Fas Samuel 31:1-13
-
Sol mo trifala boe blong hem oli ded (1-13)
31 Nao ol man Filistia oli faet agensem ol man Isrel,+ mo oli kilim i ded plante long olgeta long Hil Ya Gilboa. Ale ol man Isrel oli ronwe long ol man Filistia.+
2 Be ol man Filistia oli kam klosap long Sol wetem ol boe blong hem, nao oli kilim i ded Jonatan,+ Abinadab, mo Malkisua, hemia ol boe blong Sol.+
3 Nao oli faet strong agensem Sol, mo ol man blong sut long bonara oli sutum hem, nao hem i kasem bigfala kil.+
4 Ale Sol i talem long man ya we i stap karem ol tul blong faet blong hem, se: “Yu pulumaot naef blong faet blong yu mo yu stikim mi mi ded, olsem nao ol man ya we oli no sakomsaes+ bambae oli no mekem i nogud long mi,* mo stikim mi mi ded.” Be man blong karem ol tul blong faet blong hem i no wantem mekem, from we hem i fraet tumas. Ale Sol i tekem naef blong faet mo i foldaon antap long hem.+
5 Taem man blong karem ol tul blong faet blong Sol i luk se hem i ded,+ hem tu i foldaon antap long naef blong faet blong hem, mo i ded wetem Sol.
6 Taswe Sol, wetem trifala boe blong hem, mo man blong karem ol tul blong faet blong hem, mo olgeta man blong hem, olgeta evriwan oli ded tugeta long dei ya.+
7 Taem ol man Isrel we oli stap olbaot long vali* mo long ol ples raonabaot long Jodan Reva, oli luk se ol soldia blong Isrel oli ronwe mo Sol wetem ol boe blong hem oli ded, oli girap oli aot long ol taon mo oli ronwe,+ nao ol man Filistia oli kam stap long ol taon ya.
8 Long nekis dei, taem ol man Filistia oli kam blong tekemaot olting blong ol man ya we oli ded, oli faenem Sol wetem trifala boe blong hem oli foldaon i stap long Hil Ya Gilboa.+
9 Ale oli katemaot hed blong Sol mo oli tekemaot klos blong faet blong hem, mo oli sanem tok i go long olgeta ples long Filistia blong oli talemaot nius ya+ insaed long ol haos* blong ol aedol blong olgeta,+ mo long evri man.
10 Biaen oli putum klos blong faet blong hem long haos blong Astoret, mo oli fasem dedbodi blong hem long wol blong Betsan.+
11 Taem ol man Jabesgilead+ oli harem samting we ol man Filistia oli mekem long Sol,
12 olgeta strong man blong faet oli girap, oli wokbaot fulnaet, mo oli go tekemaot bodi blong Sol mo ol boe blong hem long wol blong Betsan. Nao oli kambak long Jabes, mo oli bonem olgeta long ples ya.
13 Biaen oli tekem ol bun blong olgeta+ mo oli go berem aninit long tri ya tamaris long Jabes,+ mo oli fasting blong seven dei.
