Aramid Dagiti Apostol 17:1-34

  • Da Pablo ken Silas idiay Tesalonica (1-9)

  • Da Pablo ken Silas idiay Berea (10-15)

  • Ni Pablo idiay Atenas (16-22a)

  • Palawag ni Pablo idiay Areopago (22b-34)

17  Nagdaliasatda itan idiay Amfipolis ken Apolonia ket nakadanonda idiay Tesalonica.+ Adda sinagoga dagiti Judio sadiay.  Kas kaugalian ni Pablo,+ simrek iti sinagoga, ket tallo a sabbath nga inusarna ti Kasuratan a nakirinnason kadakuada,+  nga inlawlawag ken impakitana iti Kasuratan a masapul nga agsagaba ti Kristo+ ken mapagungar,+ ket kinunana: “Ni Jesus nga ipakpakaammok kadakayo ket isu ti Kristo.”  Kas resultana, nagbalin a manamati ti dadduma kadakuada ket nakikaduada kada Pablo ken Silas.+ Kasta met ti inaramid ti adu a Griego nga agdaydayaw iti Dios, agraman ti adu a prominente a babbai.  Ngem gapu iti imon dagiti Judio,+ nangummongda kadagiti dakes a lallaki nga agwarawara iti plasa ket nangbukelda iti grupo a mangriribuk iti siudad. Sinerrekda ti balay ni Jason ket sinapsapulda da Pablo ken Silas tapno ipanda kadagiti tattao a naguummong.  Idi saanda a mabirokan ida, ginuyodda ni Jason ken ti dadduma a kakabsat ket impanda kadagiti agtuturay ti siudad, nga ipukpukkawda: “Adda met ditoy dagiti tattao a mangrirriribuk* iti amin a lugar,+  ket pinadagus ida ni Jason. Suksukiren amin dagitoy a tattao dagiti bilin ni Cesar, nga ibagbagada nga adda sabali nga ari, ni Jesus.”+  Nariribukan ti intero a grupo ken dagiti agtuturay ti siudad idi nangngegda dagitoy;  ket idi nakaalada iti umdas a piansa* manipud ken Jason ken iti dadduma pay, pinalubosanda idan. 10  Karabiyanna, dagus nga imbaon dagiti kakabsat da Pablo ken Silas idiay Berea. Idi nakadanonda, simrekda iti sinagoga dagiti Judio. 11  Nasaysayaat ti panagpampanunot dagitoy ngem dagiti taga-Tesalonica, ta sigagagar nga inawatda ti sao ti Dios, nga inaldaw a suksukimatenda ti Kasuratan tapno makitada no umiso dagitoy. 12  Gapuna, adu kadakuada ti nagbalin a manamati, kasta met ti adu a prominente a Griego a babbai ken sumagmamano a lallaki. 13  Ngem idi naammuan dagiti Judio manipud Tesalonica nga ipakpakaammo met ni Pablo ti sao ti Dios idiay Berea, napanda sadiay tapno sugsoganda dagiti tattao a bumusor kadakuada.+ 14  Isu a dinagdagus dagiti kakabsat nga imbaon ni Pablo iti igid ti baybay,+ ngem nagbati da Silas ken Timoteo. 15  Ngem adda dagiti nangitulod ken Pablo idiay Atenas, ket pimmanawda idi imbaga kadakuada ni Pablo a sumaruno da Silas ken Timoteo+ iti kabiitan a tiempo. 16  Bayat nga ur-urayen ida ni Pablo idiay Atenas, narurod idi nakitana a napno ti siudad kadagiti idolo. 17  Gapuna, nakirinnason kadagiti Judio ken iti dadduma pay a tattao nga agdaydayaw iti Dios idiay sinagoga ken inaldaw a nangisuro kadagidiay adda iti plasa. 