Kadagiti Taga-Roma 1:1-32
1 Siak ni Pablo, nga adipen ni Kristo Jesus. Naayabanak nga agbalin nga apostol ken nadutokan a mangideklara iti naimbag a damag ti Dios,+
2 nga inkarina a nasaksakbay babaen kadagiti propetana a nadakamat iti nasantuan a Kasuratan.
3 Dayta a naimbag a damag ket maipapan iti Anakna a nayanak kas tao manipud iti kaputotan* ni David.+
4 Ngem napaneknekan nga isu ti Anak ti Dios+ idi napagungar babaen ti pannakabalin ti nasantuan nga espiritu.+ Daytoy nga anak ket ni Jesu-Kristo nga Apotayo.
5 Babaen kenkuana, naawatmi ti nagpaiduma a kinaimbag ken ti kinaapostol+ tapno maipakita ti tattao iti amin a nasion+ ti pammati ken panagtulnogda a pakaidaydayawan ti naganna,
6 ken karamankayo met kadagiti nasion a naayaban nga agbalin a kukua ni Jesu-Kristo.
7 Dayta ti makagapu a sursuratankayo, dakayo nga adda dita Roma kas patpatgen ti Dios, a napili nga agbalin a nasantuan:
Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo.
8 Umuna iti amin, agyamanak iti Diosko babaen ken Jesu-Kristo maigapu kadakayo amin, ta ti pammatiyo ket mapagsasaritaan iti intero a lubong.
9 Naimpusuan nga agserserbiak iti Dios ken ipakpakaammok ti naimbag a damag maipapan iti Anakna. Isu ti saksik a kanayon nga iramramankayo kadagiti kararagko,+
10 nga ipakpakaasik a no koma mabalin, mabisitakayo no pagayatan ti Dios.
11 Ta il-iliwek a makitakayo tapno makaitedak iti naespirituan a sagut a mangpatibker kadakayo;
12 wenno tapno makapagpipinnaregtatayo+ iti pammati, dakayo ken siak.
13 Ngem kayatko a maammuanyo, kakabsat, a namin-adun nga implanok ti sumarungkar kadakayo—ngem malaplapdanak agingga ita—tapno mangyeg met iti nasayaat a resulta ti panangasabak dita a kas iti dadduma a nasion.
14 Nakautangak, agpadpada kadagiti Griego ken kadagiti ganggannaet,* agpadpada kadagiti masirib ken kadagiti saan a nakaadal;
15 isu a magagaranak a mangipakaammo met iti naimbag a damag kadakayo dita Roma.+
16 Ta diak ibain ti naimbag a damag.+ Kinapudnona, dayta ti pamay-an ti Dios a mangipakita iti pannakabalinna tapno maisalakan ti amin nga addaan pammati,+ umuna kadagiti Judio+ ken kasta met kadagiti Griego.+
17 Ta gapu iti dayta, maipakaammo ti kinalinteg ti Dios babaen ti pammati ken para iti pammati,+ kas naisurat: “Ngem agbiagto ti nalinteg gapu iti pammatina.”+
18 Ta manipud idiay langit, maipakpakaammo ti pungtot ti Dios+ maibusor iti amin a kinadakes ken kinakillo ti tattao a manglaplapped iti kinapudno+ iti nakillo a pamay-an,
19 ta ti mabalin a maammuan maipapan iti Dios ket nakalawlawag kadakuada, ta pinagbalin dayta ti Dios a nalawag kadakuada.+
20 Ta dagiti di makita a kualidadna ket nalawag a makita manipud idi pinarsuana ti lubong ken agpatpatuloy, ta maawatan dagita babaen ti bambanag a naaramid,+ uray ti agnanayon a pannakabalin+ ken kina-Diosna,+ tapno awan ti pagpambarda.
21 Ta nupay am-ammoda ti Dios, saanda nga indaydayaw kas Dios wenno nagyaman kenkuana. Nagbalin ketdi nga awan serserbi ti panagrasrasonda ken awanen a pulos ti rikna ti maag a pusoda.+
22 Uray ibagbagada a masiribda, nagbalinda a maag
23 ken ti dayag ti Dios a sibibiag iti agnanayon* ket pinagbalinda a kapada ti ladawan ti matay a tao, dagiti billit, uppat ti sakana a parsua, ken reptilia.*+
24 Gapu ta kayatda nga aramiden dagiti tarigagay ti pusoda, binay-an ida ti Dios nga aramidenda ti kinarugit tapno maibabainda ti mismo a bagida.
25 Ti kinapudno maipapan iti Dios ket sinukatanda iti kinaulbod ken nagdaydayaw ken nagserbida kadagiti parsua imbes nga iti Namarsua, a maidaydayaw iti agnanayon. Amen.
26 Isu a binay-an ida ti Dios a surotenda dagiti nakababain a seksual a tarigagayda,+ ta binaliwan dagiti babbai ti natural a pakausaran ti bagida ket ar-aramidendan ti maikontra iti nakaparsuaan.+
27 Binay-an metten dagiti lallaki ti natural a pakausaran ti* babai ta simged ti derrepda iti maysa ken maysa, lallaki iti padada a lallaki,+ nga ar-aramidenda ti naalas ket sagsagabaendan ti naan-anay a dusa, a resulta ti dakes nga aramidda.+
28 Gapu ta dida ibilang a masapul a bigbigenda ti Dios,* binaybay-an ida ti Dios ken impalubosna nga agpanunotda iti dakes, isu nga aramidenda dagiti banag a di maitutop.+
29 Ket napno ti panunotda iti amin a kita ti kinakillo,+ basol, kinaagum,+ ken kinadakes, napnoda iti apal,+ ta mammapatayda,+ mannakiapa, manangallilaw,+ ken kayatda ti mangdangran,+ managtsismisda,
30 mangpadpadakesda,+ kagurada ti Dios, awan daydayawda, natangsit, napangas, nalaingda nga agplano iti makadangran,* nasukirda kadagiti nagannak,+
31 awan pannakaawatda,+ saanda a tungtungpalen dagiti tulagan, awan nainkasigudan a panagayatda, ken saanda a naasi.
32 Uray no ammoda ti amin a nalinteg a bilin ti Dios—a maikari a matay dagiti agar-aramid kadagita+—itultuloyda latta nga aramiden dagita ken anamonganda pay dagiti agar-aramid kadagita.
Footnotes
^ Lit., “bin-i.”
^ Wenno “saan a Griego.” Lit., “barbaro.”
^ Lit., “di agrupsa.”
^ Wenno “agkarkarayam a bambanag.”
^ Wenno “natural a pannakirelasion iti.”
^ Wenno “ibilangda a saan a napateg a siuumiso nga am-ammuen ti Dios.”
^ Wenno “mangar-aramidda kadagiti makadangran a bambanag.”
