Fas Samuel 5:1-12
5 Ol man Filistia oli tekemaot Bokis+ blong tru God long Ebenesa, mo oli karem i go long Asdod.
2 Oli karem Bokis ya i go insaed long haos* blong Dagon, mo oli putum klosap long Dagon.+
3 Nao long nekis dei, taem ol man Asdod oli girap long eli moning, oli luk we Dagon i foldaon we fes blong hem i go long graon, long fored blong Bokis blong Jehova.+ Ale oli tekem Dagon mo oli putumbak hem long ples blong hem.+
4 Mo long nekis dei, taem oli girap long eli moning, oli luk we Dagon i foldaon bakegen we fes blong hem i go long graon, long fored blong Bokis blong Jehova. Hed blong Dagon mo tufala han blong hem oli brokaot olsem we man i katem, mo oli stap long doa blong haos ya. Be bodi blong hem we i olsem fis i no brok.
5 Hemia nao from wanem kam kasem tede, long Asdod, ol pris blong Dagon mo olgeta we oli go insaed long haos blong Dagon, oli no wokbaot long doa ya.
6 Nao han blong Jehova i kam hevi agensem ol man Asdod, mo hem i spolemgud ol man Asdod wetem ol man we oli stap long teritori blong Asdod, i mekem oli kasem ol boela.*+
7 Taem ol man Asdod oli luk samting we i stap hapen, oli talem se: “Yumi no mas kipim Bokis blong God blong Isrel long ples ya, from we han blong hem i mekem i strong tumas long yumi mo long god blong yumi Dagon.”
8 Ale oli sanem toktok i go long evri rula blong Filistia blong oli kam. Taem oli kam wanples, oli askem long olgeta se: “?Bambae mifala i mekem wanem wetem Bokis blong God blong Isrel?” Nao oli ansa se: “I gud yufala i karem Bokis blong God blong Isrel i go long Gat.”+ Ale oli karem Bokis ya i go.
9 Be taem oli karem i go long ples ya, han blong Jehova i kam agensem bigfala taon ya, i mekem ol man oli fraet we oli lusum hed. Hem i kilim ol man oli ded nomata wanem posisen we oli gat, mo i mekem boela i kamkamaot long olgeta.+
10 Ale oli sanem Bokis blong tru God i go long Ekron,+ be taem Bokis ya i kasem Ekron, ol man Ekron oli singaot bigwan se: “!Oli tekem Bokis blong God blong Isrel i kam long yumi blong kilim yumi evriwan i ded!”+
11 Ale oli sanem toktok i go long evri rula blong Filistia blong oli kam. Taem oli kam wanples, oli talem long olgeta se: “Yufala i sanem Bokis ya blong God blong Isrel i go samples. I gud i gobak long ples blong hem, blong mekem se yumi wetem ol man blong yumi, yumi no ded.” Olgeta evriwan long taon oli fraet se bambae oli ded, from we han blong tru God i hevi tumas long ples ya.+
12 Mo ol man we oli no ded, oli kasem ol boela. Mo evriwan long taon ya oli lukluk i go long heven mo oli krae from help.
