1. ?Kɛ nga 1 Piɛli 3:8 fa kan’n sa’n, ngue ti yɛ e klo kɛ é fá e wun mántan be nga e ndɛ lo be’n mun-ɔn?

BE NGA be kle kɛ e ndɛ lo be’n, be yɛ e klo kɛ é fá e wun mántan be titi-ɔ. Afin, sɛ sa wie o e su’n, be sie i nzɔliɛ. Yɛ be kunndɛ kɛ bé wún wafa nga e wun’n yo e’n i wlɛ. Kwlaa naan y’a bo sa ng’ɔ o e su y’a kle be bɔbɔ’n, be fa ajalɛ be uka e. Nanwlɛ, kɛ sran kun kle kɛ e ‘ndɛ lo i’n,’ * e klo i sɔ sran’n.​—An kanngan 1 Piɛli 3:8 nun.

2. ?Ngue ti yɛ ɔ fata kɛ e mian e ɲin kpa naan y’a kle kɛ e wiengu ndɛ lo e-ɔ?

² E mɔ e ti Klisifuɛ’n, e ngba e klo kɛ é sí e wiengu’m be aunnvuɛ. Sanngɛ i sɔ yolɛ timan pɔpɔ cɛn ngba. Afin, fɔ m’ɔ o e nun ti’n, e klo e ngunmin e wun akunndan bulɛ. (Rɔm. 3:23) I sɔ’n ti, ɔ fata kɛ e mian e ɲin kpa naan y’a kwla bu e wiengu’m be akunndan. Asa ekun’n, wafa nga be tali e’n ti’n, ɔ nin sa nga be juli e su laa’n ti’n, sɛ y’a mianman e ɲin’n e su kwlá siman e wiengu’m be aunnvuɛ. Yɛ like ng’ɔ kle e yalɛ ekun’n, yɛle kɛ be nga e nin be e o’n be buman be wiengu’m be akunndan. Biblu’n se kɛ mɛn’n i awieliɛ blɛ nun’n, sran kpanngban bé bú “be bɔbɔ be wun akunndan.” Ɔ maan, sran ndɛ su loman be. (2 Tim. 3:1, 2) ?Ɔ maan, é yó sɛ naan y’a kle kɛ e wiengu’m be ndɛ lo e?

3. (1) ?Ngue yɛ ɔ fata kɛ e yo naan y’a si e wiengu’m be aunnvuɛ-ɔ? (2) ?Ngue yɛ é wá wún i like suanlɛ nga nun-ɔn?

³ Sɛ e nian Ɲanmiɛn Zoova nin i Wa Zezi Klisi be ayeliɛ’n  su’n, e wiengu’m be ndɛ ló e. Ɲanmiɛn Zoova klo sran. Wafa ng’ɔ kle kɛ sran ndɛ lo i’n, ɔ leman wunsu. (1 Zan 4:8) Zezi fɛli i Si i nzuɛn’n. (Zan 14:9) I nun m’ɔ o asiɛ’n su wa’n, ɔ kleli sran’m be wafa nga be kwla yi i nglo kɛ be si be wiengu aunnvuɛ’n. Like suanlɛ nga nun’n, é wá wún wafa nga Zoova nin Zezi be kleli kɛ sran ndɛ lo be’n. I sin’n, é kán wafa nga e kwla nian be ayeliɛ’n su’n, i ndɛ.

4. ?Kɛ nga Ezai 63:7-9 fa kan’n sa’n, ngue yɛ ɔ kle kɛ Zoova i sufuɛ’m be ndɛ lo i-ɔ?

⁴ Biblu’n kle kɛ Zoova i sufuɛ’m be ndɛ lo i. I wie yɛle Izraɛlifuɛ’m be liɛ’n. Biblu’n se kɛ i nun mɔ bé wún ɲrɛnnɛn’n, “be ɲrɛnnɛn sɔ’n, ɔ kacili i bɔbɔ liɛ wie.” (An kanngan Ezai 63:7-9 nun.) I sin’n, Zakari blɛ su’n, Zoova seli kɛ, kɛ be yo i sufuɛ’m be tɛtɛ’n, ɔ ti kɛ i bɔbɔ yɛ be su yo i tɛtɛ sa. Zoova seli i sufuɛ’m be kɛ: “Sran ng’ɔ kan amun’n, nn w’a fɛ i sa w’a wɔ min nyin su.” (Zkr. 2:12) Ndɛ sɔ mɔ Zoova kannin’n, ɔ kle weiin kpa kɛ i sufuɛ’m be ndɛ lo i.

