Fas Samuel 26:1-25

  • Bakegen, Deved i no kilim Sol i ded (1-25)

    • Deved i respektem man we Jehova i makemaot (11)

26  Sam taem i pas, ale ol man Sif+ oli kam luk Sol long Gibea,+ mo oli talem long hem se: “Deved i stap haed long hil blong Hakila we i lukluk i go long Jesimon.”*+  Ale Sol i girap, mo hem wetem 3,000 man Isrel we hem i jusum, oli godaon long draeples long Sif, blong lukaotem Deved.+  Sol i mekem kamp blong hem long saed blong rod long hil blong Hakila, we i lukluk i go long Jesimon. Long taem ya, Deved i stap long draeples, mo hem i harem nius se Sol i kam long draeples blong lukaot hem.  Ale Deved i sanem sam spae blong oli go faenemaot sipos i tru se Sol i kam.  Biaen Deved i go long ples we kamp blong Sol i stap long hem, mo hem i luk ples we Sol mo Abnere i slip long hem.+ Abnere ya i lida blong ami blong Sol mo hem i boe blong Nere. Sol i slip long medel blong kamp, mo olgeta soldia oli kamp raon long hem.  Deved i stap wetem Ahimelek we i blong Het+ mo Abisae+ we i brata blong Joab mo we tufala i boe blong Jeruia.+ Nao Deved i askem long tufala se: “?Hu bambae i folem mi i godaon long kamp blong Sol?” Ale Abisae i se: “Mi bambae mi folem yu.”  Ale long naet, Deved mo Abisae tufala i godaon long kamp blong Sol, mo tufala i luk we hem i stap slip long medel blong kamp mo spia blong hem i stanap long graon klosap long hed blong hem. Mo Abnere wetem ol soldia oli slip raon long hem.  Nao Abisae i talem long Deved se: “Tede, God i putum enemi blong yu long han blong yu.+ Naoia, plis, yu letem mi mi planem spia wan taem nomo i gotru long hem mo i go fas long graon. Bambae i no nid blong mi mekem tu taem.”  Be Deved i talem long hem se: “Yu no kilim hem, from we man bambae i kasem panis,+ sipos hem i tajem man we Jehova i makemaot hem.”+ 10  Deved i gohed i se: “Mi mi talem long yu long nem blong Jehova we i laef i stap, se Jehova nomo bambae i kilim hem i ded,+ no bambae wan dei hem i mas ded+ olsem evri man, no bambae hem i ded long taem blong faet.+ 11  !Long lukluk blong Jehova, i no stret nating blong mi tajem man we Jehova i makemaot hem!+ Naoia, plis yu tekem spia we i stap klosap long hed blong hem mo jag blong wota, mo yumitu aot.” 12  Ale Deved i tekem spia mo jag blong wota we i stap klosap long hed blong Sol, mo tufala i aot. Mo i no gat man i luk tufala,+ no i wekap, no i save se tufala i kam, from we Jehova i sanem wan bigfala slip i kam long olgeta, nao olgeta evriwan oli slipded. 13  Ale Deved i gokros long narasaed, mo i go stanap long top blong bigfala hil, longwe long Sol. 14  Nao Deved i singaot i go long ol soldia blong Sol mo long Abnere+ we i boe blong Nere, se: “?Abnere, bambae yu ansa long mi no nogat?” Nao Abnere i ansa se: “?Yu hu ya we yu stap singaot long king?” 15  Nao Deved i talem long Abnere se: “Yu yu wan strong man blong faet, mo i no gat wan narafala long Isrel we i olsem yu. ?From wanem yu no wekap blong lukaot long masta blong yu we i king? Wan soldia i kam insaed long kamp blong kilim masta blong yu i ded.+ 16  Samting we yu mekem i nogud. Mi mi talem long yu long nem blong Jehova we i laef i stap, se i stret nomo blong yufala i ded, from we yufala i no wekap blong lukaot gud long masta blong yufala, we Jehova i makemaot hem.+ !Yu lukluk raon! ?Wehem spia mo jag blong wota+ we i stap klosap long hed blong king?” 17  Nao Sol i haremsave voes blong Deved mo i se: “?Pikinini blong mi Deved, hemia voes blong yu?”+ Nao Deved i se: “Yes masta mo king blong mi, hemia voes blong mi.” 18  Hem i gohed i se: “Masta blong mi, ?from wanem yu stap ronem mi we mi man blong wok blong yu?+ ?Mi mi mekem wanem? ?Wanem rong blong mi?+ 19  Masta mo king blong mi, plis yu lesin long ol tok blong man blong wok blong yu: Sipos Jehova nao i pulum yu blong yu agensem mi, i gud hem i akseptem* ol sid ofring ya blong mi. Be sipos ol man nao oli pulum yu,+ i gud Jehova i panisim olgeta, from we tede oli ronemaot mi i gowe, blong mi no stap long graon we Jehova i givim long ol man blong hem,+ mo oli talem se: ‘!Yu go wosipim ol narafala god!’ 20  Be taem mi stap longwe long fes blong Jehova, plis yu no mas letem blad blong mi i ron. Mi mi olsem wan smol laos+ nomo, be king blong Isrel i stap ronem mi olsem se i stap ronem pijin ya patrij long ol bigfala hil.” 21  Nao Sol i talem se: “Mi mi mekem sin.+ Boe blong mi Deved, yu kambak, bambae mi no moa spolem yu, from we tede yu luk laef* blong mi olsem wan samting we i sas.+ Mi mi mekem samting we i krangke mo mi mekem wan bigfala mastik.” 22  Nao Deved i ansa se: “Spia blong king hemia, i gud wan man i kam tekem. 23  Jehova nao bambae i mekem i gud long man we i mekem i stret+ mo i holemstrong long hem. Tede Jehova i putum yu long han blong mi, be mi mi no wantem tajem man we Jehova i makemaot.+ 24  !Yu luk! Tede mi luk laef* blong yu olsem wan samting we i sas, mo long sem fasin mi wantem se laef* blong mi tu i sas long ae blong Jehova, mo i gud hem i tekemaot mi long olgeta trabol.”+ 25  Nao Sol i talem se: “Boe blong mi Deved, prea blong mi se God i blesem yu. Bambae yu mekem ol bigbigfala samting, mo bambae yu win.”+ Nao Deved i aot i go, mo Sol i gobak long ples blong hem.+

Ol futnot

MNT: “draeples.”
PT: “smelem.”
NT: “sol.”
NT: “sol.”
NT: “sol.”