Josue 1:1-18

  • Paregtaen ni Jehova ni Josue (1-9)

    • Basaen ti Linteg ken panunoten a naimbag (8)

  • Panagsagana a mangballasiw iti Jordan (10-18)

1  Idi natayen ni Moises nga adipen ni Jehova, kinuna ni Jehova iti katulongan+ ni Moises a ni Josue*+ nga anak ni Nun:  “Natayen ni Moises nga adipenko.+ Agsaganaka ken ballasiwem ti Karayan Jordan a kadua dagitoy a tattao, ket mapankayo iti daga nga itedko kadakayo nga Israelita.+  Kas iti inkarik ken ni Moises, itedkonto kadakayo ti amin a disso a baddekan dagiti sakayo.+  Ti teritoriayo ket manipud iti let-ang agingga iti Lebanon ken iti dakkel a Karayan Eufrates—amin a daga a kukua dagiti Heteo+—ken agingga iti Dakkel a Baybay* iti laud.*+  Abakemto ti amin a bumusor kenka iti intero a panagbiagmo.+ Addaakto kenka a kas iti kaaddak idi ken ni Moises.+ Saankanto a panawan wenno baybay-an.+  Papigsaem ti pakinakemmo ken bumilegka,+ ta sika ti mangidaulo kadagitoy a tattao a mangtawid iti daga nga insapatak kadagidi ammada nga itedko kadakuada.+  “Basta papigsaem ti pakinakemmo ken bumilegka tapno masurotmo a naimbag ti intero a Linteg nga imbilin kenka ni Moises nga adipenko. Dimo suksukiren dayta+ tapno makapagtignayka a nainsiriban iti sadinoman a papanam.+  Saanka nga agsardeng nga agsao maipapan iti daytoy a libro ti Linteg,+ ket masapul a basaem dayta iti nakapsut a timek* iti aldaw ken rabii tapno masurotmo a naimbag ti amin a naisurat iti dayta.+ Iti kasta, agballigika ken makapagtignayka a nainsiriban.+  Imbilinko kenka a papigsaem ti pakinakemmo ken bumilegka. Dika agdanag wenno agbuteng ta ni Jehova a Diosmo ket adda kenka iti sadinoman a papanam.”+ 10  Imbilin ni Josue kadagiti opisial dagiti tattao: 11  “Sursorenyo ti kampo ket ibilinyo kadagiti tattao, ‘Mangisaganakayo iti kanenyo, ta iti tallo nga aldaw, ballasiwenyo ti Jordan ket mapanyo tagikuaen ti daga nga ited kadakayo ni Jehova a Diosyo.’”+ 12  Kinuna ni Josue iti tribu ni Ruben, Gad, ken iti kagudua ti tribu ni Manases: 13  “Laglagipenyo ti imbilin kadakayo ni Moises nga adipen ni Jehova:+ ‘Ik-ikkannakayo ni Jehova a Diosyo iti talna isu nga intedna kadakayo daytoy a daga. 14  Agnaedto dagiti assawayo, annakyo, ken tarakenyo iti daga nga inted kadakayo ni Moises iti daytoy a bangir* ti Jordan.+ Dakayo amin a nabileg a mannakigubat, agmartsakayto a kasla soldado+ a bumallasiw iti Jordan ket umun-unakayto ngem kadagiti padayo nga Israelita.+ Masapul a tulonganyo ida 15  agingga nga ikkan ni Jehova dagiti kakabsatyo iti talna, kas iti intedna kadakayo, ken matagikuada met ti daga nga ited kadakuada ni Jehova a Diosyo. Kalpasanna, agsublikayo iti daga a naited kadakayo ket agnaedkayo sadiay, iti daga iti daya ti Jordan+ nga inted kadakayo ni Moises nga adipen ni Jehova.’” 16  Imbagada ken Josue: “Aramidenmi ti amin nga imbilinmo ken mapankami iti sadinoman a pangibaonam kadakami.+ 17  Agtulnogkami kenka a kas iti panagtulnogmi iti amin nga imbaga ni Moises. Sapay koma ta adda kenka ni Jehova a Diosmo a kas iti kaaddana idi ken Moises.+ 18  Masapul a mapapatay ti asinoman a mangsukir kadagiti ibilinmo ken saan nga agtulnog kadagiti ipaaramidmo.+ Basta papigsaem ti pakinakemmo ken bumilegka.”+

Footnotes

Wenno “Jehosua,” a kaipapananna, “Ni Jehova ti Mangisalakan.”
Kayatna a sawen, ti Mediteraneo.
Wenno “paglennekan ti init.”
Wenno “panunotem dayta a naimbag.”
Kayatna a sawen, iti daya.