18  Ngem nakisupiat kenkuana ti dadduma nga Epicureo ken Estoico a pilosopo, ket kinuna ti dadduma: “Ania ti kayat nga ibaga daytoy a tarabitab?” Adda met dagiti nangibaga: “Kasla mangipakpakaammo kadagiti ganggannaet a dios.” Imbagada daytoy ta ipakpakaammona ti naimbag a damag maipapan ken Jesus ken iti panagungar.+ 19  Iti kasta, tiniliwda ken impanda idiay Areopago, ket kinunada: “Mabalin kadi a maammuan no ania daytoy baro nga isursurom? 20  Ta karkarna iti lapayagmi dagiti ibagbagam ket kayatmi a maammuan no ania ti kayat a sawen dagita.” 21  Kinapudnona, amin a taga-Atenas ken dagiti ganggannaet nga adda* sadiay us-usarenda ti nawaya a tiempoda a mangibaga wenno dumngeg iti banag a baro. 22  Timmakder ni Pablo iti tengnga ti Areopago+ ket kinunana: “Dakayo a taga-Atenas, makitak nga iti amin a banag, dakdakkel ti panagbutengyo kadagiti dios* no idilig iti dadduma a tattao.+ 23  Kas pagarigan, bayat ti ilalabasko ken panangpalpaliiwko iti bambanag a pagdaydayawanyo, nakakitaak iti altar a nakitikitan iti ‘Para iti Dios a Di Am-ammo.’ Gapuna, ipakaammok kadakayo ti pagdaydayawanyo a saanyo nga am-ammo. 24  Ti Dios a nangaramid iti lubong ken iti amin a banag nga adda iti dayta, daytoy nga Apo ti langit ken daga,+ ket saan nga agnaed kadagiti templo nga inaramid ti ima.+ 25  Saanna met a kasapulan ti panagserbi ti tao a kas man la adda kasapulanna,+ ta isu ti mangipapaay iti biag ken anges+ ken amin a banag iti amin a tattao. 26  Inaramidna ti tunggal nasion dagiti tattao manipud iti maysa a tao+ tapno agnaedda iti intero a daga,+ ken insaadna dagiti naikeddeng a tiempo ken pagpatinggaan ti pagnaedan dagiti tattao,+ 27  tapno sapulenda ti Dios. Masapulanda no ikagumaanda a biroken,+ ta kinapudnona, saan nga adayo iti tunggal maysa kadatayo. 28  Gapu kenkuana, adda biagtayo, makagunay ken addatayo, kas iti imbaga ti dadduma a dumadaniwyo, ‘Ta annaknatayo* met.’ 29  “Gapu ta annaknatayo* ti Dios,+ ditay koma ngarud panunoten a ti Dios ket kasla balitok wenno pirak wenno bato, nga umasping iti kitikit ken disenio ti tao.+ 30  Agpayso a pinalabas ti Dios dagiti tiempo ti kinaignorante;+ ngem idekdeklarana itan a masapul nga agbabawi ti amin a tao iti sadinoman. 31  Gapu ta nangikeddeng iti aldaw ti nalinteg a panangukomna+ iti intero a daga babaen ti maysa a lalaki a dinutokanna, ken nangipaay iti garantia iti amin a tattao babaen ti panangpagungarna kenkuana.”+ 32  Idi nangngegda ti maipapan iti panagungar dagiti natay, adda dagiti nanglais,+ ngem kinuna met ti dadduma: “Dumngegkaminto manen kenka iti sabali a gundaway maipapan iti daytoy.” 33  Isu a pinanawan ida ni Pablo, 34  ngem adda dagiti nakikadua kenkuana ket nagbalinda a manamati. Karaman kadakuada ni Dionisio, a hues iti korte ti Areopago, ken ti babai nga agnagan Damaris, ken dadduma pay malaksid kadakuada.

Footnotes

Wenno “mangbalbalintuag.”
Wenno “garantia.”
Wenno “a bumisbisita.”
Wenno “ad-adda a relihiosokayo.”
Wenno “kaputotannatayo.”
Wenno “kaputotannatayo.”