Fas Samuel 8:1-22
8 Taem Samuel i kam olfala, hem i putumap ol boe blong hem blong oli wok olsem jaj blong ol man Isrel.
2 Nem blong fasbon boe blong hem Joel, mo sekenbon Abaejah.+ Tufala i mekem wok blong jaj long Bereseba.
3 Be tufala pikinini blong Samuel oli no folem rod blong hem. Oli kasem mane long fasin we i no stret,+ mo oli agri blong kasem mane blong haedem rong blong man,+ mo oli no jajem man long jastis.+
4 Nao wan dei, evri elda blong Isrel oli kam wanples, mo oli go luk Samuel long Rama.
5 Oli talem long hem se: “!Yu luk! Naoia yu yu kam olfala, be ol boe blong yu oli no folem eksampol blong yu. Yu mas putumap wan king blong mifala, blong hem i rul* long mifala olsem ol narafala nesen.”+
6 Be Samuel i no glad nating taem oli talem se: “Yu putumap wan king blong i rul long mifala.” Biaen Samuel i prea long Jehova,
7 mo Jehova i talem long Samuel se: “Yu lesin long evri samting we ol man ya oli talem, from we i no yu we oli no wantem, be mi ya we olgeta oli no wantem blong mi king blong olgeta.+
8 Stat long dei we mi tekemaot olgeta long Ijip i kam kasem tede, oli stap mekem sem samting nomo. Oli stap tanem baksaed long mi+ mo oli go mekem wosip long ol narafala god,+ mo hemia nao samting we oli mekem long yu.
9 Yu lesin long olgeta. Be yu mas givim woning long olgeta tu mo talemaot ol samting we king blong olgeta bambae i gat raet blong askem.”
10 Ale Samuel i talemaot olgeta tok blong Jehova long ol man we oli askem wan king blong olgeta.
11 Hem i talem se: “Hemia ol samting we king we bambae i rul long yufala i gat raet blong askem:+ Hem bambae i tekem ol boe blong yufala+ mo i putum olgeta long ol jariot we hos i pulum+ mo bambae hem i mekem we oli kam ol man blong ron long hos,+ mo sam bambae oli ron i go fastaem long ol jariot blong hem we hos i pulum.
12 Mo hem bambae i putumap sam man blong hem, blong oli kam ol lida blong taosen man+ mo ol lida blong fifti man.+ Mo bambae hem i putumap sam man blong oli plao long garen blong hem,+ mo blong oli havest,+ mo blong oli mekem ol tul blong faet blong hem mo ol samting blong jariot we hos blong hem i pulum.+
13 Hem bambae i tekem ol gel blong yufala blong oli wokem oel,* oli kuk, mo oli mekem bred.+
14 Hem bambae i tekem ol beswan graon blong yufala, ol plantesen blong grep mo ol plantesen blong olif,+ mo bambae hem i givim olgeta long ol man blong wok blong hem.
15 Long evri ten hip blong ol kakae long garen mo long plantesen blong grep blong yufala, bambae hem i tekemaot wan i blong hem, mo bambae hem i givim long ol haeman blong hem mo ol man blong wok blong hem.
16 Mo hem bambae i tekem ol man mo ol woman we oli stap wok blong yufala, ol beswan animol blong yufala, ol dongki blong yufala, mo bambae hem i yusum olgeta blong mekem wok blong hem.+
17 Long evri ten grup blong ol animol blong yufala, bambae hem i tekemaot wan i blong hem,+ mo bambae yufala i kam ol man blong wok blong hem.
18 Mo wan dei, bambae yufala i krae bigwan from fasin blong king blong yufala we yufala nomo i jusum,+ be long dei ya Jehova bambae i no ansa long yufala.”
19 Be ol man oli no wantem lesin long samting we Samuel i talem long olgeta, mo oli talem se: “Nogat, mifala i wantem wan king blong i rulum mifala.
20 Nao bambae mifala i kam olsem ol narafala nesen, mo king blong mifala bambae i jajem mifala, i lidim mifala, mo i faet agensem ol enemi blong mifala.”
21 Afta we Samuel i harem ol tok blong ol man ya, hem i talemaot olgeta tok ya long Jehova.
22 Jehova i talem long Samuel se: “Yu lesin long olgeta, mo yu putumap wan king blong i rul long olgeta.”+ Nao Samuel i talem long ol man Isrel se: “Yufala evriwan i mas gobak long ol taon blong yufala.”