5. An kan sa kun m’ɔ kle kɛ Zoova yoli like fa deli i sufuɛ nga be su wun ɲrɛnnɛn’n, i ndɛ.

⁵ Zoova i sufuɛ’m be yomɛn i annvɔ ngbɛn. Sanngɛ, ɔ yo ninnge wie mun fa ti be wun ɲanman nun. I nun mɔ Izraɛlifuɛ’m bé wún be ɲrun Eziptifuɛ’m be sa nun’n, Zoova wunnin afɛ ng’ɔ o be su’n. Kɛ mɔ be yoli i annvɔ ti’n, ɔ kunndɛli kɛ ɔ́ dé be. I sɔ’n ti’n, ɔ seli Moizi kɛ: “N wunnin min sran nga be o Ezipt lɔ’n be nyrɛnnɛn nga be fa kle be’n. [...] Kpanlɛ nga be kpannin’n, n tili. N si afɛ ng’ɔ o be su’n. M’an jra kɛ ń wá dé be Eziptifuɛ’m bé sa nun.” (Tul. 3:7, 8) Kɛ mɔ Zoova sili i sufuɛ’m be aunnvuɛ’n ti’n, ɔ deli be Eziptifuɛ’m be sa nun, kpɛkun ɔ fa be ɔli mɛn klanman kun nun. Kɛ be juli mɛn sɔ nun lɔ mɔ afuɛ kpanngban sinnin’n, be kpɔfuɛ wie’m be wa fali alɛ wlali be sin. ?Kɛ ɔ yoli sɔ’n, ngue yɛ Zoova yoli-ɔ? Biblu’n se kɛ: “Kɛ be kle be yalɛ bɔ be mianmian be’n, be sun flɛ Anannganman. I kusu ɔ si be aunnvuɛ.” Aunnvuɛ mɔ Zoova si Izraɛlifuɛ mun ti’n, w’a yaciman be lɛ sa ngbɛn. Ɔ sunmannin jɔlɛ difuɛ mun naan be de be.​—Jɔl. 2:16, 18.

6. ?Kɛ akunndan nga sran kun bu’n, ɔ timan su bɔbɔ’n, wafa sɛ yɛ Zoova kle kɛ i sɔfuɛ’n i ndɛ lo i-ɔ? An fa sa kun yiyi nun.

 ⁶ Blɛ wie nun’n, akunndan nga Zoova i sufuɛ wie’m be bu’n, ɔ timan su. Ɔ nin i sɔ ngba’n, Zoova kle kɛ i sufuɛ sɔ’m be ndɛ lo i. I wie yɛle Zonasi liɛ’n. Ɲanmiɛn sunmɛnnin i kɛ ɔ ko bo sa ng’ɔ́ wá fá yó Ninivufuɛ mun’n, i ndolo kle be. Kɛ Ninivufuɛ’m be kacili be nzuɛn’n, Zoova w’a nunnunman be kun. I sɔ’n w’a yoman Zonasi i fɛ mlɔnmlɔn. “Ɔ fali ya dan kpa,” afin ndɛ ng’ɔ boli i jɔ kleli sran mun’n, w’a kpɛnmɛn su. Sanngɛ, Zoova trɛli i awlɛn Zonasi wun. Yɛ ɔ ukɛli i naan ɔ kaci akunndan tɛ m’ɔ bu’n. (Zon. 3:10–4:11) Kɛ ɔ́ kɔ́ i ɲrun’n, Zonasi kacili i akunndan’n. Ɔ maan, Zoova kpɛli i kɛ ɔ klɛ ndɛ sɔ’n naan e fa tu e wun fɔ wie.​—Rɔm. 15:4. *

7. ?Ngue like yɛ wafa nga Zoova nin i sufuɛ’m be nanti’n, ɔ kle e-ɔ?

⁷ Wafa nga Zoova nin i sufuɛ’m be nanti’n, ɔ kle kɛ ɔ si be aunnvuɛ. Afɛ annzɛ ɲrɛnnɛn ng’ɔ o e tinuntinun e su’n, ɔ wun i. Biblu’n se kɛ ɔ “si sran kun i anwlɛn’n nun lɔ sa’n.” (2 Nyo. 6:28-30) Ɔ si akunndan nga e bu’n. Yɛ ɔ wun wafa nga e wun yo e’n i wlɛ wie. Asa ekun’n, ɔ si like nga e kwlɛmɛn i yo’n. Sa ng’ɔ ‘su sɔnman e nun’n, ɔ su kplinman su kɛ ɔ tɔ e su.’ (1 Kor. 10:13) Nanwlɛ, i sɔ’n gua e awlɛn su nzue dan.

