga immoralidad* wenno naagum+ wenno agdaydayaw iti idolo wenno manangpadakes* wenno mammartek+ wenno manangkikil,+ uray makipangan man la koma iti kasta a tao.
12 Ta apay koma nga ukomek dagiti saan a kameng ti kongregasion? Saan kadi a dakayo ti mangukom kadagidiay kameng ti kongregasion,
13 idinto ta ti Dios ti mangukom kadagiti saan a kameng dayta?+ “Ikkatenyo ti dakes a tao iti tengngayo.”+
