Fas Samuel 13:1-23
13 Sol i gat —* yia taem hem i kam king,+ mo hem i rul long Isrel gogo tu yia i pas.
2 Nao Sol i jusumaot 3,000 man long Isrel. Long olgeta ya, 2,000 oli stap wetem Sol long Mikmas mo long rijen blong ol hil blong Betel, mo 1,000 oli stap wetem Jonatan+ long Gibea+ long eria blong Benjamin. Sol i sanemaot ol narafala man oli gobak long ples blong olgeta.
3 Nao Jonatan i kilim i ded grup blong ol soldia blong Filistia+ we oli stap long Geba,+ mo ol man Filistia oli harem nius blong samting ya. Nao Sol i talem se: “!I gud ol man Hibru oli harem nius ya!” Nao hem i sanem ol man oli go long olgeta ples long Isrel mo oli blo long ol hon.+
4 Evriwan long Isrel oli harem nius ya se: “Sol i kilim i ded wan grup blong ol soldia blong Filistia, mo naoia ol man Filistia oli luk Isrel olsem wan samting we i sting.” Nao oli singaot ol man blong oli go joen wetem Sol long Gilgal.+
5 Ol man Filistia tu oli joen tugeta blong faet agensem ol man Isrel. Oli gat 30,000 jariot blong faet mo 6,000 soldia we oli ron long hos, mo ol soldia blong olgeta oli plante we plante olsem sanbij long solwota.+ Olgeta oli go antap mo oli mekem kamp blong olgeta long Mikmas, long is blong Betaven.+
6 Mo ol man Isrel oli luk se oli stap long trabol, from we oli fraet long ol man Filistia, ale oli go haed long ol hol,+ ol hol blong ston, aninit long ol bigbigfala ston, ol hol aninit long graon, mo long ol hol blong wota we man i digim.
7 Mo sam man Hibru oli krosem Jodan Reva tu blong go long ol ples long Gad mo Gilead.+ Be Sol i stap yet long Gilgal mo evriwan we oli folem hem oli fraet tumas.
8 Sol i wet go kasem seven dei olsem we Samuel i talem, be Samuel i no kam yet long Gilgal, mo ol man oli stap ronwe long Sol.
9 Nao Sol i talem se: “Yufala i tekem ol sakrefaes ya we i blong bon fulwan mo sakrefaes blong pis i kam long mi.” Nao hem i bonem sakrefaes ya we i blong bon fulwan.+
10 Be taem hem i bonem sakrefaes ya finis, Samuel i kamtru. Ale Sol i go mitim hem mo i talem halo long* hem.
11 Nao Samuel i talem se: “?Yu yu mekem wanem ya?” Sol i talem se: “Mi luk we ol man oli stap ronwe long mi,+ mo yu no kam long stret taem we yu talem, mo ol man Filistia oli kam hivap wanples long Mikmas.+
12 Taswe mi stap tingting se: ‘Ol man Filistia bambae oli kamdaon blong faet agensem mi long Gilgal, mo mi no mekem wan samting yet blong Jehova i glad long mi.’ Ale mi harem se mi mas bonem sakrefaes ya we i blong bonem fulwan.”
13 Nao Samuel i talem long Sol se: “Fasin we yu mekem i krangke. Yu yu no obei long komanmen we God blong yu Jehova i talem long yu.+ Sipos yu bin obei, bambae Jehova i mekem kingdom blong yu long Isrel i stap strong blong olwe.
14 Be naoia, kingdom blong yu bambae i no save stap longtaem.+ Jehova bambae i faenem wan man we i stret long tingting blong hem,+ mo bambae Jehova i putumap hem i kam lida blong ol man blong hem,+ hemia from we yu yu no obei long tok we Jehova i talem long yu.”+
15 Biaen Samuel i aot long Gilgal mo i go antap long Gibea long Benjamin. Nao Sol i kaontem ol man, mo i gat samwe long 600 man we oli stap yet wetem hem.+
16 Sol wetem boe blong hem Jonatan, mo ol man we oli stap yet wetem tufala, oli mekem ples blong olgeta long Geba+ long Benjamin. Mo ol man Filistia oli mekem kamp blong olgeta long Mikmas.+
17 Nao tri grup blong ol man Filistia we oltaem oli stap go stil, oli aot long kamp blong ol man Filistia. Wan grup i folem rod we i go long Ofraha long ples ya Sual,
18 mo wan grup i folem rod we i go long Betoron,+ mo namba 3 grup i folem rod we i go long mak blong graon we i lukluk i go long vali long Jeboem, long saed i go long draeples.
19 Long olgeta ples long Isrel, i no gat ol man blong wokem ol samting long aean, from we ol man Filistia oli talem se: “Ol man Hibru oli no mas mekem wan naef blong faet no wan spia.”
20 Taswe ol man Isrel oli mas godaon long Filistia blong sapenem ol aean blong plao, ol pik, ol akis, mo ol huknaef blong olgeta.
21 Mo praes blong sapenem aean blong plao, pik, ol defren fok, akis, mo riperem aean blong stikim buluk, hem i wan pim.*
22 Mo long taem blong faet, i no gat wan naef blong faet no wan spia long han blong ol man we oli stap wetem Sol mo Jonatan.+ Sol mo boe blong hem Jonatan, tufala nomo i gat ol tul blong faet.
23 Nao wan grup blong ol soldia blong Filistia oli go stap long rod we i pas long krik blong Mikmas.+
Ol futnot
^ Long ol Hibru hanraet, namba ya i no stap.
^ NT: “blesem.”
^ Long taem bifo, hemia samwe 2 haf blong 1 sekel we oli seraotem long 3 haf.