8-10. ?Ngue ti yɛ maan sran’m be ndɛ loli Zezi-ɔ?

⁸ I nun mɔ Zezi o asiɛ’n su wa’n, ɔ yili i nglo kɛ sran ndɛ lo i dan. Maan e kan like nga ti yɛ Zezi kwla yoli sɔ’n, be nun nsan be ndɛ. Like klikli’n, yɛle kɛ Zezi i nzuɛn’n fɛ i Si liɛ’n sɛsɛsɛ. Zezi klo sran kɛ i Si sa. Ninnge fanunfanun nga Zezi ukali Zoova naan b’a yi be’n ti’n, Zezi i klun jɔli. Sanngɛ, kɛ Ɲanmiɛn yili klɔ sran’n, ɔ yoli i fɛ dan. (Nya. 8:31) Klolɛ mɔ Zezi klo sran mun ti’n, ɔ yili i nglo kɛ be ndɛ lo i.

⁹ Like nɲɔn su’n yɛle kɛ Zezi kwla si sran’m be klun akunndan’n kɛ Zoova sa. Sa nga ti yɛ sran’m be yo ninnge mun’n, Zezi kwla si i. Asa ekun’n, ɔ kwla wun wafa sran’m be wun yo be’n, i wlɛ. (Mat. 9:4; Zan 13:10, 11) Ɔ maan, kɛ sran wie’m be wla boli be wun’n, ɔ wunnin i wlɛ. Kpɛkun ɔ fɔnvɔli be.​—Eza. 61:1, 2; Lik. 4:17-21.

¹⁰ Like nsan su’n, yɛle kɛ sa nga be tɔ sran’m be su’n, be nun wie’m be tɔli Zezi bɔbɔ su wie. I wie yɛle kɛ, i awlofuɛ’m be ti yalɛfuɛ. Asa ekun’n, i si Zozɛfu kleli i junman kekleekle’m be dilɛ. (Mat. 13:55; Mar. 6:3) Atrɛkpa’n, Zozɛfu wuli ka naan Zezi w’a bo jasin fɛ’n i bolɛ bo. Ɔ maan, kɛ e awlɛn su sran wu’n, wafa nga e wla bo e wun’n, ɔ wun i wlɛ. Afin, i sɔ sa’n juli i su wie. Asa ekun’n, i awlofuɛ’m b’a lafiman ndɛ ng’ɔ kan’n su. (Zan 7:5) Sa sɔ mun ɔ nin wie mun ekun be ti’n, Zezi kwla wunnin sa ng’ɔ tɔ sran’m be su’n, ɔ nin wafa nga be wun yo be’n, i wlɛ.

11. ?Ngue yɛ Zezi yoli m’ɔ kle kpa kɛ sran’m be ndɛ lo i-ɔ? An yiyi nun. (An nian desɛn ng’ɔ o fluwa’n i bui’n su’n.)

¹¹ Abonuan sa nga Zezi yoli be’n, be yili i nglo kpa kɛ sran’m be ndɛ lo i. Be nga afɛ o be su’n, ‘be yo Zezi i annvɔ.’ I sɔ’n ti yɛ ɔ yoli abonuan sa mun-ɔn, nán kɛ be wun ɲanman nun tilɛ sa ngbɛn ti-ɔ. (Mat. 20:29-34; Mar. 1:40-42) I wie yɛle kɛ cɛn kun’n, ɔ fali sutrefuɛ kun jasoli sran’m be wun lɛ, kpɛkun ɔ yoli i juejue. Cɛn kun  liɛ’n, ɔ cɛnnin angbeti bla kun i wa ba kunngba’n. (Mar. 7:32-35; Lik. 7:12-15) Zezi fɛli i wun mantannin sran sɔ mun. Kpɛkun, ɔ tili be wun ɲanman nun.

12. ?Kɛ nga Zan 11:32-35 fa kan’n sa’n, wafa sɛ yɛ Zezi kleli kɛ Marti nin Mali be ndɛ lo i-ɔ?

¹² Zezi kleli kɛ Marti nin Mali be ndɛ lo i. Afin kɛ be niaan bian Lazaa wuli mɔ bé sún’n, “Zezi sunnin” wie. (An kanngan Zan 11:32-35 nun.) Zezi si kɛ ɔ́ wá cɛ́n Lazaa. ?Yɛ nn ngue ti yɛ ɔ sunnin-ɔn? Nán kɛ ɔ su wunmɛn i janvuɛ’n kun ti-ɔ. Sanngɛ, ɔ wunnin kɛ Lazaa i wie’n ti’n, i janvuɛ’m be awlɛn w’a kpɔtɔ be klun. Yɛ be yoli i annvɔ dan.

13. ?Kɛ e wun kɛ Zezi si sran’m be aunnvuɛ’n, ngue ti yɛ i sɔ’n gua e awlɛn su nzue dan-ɔn?

¹³ Kɛ e wun kɛ Zezi si sran’m be aunnvuɛ’n, i sɔ’n gua e awlɛn su nzue dan. Asa ekun’n, kɛ e bu wafa ng’ɔ nin sran’m be trannin’n i akunndan’n, i wun yo e fɛ dan. (1 Piɛ. 1:8) E si kɛ dɔ nga su’n Zezi ti Famiɛn, naan ɔ cɛ kan’n, ɔ́ wá yó maan e su ɲrɛnnɛn kwlaa wie. I sɔ’n yo e fɛ dan. Kɛ mɔ Zezi yoli klɔ sran wie ti’n, ɔ kwla yo maan ɲrɛnnɛn fanunfanun nga Satan ti e wun be’n, be wie weiin. Nanwlɛ, kɛ e wun kɛ e le Famiɛn kun m’ɔ ‘si afɛ ng’ɔ o e su’n, kpɛkun ɔ si e aunnvuɛ’n,’ e si’a wie se.​—Ebr. 2:17, 18; 4:15, 16.

14. ?Kɛ nga Efɛzifuɛ Mun 5:1, 2 fa kan’n sa’n, ngue yɛ ɔ fata kɛ e yo-ɔ?

¹⁴ Kɛ e bu ajalɛ nga Zoova nin Zezi be kle e’n i akunndan’n, e klo kpa kɛ é sí sran’m be aunnvuɛ wie. (An kanngan Efɛzifuɛ Mun 5:1, 2 nun.) E kwlá siman akunndan nga sran’m be bu’n. Sanngɛ, e kwla mian e ɲin naan y’a wun wafa nga sran’m be wun yo be’n, i wlɛ. Yɛ e kwla si like nga be miɛn i wun’n. (2 Kor. 11:29) Sran sunman be bu be bɔbɔ be wun akunndan. Sanngɛ e liɛ’n, e buman ‘e bɔbɔ e ninnge’m be ngunmin be akunndan, sanngɛ e wiengu’m be liɛ’n lo e wie.’​—Fp. 2:4.

15. ?Wan mun yɛ ɔ ti cinnjin kpa kɛ be kle kɛ be wiengu’m be ndɛ lo be-ɔ?

¹⁵ Ɔ ti cinnjin kpa kɛ asɔnun kpɛnngbɛn’m be kle be wiengu mun kɛ be ndɛ lo be. Be si kɛ bé wá kán junman mɔ Zoova fa mannin be’n, i su ndɛ klé i. (Ebr. 13:17) Kɛ ɔ ko yo naan b’a kwla uka be niaan mun’n, ɔ fata kɛ be si sran aunnvuɛ. ?Wafa sɛ yɛ be kwla kle kɛ be wiengu’m be ndɛ lo be-ɔ?

16. (1) ?Wafa sɛ yɛ asɔnun kpɛnngbɛn kun kwla kle kɛ i niaan’m be ndɛ lo i-ɔ? (2) ?Ngue ti yɛ i sɔ yolɛ’n ti cinnjin-ɔn?

¹⁶ Asɔnun kpɛnngbɛn nga i niaan Klisifuɛ’m be ndɛ lo i’n, ɔ fɛ i wun mantan be. Kɛ ɔ nin bé kókó yalɛ m’ɔ usa be kosan’n, ɔ sie i su kpa be nuan bo. I li kɛ aniaan kun kunndɛ kɛ ɔ́ kɛ́n i klun ndɛ m’ɔ wunman ndɛ’n i kanwlɛ’n, yɛ i sɔ yolɛ’n ti cinnjin-ɔn. (Nya. 20:5) Kɛ asɔnun kpɛnngbɛn kun fɛ i wun mɛntɛn i niaan mun’n, ɔ nin be tra janvuɛ, kpɛkun be lafi be wiengu su.​—Yol. 20:37.

17. ?Ndɛ benin yɛ aniaan sunman be kan-ɔn? An fa sa kun yiyi nun.

¹⁷ Aniaan sunman be seli kɛ, kɛ asɔnun kpɛnngbɛn kun kle kɛ i niaan’m be ndɛ lo i’n, i sɔ liɛ’n yo be fɛ dan. ?Ngue ti-ɔ? Aniaan bla kun mɔ be flɛ i kɛ Adelaidi’n, ɔ seli kɛ: “Kɛ be yo sɔ’n, a sisiman ɔ bo naan w’a kan ɔ klun ndɛ w’a kle be. Afin, a si kɛ bé wún sa ng’ɔ o ɔ su’n i wlɛ.” Ɔ kan guali su kɛ: “Kɛ a nin bé kókó yalɛ’n, wafa nga be tɛ ɔ su’n, ɔ kle weiin kɛ ɔ ndɛ lo be sakpa.” Kɛ sa kun tɔli aniaan bian kun su’n, wafa nga asɔnun kpɛnngbɛn kun sili  i aunnvuɛ’n, i wla te kpɛn su. Ɔ seli kɛ: “Kɛ ń kán ndɛ’n, i ɲinmuɛn nzue guali. N wla su fimɛn i sɔ’n su le.”​—Rɔm. 12:15.

18. ?Wafa sɛ yɛ e kwla yi i nglo kɛ e wiengu’m be ndɛ lo e-ɔ?

¹⁸ Nán asɔnun kpɛnngbɛn’m be ngunmin yɛ ɔ fata kɛ be niaan’m be ndɛ lo be-ɔ. E ngba e kwla yi nzuɛn sɔ’n i nglo wie. Ɔ fata kɛ e wun sa ng’ɔ o e awlofuɛ mun ɔ nin e wiengu Klisifuɛ’m be su’n, i wlɛ. Maan e fa e wun mantan gbanflɛn nin talua nga be o asɔnun nun’n, nin tukpacifuɛ mun ɔ nin aniaan oke mun, yɛ be nga be sran w’a wu’n. Maan e usa be sɛ be wun ti kpa o. Kɛ bé tɛ́ e su’n, maan e sie e su kpa. Maan e yo naan be wun i wlɛ kɛ e wun sa ng’ɔ o be su’n, i wlɛ. Sɛ e wun kɛ e kwla ti be wun ɲanman nun’n, nán maan e sisi e bo. Kɛ e yo sɔ’n, e kle kɛ e klo be sakpa.​—1 Zan 3:18.

19. ?Kɛ é úka e wiengu mun’n, ngue yɛ ɔ fata kɛ e wun i wlɛ-ɔ?

¹⁹ Kɛ sa kun o sran kun su’n, wafa nga i wun yo i’n, ɔ nin sran uflɛ liɛ’n timan kun. Sran wie o lɛ’n, kɛ sa o i su’n, ɔ klo kɛ ɔ́ yíyí nun klé sran. Sanngɛ sran wie’m be klomɛn i sɔ’n. Ɔ maan, kannzɛ e klo kɛ é úka e wiengu mun’n, sanngɛ ɔ fataman kɛ e usa be kosan wie m’ɔ́ yó be kɛnsrɛn’n. (1 Tes. 4:11) Ɔ ju wie’n, kɛ bé kókó sa ng’ɔ o be su’n klé e’n, ndɛ nga be kan’n, ɔ timan e liɛ’n su. Sanngɛ, maan e wun i wlɛ kɛ wafa nga be wun yo be’n, yɛ be su yiyi nun klé e-ɔ. I sɔ’n ti, ɔ fata kɛ e sie e su kpa be nuan bo. Yɛ nán e kpli e kan ndɛ.​—Mat. 7:1; Zak. 1:19.

20. ?Kosan benin yɛ é wá wún i su tɛlɛ’n like suanlɛ nga i sin liɛ’n nun-ɔn?

²⁰ E kunndɛ kɛ é yí i nglo asɔnun’n nun kɛ e niaan’m be ndɛ lo e. Sanngɛ jasin fɛ bolɛ nun kusu’n, e kunndɛ kɛ e yi nzuɛn sɔ’n i nglo wie. ?Yɛ wafa sɛ yɛ e kwla yi nzuɛn sɔ’n i nglo-ɔ? Like suanlɛ nga i sin liɛ nun’n, é wá wún kosan sɔ’n i su tɛlɛ’n.